Diospa Llajtanta Kamachejkunaj cartanku
Munasqa hermanos:
Jehovaj cheqa sonqo kamachisninman pikunachus Jallpʼantinpi qanchis millonesmanta astawan kurajña kanku, ¡may kusiywan, watejmanta uj cartata apachimuyku! Waj suyumanta Jehovamanta sutʼinchaj hermanota rejsispa, ¿imayna sientekunkichej? ¿Chay ratucharí munakuyniykichejta rikuchinkichej? (Juan 13:34, 35.) Kay watamanta anuariopi ashkha suyusmanta cheqa sonqo hermanospa experienciasninkuta leespa, ¡maytachá kusikunkichej!
Yaqha tukuyniykichej sapa semana Familiapi Diosta Yupaychanapaj Chʼisi tantakuyta ruwashasqaykichejta yachayku. Tatasqa, wawitasninku chay tantakuywan miskʼichikunankupaj tukuy imata ruwashanku (Efe. 6:4). Casarasqaspis, Bibliata khuska ukhunchasqankurayku, astawan ujchasqas kashanku (Efe. 5:28-33). Familiapi chayri sapallapi Bibliata sumajta ukhunchanapaj tiempota orqhosqanchejqa mayta yanapawanchej (Jos. 1:8, 9).
Kay qhepa wataspi jatuchaj llakiykuna kasqanpi, mayta ñakʼarejkunamanta mayta llakikuyku. Chantapis chay llakiykunapi tukuy sonqo yanapakojkunata mayta agradecekuyku (Hech. 11:28-30; Gál. 6:9, 10). Chantapis qankunamanta wakenqa, Dorcas jina “sumaj ruwanasta” ruwashankichej qotuchakuymanta necesitajkunata yanapanaykichejpaj (Hech. 9:36). Necesitajkunata yanapasqaykichejmanta, Jehová mayta tʼinkasunaykichejta yuyarikuychej (Mat. 6:3, 4).
Wakin suyuspi runasqa, willayninchejta sayachiyta munaspa, suyuj leyesninta munasqankuman jina apaykachanku, chayraykutaj ashkha hermanos Diospa Reinonmanta willamunankupaj jarkʼasqas kanku (Sal. 94:20-22). Chaywanpis Jesús qhatiykachasqas kanankuta nisqanman jina, mana manchachikuspa muchushanku, Jehovapitaj atienekunku (Juan 15:19, 20). Qankunapaj Diosmanta mañakullaykupuni, “wakichisqapuni ka[naykichejpaj], [...] imatachus suyakusqaykichejmanta sutʼita kutichinaykichejpaj[pis]” (1 Ped. 3:13-15).
Chantapis ashkha hermanos, Satanás khuchichakuyman tanqajtinpis, Diospa ñaupaqenpi llimphu kasqallaykichejmantapuni mayta kusikuyku. Mana jaykʼaj jina tukuynejpi khuchichakuy mayta rikukojtinpis qankunaqa, “kallpachaku[llaychejpuni] Señorpi, jatun atiynimpitaj” (Efe. 6:10). “Diospa qosqan maqanakuna pʼachawan” pʼachallisqa kashankichej “Kuraj Supay urmachiyta munasojtiykichej, chaykunawan sinchʼita sayanaykichejpaj” (Efe. 6:11, 12). Mana ni jaykʼaj qonqaychejchu, ñakʼariypi sinchʼita sayasqaykichejwan, Jehová Diosninchejqa churanakoj Satanasman llulla kasqanta rikuchishasqanmanta (Pro. 27:11).
Chantapis may kusiwan willayta munayku, 2011 watapi mana jaykʼaj jina Jesuspa wañuyninta yuyarinapaj tantakuypi 19.374.737 runas kasqankuta. Chaytaj qankuna abril killapi precursor auxiliar jina llankʼasqaykichejrayku karqanku. Diospa kamachisnin Reinonmanta willasqankoqa, kay pachaj tukuy kʼuchusninpi uyarikorqa (Rom. 10:18). Chay killapeqa, 2.657.377 precursores auxiliares karqanku, ashkha hermanostaj Diospa Reinonmanta astawan willamunankupaj kallpachakorqanku. Chaytaj mayta kusichiwayku (Sal. 110:3; Col. 3:23, 24).
Jehovaj yanapayninwantaj qayna wata 263.131 runas bautizakorqanku. Mayta agradeceyku kay Apocalipsis 22:17 nisqanta juntʼaysiwasqaykumanta chay versiculopi nin: “Espirituwan, noviawan ninku: Jamuy, nispa. Chayta uyarejpis nillachuntaj: Jamuy, nispa. Chʼakichikojqa jamuchun, munajtaj, kawsay yakumanta qhasilla ujyachun”. Chantapis 2011 watapi jatun tantakuypi Diospa Reinonmanta yachachiykunata yachakusqanchejrayku, astawan Diosmanta “Reinoyki jamuchun” nispa mañakunchej. Chantapis apóstol Juan jina ninchej, pichus Jesucristota “cheqamanta usqhayta jamushani” nejta uyariytawan nerqa: “Ajina kachun. Arí, jamuy Señor Jesús” (Apo. 22:20).
Chaykamataj, ama qonqaychejchu sapa ujniykichejta mayta munakusqaykuta, imaraykuchus qankunaqa, Jehová Tatanchejta ‘cheqamanta ruwasqasniykichejwan munakusqaykichejta’ rikuchishankichej (1 Juan 3:18).
Hermanosniykichej,
Diospa Llajtanta Kamachejkuna
[5-8 paginaspi tabla]
JEHOVAMANTA SUTʼINCHAJKUNA 2011 WATAPI RUWASQANKUMANTA WILLAYKUNA
(Publicacionpi qhawariy texto originalta)
2010 watapi septiembre killamanta 2011 watapi septiembre killakama, Jehovamanta sutʼinchajkuna 173.000.000 (173 millones) dolaresta gastanku, precursores especiales, misioneros, superintendentes viajantes ima, ruwayninkuta juntʼanankupaj.
Tukuy pachantinpi Señorpa Cenanpi mikhojkuna: 11.824
[9, 10 paginaspi sutʼinchaynin]
Qhelqanapaj