Bibliamanta Yachaqanapaq tantakuypi
1. Bibliamanta Yachaqanapaq tantakuypi, ¿imastá ukhunchasunchik?
1 Marzo killamanta 14 pʼunchaymantapacha Bibliamanta Yachaqanapaq tantakuypi ¿Runasta Dios Munakunchu?, nisqa folletomanta yachakuyta qallarisunchik. Chayta tukuytawantaq julio killapi 25 pʼunchaymantapacha Jehovamanta sutʼinchaqkuna, ¿imatá yachaywasipi yachakuymanta ninku?, nisqa folletomanta yachakullasunchiktaq. Kay folletosqa Jehovaman astawan qayllaykunapaq, allinta willanapaq ima, sumaqta yanapawasunchik.
2. ¿Runasta Dios munakunchu?, nisqa folletopi, ¿imasmantá yachakusun?
2 ¿Runasta Dios munakunchu? Kay folletoqa llampʼu sunqu runasta yanapan, Diosninchik may munakuyniyuq kasqanta, ñuqanchikrayku interesakusqanta ima, yachanqanku. Chantapis Dios imaptintaq runas ñakʼarinankuta saqisqanta sutʼinchan. Kay folletoqa Dios kasqantapuni, runas munayninkumanjina akllayta atisqankuta ima sutʼinchan. Tukukuy rakʼiykunasninpitaq musuq pachapi allin kawsaymanta suyakuyta quwanchik, chantapis Jehovap llaqtanwan khuska llamkʼanallapaqpuni kallpachawanchik.
3. Jehovamanta sutʼinchaqkuna, ¿imatá yachaywasipi yachakuymanta ninku?, nisqa folletopi, ¿imasmantá yachakusun?
3 Jehovamanta sutʼinchaqkuna, ¿imatá yachaywasipi yachakuymanta ninku? Kay folletoqa tatasta, wawasta ima cristianosjina imastachus yachaywasipi mana ruwayta atisqankumanta parlanankupaq yanapanqa. Jinamanta yachaywasipi yachachiqkunaqa wawasta entiendeyta, yanapayta ima, atinqanku. Chantapis suyupaq takiymanta, banderata yupaychaymanta, raymikunamanta, jatun yachaywasipi yachakuymanta ima, Bibliap nisqanmanjina sutʼinchan. Yachachiqkunamantaq, Jehovamanta sutʼinchaqkuna imatachus wawasninkuman yachachisqankuta, sutʼinchan. Kay yachaqanasqa ‘wakichisqapuni kanapaq, Diospi atienekuspa imatachus suyakusqanchikmanta sutʼita kutichinapaq. Yachayta munaqkunaman’ yanapawasun (1 Ped. 3:15).
4. Kay folletos yanapanawanchikpaq, ¿imatá ruwana tiyan?
4 Allinta yachakunaykipaqqa ñawpaqmanta ukhunchariwaq, qutuchakuypi tapuykunasman kutichinaykipaqtaq wakichikuy. Ni mayqin tantakuyman riyta saqiychu, chantapis sapa yachaqana imaynatachus willaypi yanapasusqanpi tʼukuriy. Kay folletosmanta yachakusqanchikqa, runasman Diospa Reinonmanta yachachinapaq kallpachanawanchikta munanchik (Hech. 28:23).