Tapuykuna
◼ Tantakuykunapi yachachikusqanta allinta uyarinanchikpaq, ¿imaynatá tukuypis yanapasunman? (Deu. 31:12.)
Tantakuykunapi Jehová yachachiwasqanchikrayku, tantakuykunaman niraq qallarichkaptin chayananchik tiyan, jinamanta Diosta jatunpaq qhawasqanchikta, tantakuykunata allinpaq qhawasqanchikta ima rikuchisunchik. Allin kanman ñawpaqpi tiyarikunanchik, jinamanta wawasniyuq kaqkuna, wakin kuti tantakuy qallarisqanmantaña chayamuqkuna ima, qhipapi kaq tiyanaspi tiyakunankupaq. Niraq tantakuy qallarichkaptin celularesninchikta mana sinchita sonananpaqjina churananchik tiyan. Wakkunap allinninkuta maskʼaspaqa, tantakuypi imatachus yachachikuchkasqanta tukuypis allinta uyariyta atisunchik (Ecl. 5:1; Fili. 2:4).
Bibliamanta yachakuqkuna tantakuykunaman jamuyta qallarinku chayqa, paykunata riqsiq juk hermano paykunawan khuska tiyarikunan may allin kanman, astawanraq wawitasninkuta qhawanankupaq yanapata necesitaptinku. Ichá paykunaqa, ñawpaq kutillataraq tantakuykunaman jamuchkasqankurayku aswan qhipallapi tiyarikuyta munanqanku, jinamanta wawitasninku mana uyariqta saqiptinku kʼamirinankupaq jawaman lluqsiyta atinallankupaq (Pro. 22:6, 15). Yachakuqkunaqa, wawitasninkurayku mana wak salaman tiyakuq rinankuchu tiyan, wawitasninku chay salapi chʼaqway atikullasqanta mana yuyanankupaq. Tantakuypi wawitasninku mana kayta atiptinku, allin kanman tatanku chayri mamanku jawaman apanan, imatachus necesitasqanta qhawariytawan chayri kʼamiriytawan tantakuyman watiqmanta pusaykunan ima.
Yanapaqkunaqa, tantakuykunapi yachachikuchkasqanta tukuypis allinta uyarinankupaq yanapanku. Paykunaqa, wawitasniyuq kaqkunata, tantakuy qallarisqanmantaña chayamuqkunata ima, allinllamanta tiyanasman pusanku. Wakin kuti ima chʼampaypis kaptin allin yuyaywan allinchanku. Mayqin wawallapis tantakuypi kaqkunata yachachikuchkasqanta mana uyariqta saqiptin, yanapaqkunaqa kʼachamanta tatasninta wawitankuta chʼinyachinankuta ninku.
Rikunchikjina, tukuypis tantakuykunapi Jehová Diosmanta, Jallpʼata juk paraisoman tukuchinanmanta ima yachachikusqanta allinta uyarinanchikpaq yanapayta atinchik (Heb. 10:24, 25).