Bibliamanta yachakojkunata sumajta yachachina
1. ¿Imata ruwanankupajtaj Bibliamanta yachakojkunata yanapana tiyan?
1 Jehovamanqa pay wajyarillawajtinchej qayllaykuyta atinchej (Juan 6:44). Chaywanpis Bibliamanta yachakojkunataqa noqanchej yanaparinanchej tiyan Janaj Pachapi Tatankuman qayllaykunankupaj (Sant. 4:8). Chaypajtaj sumajta wakichikunanchej tiyan. Yachakojkunamanqa mana parrafosta leeyllatachu chayri tapuykunaman kutichiyllatachu yachachina tiyan.
2. Yachakojkunata Bibliamanta allinta yachachinanchejpaj, ¿imatá ruwana tiyan?
2 Yachakojkunata Bibliamanta allinta yachachinapajqa kayta ruwana: 1) Biblia yachachisqanta sutʼita yachachina, 2) chay yachachiykunata sonqonkupi japʼikunankupaj yanapana, 3) yanapanallataj yachakusqanman jina kausakunankupaj (Juan 3:16; 17:3; Sant. 2:26). Yachakojkunataqa ichá killasta yanapana kanqa chayta ruwanankupaj. Jinapis chay kinsa yuyaychaykunaman jina ruwajtinkoqa, Jehová Diosman astawan qayllaykonqanku, sirviytataj ajllanqanku.
3. Bibliamanta allinta yachachinanchejpaj, ¿imaraykutaj sumaj tapuykunata ruwananchej tiyan?
3 ¿Japʼeqashanchu? Yachakojkuna japʼeqashasqankutachus manachus yachanapajqa mana noqallanchejchu parlananchej tiyan, manaqa paykunata parlarichina tiyan (Sant. 1:19, 20). ¿Biblia imatachus yachachisqanta sutʼitachu entienden? ¿Entiendesqanman jinachu kutichin? ¿Yachakusqan allillanchu rijchʼan? ¿Biblia nisqanta jatunpajchu qhawan? (1 Tes. 2:13.) ¿Reparanchu kausayninta tijrachinan kasqanta? (Col. 3:9, 10.) Imatachus yachakojkuna yuyasqankuta yachanapajqa, allin yuyaywan sumaj tapuykunata ruwana tiyan, kutichishajtintaj sumajta uyarina tiyan (Mat. 16:13-16).
4. Yachakojkuna Bibliamanta wakin yachachiykunata mana allinta entiendejtinku chayri mana chayman jinachu kausakojtinku, ¿imatá ruwasunman?
4 Wakin runasqa imapichus creesqankuta, costumbresninkuta ima mana qonqayta atillankuchu. ¿Imatá ruwasunman Bibliamanta yachakoj, mana Biblia yachachisqanman jinachu kausakushasqanta rikuspa? (2 Cor. 10:5.) Diospa Palabran, espíritu santo ima sonqonpi cheqa kajta wiñachinanpaj pacienciarikuna tiyan (1 Cor. 3:6, 7; Heb. 4:12). Wakin yachachiykunata mana allinta entiendejtinku chayri mana yachakusqankuman jinachu kausakojtinku, ichá allin kanman waj yachachiykunamantañataj parlarinanchej. Yachakojkunata pacienciawan, munakuywan ima Bibliamanta yachachejtinchejqa, ichá aswan qhepaman kausayninkuta tijrachiyta munanqanku.