Wawasniykichikta allin willaqkuna kanankupaq wakichiychik
1. Salmo 148:12, 13 nisqanmanjina, ¿imatá ruwanankupaq tatasta yanapan?
1 Jehovaqa, wawasta payta yupaychanankupaq waqyarin (Sal. 148:12, 13). Tatasqa mana chiqa yachachiykunallatachu, Diospa kamachiykunasnillantachu wawasninkuman yachachinku, manachayqa allin willaqkuna kanankupaq ima wakichinku. ¿Imaynatá pisimanta pisi kayta ruwankuman?
2. Tatas ruwaykunasniykichikwan, ¿imaynatá wawasniykichikta yachachiwaqchik?
2 Ruwayniykiwan yachachiy: Juez Gedeonqa 300 soldadosninman nirqa: “Qhawawankichej; imatachus noqa ruwasaj, kikillantataj qankunapis ruwallaychejtaj” (Jue. 7:17). Wawasqa tatasninkuta qhawaspa, kikinta ruwanku. Juk tata, chʼisisninpi llamkʼan, sábado pʼunchayta wasinman chayaspa samarikunanmantaqa, Diosmanta willaq wawasninta pusan. Chayta ruwaspaqa Diospa Reinon ñawpaqman churana kasqanta wawasninman yachachichkan (Mat. 6:33). Diosmanta mañakusqaykita, Bibliata ñawirisqaykita, tantakuypi tapuykunaman kutichisqaykita, willaq risqaykita ima, ¿kusiywan ruwachkasqaykitachu wawasniyki qhawachkanku? Pantaq runa kasqaykiraykutaq kaykunasta ichá mana juntʼayta atillankichu chaywanpis, wawasniyki imaynatachus sunqu kʼajaywan Diosta yupaychachkasqaykita qhawaspa, kikinta ruwayta munanqanku (Deu. 6:6,7; Rom. 2:21, 22).
3. Wawas espiritualmente wiñanankupaq, ¿imaynatá tatas yanapankuman?
3 Diospa llaqtanpi astawan llamkʼanapaq: Tatasqa wawasninkuman puriyta, parlayta, pʼachallikuyta ima, mana saykʼuspa yachachinku. Wawas wiñasqankumanjina juk ruwayta amañaptinkuqa, tatasninqa wak ruwaykunatañataq yachachinku. Tatas cristianos kaptinkuqa, wawasninkuta wiñasqankumanjina, yachakusqankumanjina espiritualmente wiñanankupaq yanapallankutaq (1 Cor. 9:26). Wawasniykita tapuykunaman mana ñawirispalla kutichinankupaq, Diosmanta Parlayta Yachanapaq tantakuypi umallirichinanku kaptin sapallanku wakichikunankupaq, ¿yachachichkankichu? (Sal. 35:18.) ¿Wawasniykita willanankupaq, yachachinankupaq ima, yachachichkankichu? ¿Bautizakunankupaq, precursorjina llamkʼanankupaq yuyaychachkankichu? May kusisqas Diosmanta willaq hermanoswan masichakunankupaq, ¿yanapachkankichu? (Pro. 13:20.)
4. ¿Imaynatá wawasta yanapan, tatas juchʼuymantapacha Diosta yupaychanankupaq yachachisqanku?
4 Salmista nirqa: “Diosniy, qan yachachiwarqanki wayna kasqaymantapacha. Kunankamapis willashallanipuni jatuchaj imasta ruwasqaykimanta”, nispa (Sal. 71:17). Wawasniykita juchʼuymantapacha Diosmanta sumaq willaq kanankupaq, yachachiptiykiqa, machuyanankukama sinchita sayanqanku (Pro. 22:6).