TAPANMANTA | ¿IMATAJ CIELOPI TIYAN?
¿Imastá runas yuyanku cielomanta?
Ashkha runas imaynachus cielo kasqanmanta, pikunachus chaypi tiyakusqankumanta yachayta munanku. Runasqa tukuy imaymanata yuyanku. Wakenqa ninku, cielopi ñaupa tatasninku kausashasqankuta, yupaychanapaj jinataj kasqankuta. Wakintaj yuyanku cielopeqa allin kausay, kusiytaj kasqanta, maypichus ángeles, kʼacha runas wañupojkuna ima kausasqankuta. Wakinrí yuyanku cielopeqa may chhika dioses kausasqankuta.
Wakenqa ninku ni imata cielomanta yachasqanchejta, ni pipis chaymanta willanawanchejpaj jamusqanrayku. Chaytaj mana cheqachu. Jesucristoqa niraj Jallpʼaman jamushaspa, cielopi kausakorqaña. Chaytataj sutʼita nerqa ñaupa tiempomanta religionta kamachejkunawan parlashaspa. Pay nerqa: “Mana munayniyta ruwanaypajchu janaj pachamanta uraykʼamorqani, astawanqa Kachamuwajniypa munayninta ruwanaypaj jamuni”, nispa. Jesusqa cielomanta sumajta yachasqanrayku apostolesninman nerqa: “Tataypa wasimpi ashkha tiyakunas tiyan”, nispa (Juan 6:38; Juan 14:2, Qheshwa Biblia).
Jesuspa Tatanqa, Jehová, paytaj cielopi tiyakun (Salmo 83:18). Chayrayku paykunalla imaynachus cielo kasqanta sutʼinchayta atinku. Jehovawan Jesuswanqa imaynachus cielo kasqanta ashkha cheqa sonqo runasman mosqoypi jina rikucherqanku.
Qhepan yachaqanapi ukhunchasun, Bibliapi nisqanman jina imastachus chay cheqa sonqo runas ashkha kutispi mosqoypi jina rikusqankumanta. Chayta ukhunchashaspataj yuyarikuna, cieloqa mana kay pacha jinachu kasqanta, maypichus tukuy imata rikunchej, tʼojpirinchej ima. Chayrayku Diosqa, runa entiendenanpaj jinalla mosqoypi jina rikucherqa imaynachus cielo kasqanta. Chayta yachaytaj cielopi tiyakojkunamanta aswan allinta yachanapaj yanapawasun.