Iñiyninkuta rikuchinku
1. ¿Ima ñakʼariykunatataq Jesús profetizarqa?
1 Apostolesqa, Yachachiqninpa kutimuyninmanta, kay pachap tukukuyninmanta ima, profeciata allinta uyarirqanku. Runaqa, may ñakʼariykunata muchunan karqa: maqanakuykunata, yarqhaykunata, jallpʼa ikhakuykunata, jatun unquykunata... Cristop chiqa discipulosninta chiqninanku karqa, ñakʼarichinanku karqa; wakinkunatataq wañuchinanku karqa. Llulla profetaspis achkha runata chʼawkiyananku karqa. May chhika runap munakuyninku chiriyakapunan karqa.
2. ¿Imaraykutaq tʼukunapaqjina tukuy llaqtaspi sumaq willaykuna willakuchkan?
2 Ajina pʼunchaykunapi, Jesús Diospa Reinomanta sumaq willaykuna tukuy llaqtaspi willanankuta nisqanta, discipulosninqa mana ruway atinajinatachá rikurqanku (Mat. 24:3-14). Chaywanpis kunanqa, chay profecía mana creenapaqjina juntʼakuchkasqanta rikuchkanchik. Saqra pʼunchaykunapis kachun, Jehovamanta sutʼinchaqkunaqa, kay sumaq willaykunata kusiywan willachkanchik. Kay pachap munakuyninqa chiriyapuchkan, chaywanpis munakuyninchikqa sapa pʼunchay astawan juk ninajina lawrarin. “Tukuy llaqtaspi” chiqniwanchik, chaywanpis tukuy llaqtaspi willachkasqanchikta nisunman.
3. ¿Ima allin yapakusqantataq tukuy pachamanta willakusqanpi tarinchik?
3 Kay 3 paginamanta 6 paginakama tablapi, Jehovamanta sutʼinchaqkuna imatachus qayna watapi ruwasqankuta willakuchkan. Chayta ukhunchariyqa sumaqta kallpachawanchik. Kunanqa, watiqmanta waranqa junu (1.000.000.000) horasmanta astawan ruwanchik, runaman willamunapaq, yachachimunapaq ima, kaywanqa 16 kutitaña ajinata ruwanchik. ¡Ajinamanta may allinta iñiyninchikta rikuchinchik! Qayna watapi ruwasqanchikmantaqa, kay watapi 8,7% precursores yapakun, 3,1% willaqkuna yapakun, 4,4% Bibliamanta yachakuqkuna yapakun, bautizakuqkunataq 20,1% yapakun. ¡Mayta kusikunchik yaqha qanchis junu runas (casi 7.000.000) Jehovata yupaychachkasqanchikmanta! ¡Mana jaykʼaqpis ajina karqachu! ¿Ima wak allin willaykunatataq tablapi astawan tarinki?
4. ¿Ima viciostataq juk runa saqirqa, bautizakunanpaq?
4 Kay willaykuna may allinpis kachun, mana qunqanachu hermanosninchikpa iñiyninkuta rikuchisqanta. Chaymanta juk chhikata qhawarina. Guillermoqa, Bolivia suyumanta. Payqa 1935 watapi nacekurqa, jisqʼun watitayuqmantapacha coca chakrapi llamkʼarqa. Wawamantapacha pikchayta qallarirqa, sinchita llamkʼananpaq. Chaymantataq anchata machakuyta, cigarrota pitayta ima qallarirqa. Jehová paymanta imatachus mañasqanta yachaytawan, Guillermoqa cigarrota pitayta, machakuyta ima, saqirqa pacha. Chaywanpis, pikchaytaqa mana saqiyta atillarqachu. Mayta Diosmanta mañakuspa, ñakʼaymanta saqiyta atirqa. Chay viciosninta saqispataq, bautizakurqa. Pay ajinata nin: “Kunanqa llimphu kachkani, may kusisqataq”, nispa.
5. ¿Imata ñuqanchikpis munanchik?
5 Jehová maytapuni runamanta dakukun. Payqa, tukuy runa mana allin ruwayninmanta kutirikunanta munan (2 Ped. 3:9). Ñuqanchikpis chayllatataq munanchik. Chayrayku, tukuy sunquwan runata yanapana tiyan, Jehová Diosman qayllaykunankupaq, ñuqanchikjinataq Diosta munakunankupaq.