Kay llamkʼayqa kusichiwanchik
1. ¿Imaynatá kay tiempopi runasta yanapakuchkan?
1 Ñawpa tiempopi milagrosniqta thañichisqankuqa, runaspa sunqunta mayta kusichirqa (Luc. 5:24-26). Kikillantataq kay tiempopi, runas Diosta riqsichkasqankuqa kusichiwanchik (Apo. 22:1, 2, 17). Runas, Bibliamanta yachakusqankurayku, espíritu santop yanapayninwan kawsayninkuta tikrachisqankumanta ñawiriyqa, ¡mayta kusichiwanchik! Chantapis Bibliamanta yachakuq ñawpaqman rinanpaq yanapakuyqa astawanraq kusichiwanchik.
2. ¿Imayna sientekunchik juk runata Bibliamanta yachachispa?
2 ¿Imataq Diospa sutin? ¿Imaptintaq Diosninchik runas ñakʼarinankuta saqin? ¿Imatataq Diospa Reinon runasrayku ruwanqa? Kay tapuykunasman kutichispaqa kusikunchik, yachakuq Bibliamanta yachakusqanmanta kusirikuptin astawanraq kusirikunchik (Pro. 15:23; Luc. 24:32). Yachakuqqa, yachakusqanmanjina Diospa sutinta uqhariyta qallarin, maychus kaqta pʼachallikun, saqra kawsayninta saqin, yachakusqanmantapis wakkunawan parlarin. Diosman qukunankama, bautizakunankama wiñallaptinpuniqa hermanonchikman tukunqa, kay llamkʼaypitaq yanapakunqa. Ajinata ruwasqantaq sunqunchikta kusichin (1 Tes. 2:19, 20).
3. ¿Imastá ruwasunman Bibliamanta yachachiyta qallarinapaq?
3 ¿Bibliamanta yachachiwaqchu? Kay kusiy ruwaypi yanapakuyta munanki chayqa, juk runallatapis Bibliamanta yachachinaykipaq Jehová yanapasunanta mañakuy, chantapis mañakusqaykimanjina ruwanaykipaq kallpachakuy (1 Juan 5:14). Maypichus, ima horatachus runasta taripanaykipaq willamuq riy. Atikusqanmanjina Bibliamanta yachachinaykipaq kallpachakuy (Ecl. 11:6). Diosmanta yachakuyta munaqta taripaspa, chiqa yachachiykunata mujutajina sunqunpi tarpuy, qarpanaykipaqtaq kutillaypuni (1 Cor. 3:6-9).
4. ¿Imaraykutaq runasta usqhayllata yachachimuna tiyan?
4 Chiqa yachaymanta may chhika runasraq yarqhasqas, chʼakisqas ima kachkanku. Jehovata riqsinankupaq, ¿pitaq Bibliamanta yachachispa yanapanqa? (Mat. 5:3, 6.) Tukuy sunquwan yanapakuna willaspa, yachachispa ima, manaraq cosecha tukukuynin chayamuchkaptin (Isa. 6:8).