Yachakuyta munajkunata tarinapaj yanapas
1. ¿Imatá ruwasunman Bibliamanta yachakuyta munajkunata tarinapaj, imaraykutaj?
1 Bibliamanta yachachinaykipaj niraj pillatapis tarinkichu chayqa, kallpachakullaypuni. Imaraykuchus Jehovaqa, munayninta mana saykʼuspa ruwajkunata bendicen (Gál. 6:9). Kunantaj yachakuyta munajta tarinaykipaj yanapasta qhawarina.
2. ¿Imatá ruwasunman Bibliamanta yachachiyta qallarinapaj?
2 Bibliamanta yachakuytachus manachus munasqanta tapuriy. Ashkha runas, Torremanta Qhawaj, ¡Despertad!, revistasta ima saqesqanchejta yachaspapis, Bibliamanta yachachisqanchejtataj mana yachankuchu. Chayrayku wasimanta wasi willashaspa tapuriwaj: “¿Bibliamanta yachakuyta munawajchu?”, nispa. Chantá revistasta saqenki chay runasta, tapurillawajtaj. Mana munajtinkutaj publicacionesta saqellaypuni. Uj hermano may unayña uj qhariwarmiman revistasta saqej. Uj pʼunchaytaj tapurerqa: “¿Bibliamanta yachakuyta munawajchejchu?”, nispa. Mana creenanpaj jinataj paykunaqa yachakuyta munarqanku, kunantaj bautizasqasña kanku.
3. ¿Imaraykú mana yuyanachu, tantakuykunaman tukuy jamojkuna Bibliamanta yachakushasqankutaña?
3 Tantakuykunaman jamojkunata tapuriy. Ama yuyaychu tantakuyman tukuy jamojkuna Bibliamanta yachakushasqankutaña. Uj hermano nin: “Yachachisqay runasmanta, khuskan kurajtapuni tantakuykunapi tarerqani”, nispa. Uj warmi, 15 watastaña bautizasqa wawasninwan tantakuykunaman risharqa. Tantakuy qallarishantin chayaj, tukukusqantawantaj ripoj. Uj kuti uj hermana payta “¿Bibliamanta yachakuyta munawajchu?”, nispa taporqa, paytaj “arí”, nispa kuticherqa, tiemponmantaj bautizakorqa. Hermanaqa, “¡mayta llakikuni 15 watasmantaraj chayta tapusqaymanta!”, nispa nerqa.
4. Bibliamanta yachakuyta munajkunata tarinapaj, ¿imastá ruwasunman?
4 Bibliamanta yachachiyta munasqaykita wajkunaman willariy. Uj hermana, waj hermanas Bibliamanta yachachej rejtinku, paykunawan rin. Yachachiyta tukusqankutawantaj hermanaqa, yachachej hermanata uj tapuyta ruwajta saqenanta nin. Chantá yachakojta ichá Bibliamanta yachakuyta munajkunata rejsisqanta tapurin. Chantapis Bibliamanta yachakuyta munajkunaman kutispa Yachachin librota saqeshaspa, chay librowan qhepakuyta munajkunata rejsisqankutachus manachus tapurisunman. Chantá waj hermanos chayri precursores Bibliamanta yachakuyta munajkunaman mana kutiyta atillankuchu. Chayrayku Bibliamanta yachachiyta munasqaykita wajkunaman willariy.
5. ¿Imaraykutaj allin kanman mana testigo qosata chayri warmita Bibliamanta yachakuyta munasqantachus manachus tapuriynanchej?
5 Mana creyente qosata chayri warmita tapuriy. ¿Qotuchakuyniykipi hermanosmanta mayqellanpis mana testigowan casarasqa kanchu? Wakenqa, qosanku chayri warminku paykunawan Bibliamanta parlarinankuta mana munankuchu, chaywanpis wajkunawan yachakuyta munallankuman. Chayrayku allin kanman ñaupajta testigo qosawan chayri warmiwan parlarinanchej, maykʼajchus imaynatachus parlarinanchejta.
6. ¿Imaraykutaj mañakunanchejpuni tiyan Bibliamanta yachakuyta munajkunata tarinapaj?
6 Diosmanta mañakuy. Ni jaykʼaj mañakuyta pisipaj qhawaychu (Sant. 5:16). Imaraykuchus Jehovaqa, munayninman jina mañakojtinchej uyarinawanchejta nin (1 Juan 5:14). Uj hermano Jehovamanta mañakorqa, ashkha llankʼayniyoj kaspapis Bibliamanta yachakuyta munajta tarinanpaj. Warmintaj, qosan yachakojta tarispa yanapananpaj tiempon mana kananta yuyaspa llakikorqa, astawanraj yachakoj chʼampaykunasniyoj kajtin. Chayrayku Jehovaman uj mañakuypi llakiyninta willarqa. Jehovataj mañakuyninkuta uyarerqa, iskay semanaman uj precursora Bibliamanta yachakuyta munajta tarispa, hermanota nerqa yachachinanta. Hermanoj warmin nin: “Runasman Bibliamanta yachachiyta mana atisqankuta yuyajkunaman, Diosmanta mañakunallankutapuni nini. Ni jaykʼaj yuyarqaykuchu wajkunata yachachispa kusisqa kanaykuta”, nispa. Bibliamanta yachakuyta munajta maskʼallankipuni chayqa, qanpis tarillankitaj, kusisqataj kanki runasta “kawsayman pusaj ña[nta]” rejsichispa (Mat. 7:13, 14).