‘Diosman qayllaykusqay aswan sumaj’
JISQʼON watayoj kashajtiy niña wiñarqanichu. Kunantaj 43 watasniyojña kani, uj metro jinallataj midini. Tatasneyqa juchʼuysitu kasqaypi mana anchata yuyanaypaj imallapipis sinchʼita llankʼanayta niwarqanku. Chayrayku wasiyku punkupi uj fruta puestota churarqani. Llimphituta japʼisqayraykutaj ashkhas rantikoj jamoj kanku.
Chaywanpis kausayneyqa kikillanpuni karqa. Juchʼuy imasllatapis mana ruwayta atejchu kani. Sutʼincharinapaj, tiendasman rispa ñakʼayllata altopi kaj imasta taripaj kani, tukuy chay imasqa jatuchaj runaspaj jina ruwasqa kasharqa. Chayrayku mayta llakikoj kani, chaywanpis 14 watayoj kashajtiy waj jinataj karqa.
Uj kuti iskay warmis frutata rantikuwarqanku, paykunaqa Jehovaj testigosnin karqanku. Bibliamanta willariwasqankurayku paykunawan yachakuyta qallarerqani. Imaynachus kasqaymanta llakikunaymantaqa, Jehovata rejsiy, munayninta yachay ima aswan sumaj kasqanta yachachiwarqanku. Chaytaj mayta yanapawarqa. Chay kutipitaj Salmo 73:28 versiculopi nisqan mayta gustawarqa. Chay versiculoj qallariyninpi nin: “Noqarí Diosman qayllakusaj. Noqapajqa chaymin aswan sumajqa”, nispa.
Chantá familiaywan Burkina Faso suyuman riporqayku, chaypeqa mana Costa de Marfil suyupi jinachu fruterata jina rejsiwaj kanku, astawanpis juchʼuysitu kasqayrayku tukuy qhawawaj kanku. Chayrayku wasiymanta semanasta mana llojsejchu kani. Jinapis Jehovaman qayllaykusqay may sumajpuni kasqanta yuyarikorqani. Chayrayku Jehovaj testigosninpa sucursalninkuman qhelqarqani, paykunataj Nani sutiyoj misionerata kachamuwarqanku, motonpitaj wasiyman jamoj.
Maypichus tiyakorqayku chaypi callesqa jallpʼalla kaj. Paray tiempopitaj llustʼanapaj jina karqa. Naniqa Bibliamanta yachachiwaj jamushaspa ashkha kutispi motonmanta urmaykoj. Jinapis jamullajpuni. Uj pʼunchaytaj Naniqa tantakuyman pusayta munawasqanta niwarqa. Noqataj ni imata kutichiyta aterqanichu, imaraykuchus manchachikorqani wasiymanta llojsiyta, runas juchʼuysitu kasqayrayku qhawanawankuta ima. Chantapis motonman wicharejtiy astawan llasayananta, manataj apayta atinawanta yuyaj kani. Jinapis paywan rerqani. Gustawasqan versiculoj, chaupi kajpi nisqantataj yuyarikorqani. Chaypi nin: “Tukuy Atiyniyoj Tata Dios, qanmin pakakunay kanki”, nispa.
Wakin kutis iskayniyku tʼuruman urmaykoj kayku, jinapis tantakuykunaman rillajpuni kayku. Runasqa juchʼuysitu kasqayta qhawawaj kanku, hermanostajrí kʼachamanta asirispa parlawaj kanku. Jisqʼon killasninmantaj bautizakorqani.
Gustawasqan versiculoj tukukuyninpi nin: “Noqataj tukuy ruwasqasniykita willamusaj”, nispa. Kay versiculoqa willamunay kasqanta yuyarichiwarqa. Chaywanpis yacharqani wasimanta wasi willaj riyta mana atinayta. Ñaupaj kutirayku willaj llojsishajtiy juchʼuysitu kasqayrayku wawas, machu runas ima tʼukulla qhawawaj kanku, asipayawaj kanku, imaynatachus purisqaytapis yachapayawaj kanku. Chaytaj sonqoyta mayta nanachiwaj, chaywanpis yuyarikoj kani paykunapis Paraisopi noqa jinallataj kausakuyta necesitasqankuta. Chayraykutaj ñaupajllamanpuni rerqani.
Willayman rinaypajqa uj triciclota rantikorqani, chaytaj makiswan pedaleanapaj karqa. Willaypi wichaynejta rinaypajtaj compañeray tricicloyta tanqarimuwaj. Uraynejman rinayku kajtintaj compañeraypis tricicloyman wicharimoj. Qallariypeqa willayta mana atillajchu kani, tiempo pasasqanman jinataj willaspa mayta kusikoj kani. Chayrayku 1998 watapi precursora jina llankʼayta qallarerqani.
Ashkhasman Bibliamanta yachacherqani, 4 bautizakunkuña. Sullkʼa hermanaypis Bibliamanta yachakuyta qallarerqa. Ashkha runas Diosta yupaychaypi ñauparisqankuta uyareyqa mayta sonqochawaj, necesitashajtiypunitaj mayta kallpachawaj. Sutʼincharinapaj, uj universitarioman wasi punkunpi Bibliamanta yachachej kani. Chantá uj hermanoman yachachinanpaj saqerqani. Tiempo pasasqanman jinataj chay universitario Costa de Marfilman ripusqa. Uj pʼunchaytaj malariawan onqosqa kashajtiy uj carta chayamorqa. Chay cartapeqa chay universitario willayman llojsishasqantaña nisharqa, chaytaj mayta kusichiwarqa.
Kausakunaypajqa, uj institución sirayta yachachinawanta niwarqa. Chay institucionqa paykuna kikinkumanta mana imallatapis ruwayta atejkunata yanapan. Ujnin profesorataj sumajta llankʼasqayta reparaspa jabonta ruwayta yachachinawankuta nerqa. Ajinamanta wasiypi jabonta, jaboncillota ima ruwani. Rantikuwajkunamanqa jabonta ruwasqay gustan, chayrayku jabonesniymanta wajkunamanpis willarinku. Apapunayta niwajtinkutaj kinsa ruedasniyoj motocicletaypi apani.
Wasay mayta nanawasqanrayku, 2004 watapi precursora kayta saqeporqani. Jinapis atisqayman jina willayman llojsillanipuni.
Runasqa kusisqallapuni kasqayrayku rejsiwanku. Ajina kusisqa kani, Diosman qayllaykusqay mayta kusichiwasqanrayku. (Sarah Maiga, Willariwanchej.)