Tukuy imata ‘allin willaykunarayku’ ruwana
1. ¿Imata ruwananchikpaqtaq kallpachakunchik?
1 Apóstol Pabloqa, allin willaykuna, runap allinninpaq kasqanta yachasqanrayku, mana saqispa willanallantapuni yacharqa (1 Cor. 9:16, 19, 23). Ñuqanchikpis, runa masinchikpa allinninta munasqanchikrayku, runaman allin willaykunata willanapaq kallpachakunchik.
2. Tukuy runasman willananchikpaq, ¿imatá ruwananchik kanman?
2 ¿Mayniqpitaq, ima horastaq runas sumaqta uyariwasunman? Challwata japʼiq runaqa, mana mayniqpichus paypaq astawan allin, chayniqpichu anzuelonta yakuman chuqaykun, manaqa, mayniqpichus astawan challwasta japʼiyta atinman chayman anzuelonta chuqaykun. Kikillantaq ñuqanchikpis, ‘runa japʼiq challwiris’ kanchik, chayrayku maypichus willanchik chaypi, ichá wak horapi runasman willaq risunman, jinamanta “tukuy laya challwasta” japʼinapaq, nisunman, tukuy runasman willanapaq (Mat. 4:19; 13:47). Sutʼiyayta chayri tardenpi callespi willaq riyta, ¿atisunmanchu? Apóstol Pabloqa, mayniqpichus kachkasqanpi, “imaynamantapis” tukuy runasman willananpaq kallpachakurqa (Hech. 17:17; 20:20, 24, Dios Parlapawanchej).
3, 4. ¿Imaynamantá runa masinchikta llakiyninmanjina allin willaykunawan sunquchasunman?
3 Llakiyninkumanjina allin willaykunawan sunquchana. Challwirisqa, ima laya challwatachus japʼiyta munasqankumanjina, wak imatañataq anzuelonkuman churanku. Ñuqanchikri, ¿imaynamantá runa masinchikta llakiyninmanjina allin willaykunawan sunquchasunman? Qallarinapaq, ima chʼampaykunamantachus achkha runas llakikusqankumanta parlarina, chantá runa masinchik imatachus niwasqanchikta, allinta uyarina (Sant. 1:19). Imamantachus astawan llakikusqanta ninawanchikpaqtaq tapuykunata ruwana (Pro. 20:5). Chaymantataq llakiyninmanjina, allin willaykunawan sunquchasunman. Apóstol Pabloqa, “tukuypaj imaynachus kasqankumanjina” tukurqa (1 Cor. 9:22). Arí payqa, runap sunqunman chayananpaq, imaynachus runas kasqankumanjina willarqa.
4 “Allin kawsaymanta sumaj willay[kuna]ta” willaspaqa, ¡mayta kusikunchik! (Isa. 52:7.) Chayrayku allin willaykunata tukuy runasman willayta munasqanchikrayku, tukuy imata ruwanachik (1 Cor. 9:23).