Tukuy runasman willamuna
1. ¿Imatá Pablomanta yachakusunman?
1 Apóstol Pabloqa, Timoteoman yuyaycharqa: “Imachus ruwanaykita allinta juntʼay”, nispa (2 Tim. 4:5). Chaytataj mana manchachikuspa nerqa, imaraykuchus paypis 47 watamanta 56 watakama kinsa kutitaña misionero jina viajarqa. Hechos libroqa, Pablo tukuy atisqanta runaman yachachisqanta ashkha kutista nin (Hech. 23:11; 28:23). ¿Imaynatá chayta ruwasunman?
2. Wasimanta wasi willashaspa, ¿imatá ruwasunman tukuywan parlarinapaj?
2 Wasimanta wasi. Sumaj willaykunata tukuy runas uyarinankupajqa, wasinkupi tarinapaj jina horaspi willamuna tiyan. Qharistaqa tardesnin chayri semana tukukuyta wasinkupi taripasunman. Sapa wasipi ujllamanpis willanapaj kallpachakuna, chaypajtaj mana wasinkupi kajkunata waj horaspi waturisunman. Manapuni runata wasinpi tarejtinchejrí, ¿imatá ruwasunman? Cartanejta chayri telefononejta willasunman.
3. ¿Maykunaspitaj willayta atinchej?
3 Mayllapipis kashaspa. Jehovaj kamachisnenqa “yachay[ta]” tukuyman rejsichiyta munanku. Chaypajtaj “callespi, plazaspi” ima willanku (Pro. 1:20, 21). Sapa pʼunchay ruwanasninchejpi kashaspapis runaman willanchej chayqa, “Diospa Palabranta” tukuy “runasman willa[sqanchejta]” niyta atisun (Hech. 10:42; 17:17; 18:5; 20:20, 21, 24).
4. ¿Imaynatataj Diosmanta mañakuy, tʼukuriy ima tukuyman willanapaj yanapawanchej?
4 Wakin kutisqa manchali kasqanchejrayku, chayri waj imasrayku mana willayta atillanchejchu. Jehovataj chayta sumajta yachan (Sal. 103:14). Jinapi rikukuspaqa, Jehovaj yanapayninta mañakuna, ajinamanta mana manchachikuspa parlasun (Hech. 4:29-31). Chantapis Bibliata sapallanchejpi ukhunchashaspa, imaraykuchus runa sumaj willaykunata uyarinan kasqanpi tʼukurina (Fili. 3:8). Chayta ruwayqa sonqo kʼajaywan willamunapaj yanapawasun.
5. ¿Imaynatataj Joelpa profecian juntʼakunanpaj yanapasunman?
5 Profeta Joelqa, Jehovaj may jatun manchachikuna pʼunchaynin niraj chayamushajtin, llajtan mana saykʼuspa willananta nerqa (Joel 2:2, 7-9). Chayrayku tukuy atisqanchejta chay llankʼaypi yanapakuna, imaraykuchus manaña ujtawan ruwakonqañachu.