Sonqo juntʼasqa kana, amataj michʼakunachu

RUNASQA NINKU: “QHAPAJ KASPAQA KUSISQA KAYMAN”, NISPA. Chayrayku ashkha runasqa, qolqeyoj kanankupaj wasa pʼakikuyta trabajanku. Jinapis qolqeyoj kajkuna, ¿kusisqachu kausakunku? Chaymanta parlarina.

Uj revista nin: “Kusisqa kausakunapajqa mikhunata, ropata, tiyakunapaj uj lugarta imalla necesitanchej. Astawan qolqeyoj kaspaqa, mana aswan kusisqachu kasun”, nispa. Waj revista nillantaj: “Runataqa mana qolqechu llakiykunapi rikhurichin, manaqa qolqeta maskʼasqan”, nispa. Chay revistaj nisqanqa, Bibliaj nisqanman rijchʼakun. Bibliaqa 2000 watas ñaupajtaña nerqa: ‘Qolqeta munakoyqa, tukuy imaymana sajra kajpa saphin. Chayta munapayasqankuraykutaj, wakenqa imaymana llakiykunawan ñakʼarinku’, nispa (1 Timoteo 6:9, 10). ¿Mayqenkunataj chay llakiykuna kanku?

KAPUYNINKUMANTA LLAKIKUSPA MANA PUÑUYTAPIS ATINKUCHU. Biblia nin: “Llankʼaj runaqa pisitapis ashkhatapis mikhuspa, sumaj miskʼejta puñukun. Qhapaj runatarí kapuynenqa mana allinta puñukojllatapis saqenchu”, nispa (Eclesiastés 5:12).

MANA KUSIYTA TARINKUCHU. Qhapajkunaqa qolqeyoj kajtinkuñapis, astawan qolqeta munallankupuni. Biblia nin: “Pichus qolqeta munakojqa astawampuni munan. Qhapaj kayta munakojqa mana imawan sonqo juntʼasqa kayta atinchu”, nispa (Eclesiastés 5:10). Chantapis qolqeyoj kayta maskʼajkunaqa, familiankumanta, amigosninkumanta, Diosmantapis qonqakapunku. Chayrayku mana kusisqachu kausakunku.

QOLQENKUTA PIERDEYKOJTINKU WAQANKU, MAYTATAJ LLAKIKUNKU. Biblia nin: “Ama anchata kallpakuychu qhapajyayta maskʼaspa. [...] Chay qhapaj kayqa allinta qhawarinaykipajqa manaña kanqachu; anka irpas phuruchakuytawan phawaspa ripunku, jinallata chinkaponqa”, nispa (Proverbios 23:4, 5).

KUSISQA KANAPAJ YUYAYCHAYKUNA

KAPUWASQANCHEJWAN SONQO JUNTʼASQA KANA. Biblia nin: “Kay mundomanqa mana imayoj jamorqanchej, manallataj imatapis apasunchu. Chayrayku mikhunayoj, ropayojtaj kaspaqa, chaykunawan sonqo juntʼasqa kausakuna”, nispa (1 Timoteo 6:7, 8). Imachus kapuwasqanchejwan sonqo juntʼasqa kasun chayqa, mana thutusunchu, nitaj pitapis envidiakusunchu. Chantapis mana astawan imasta munapayasunchu. Chaytaj ashkha llakiykunamanta librawasun.

AMA MICHʼAS KANACHU. Biblia nin: “Aswan kusiy wajman qoriy, qorichikunamanta nisqaqa”, nispa (Hechos 20:35). Qorikuyta yachajkunaqa kusisqa kanku, qorisqankuwan wajkunata kusichisqankurayku. Paykunaqa mana ashkha imasniyoj kaspapis, tiempitunkuwan, kallpankuwan yanaparinku. Chayta ruwajkunaqa, aswan yapasqataraj japʼinku. Imajtinchus munasqas, respetasqastaj kanku. Chantapis sumaj amigosniyoj kanku, chay amigosninkutaj paykunawan kʼachasllataj kanku (Lucas 6:38).

RUNASTA MUNAKUNA. Biblia nin: “Aswan allin munakuypi qʼomerkunata mikhunaqa, wirayachisqa aychata chejninakupi mikhunamantaqa”, nispa (Proverbios 15:17). Ajinapunitaj, sumaj amigosniyoj kajtinchej, familianchej munakuwajtinchej ima, kusisqas kanchej. Chaymantataj aswan qhepaman parlarisun.

Sabinataqa Bibliaj yuyaychaykunasnin mayta yanaparqa. Payqa Sudamericapi tiyakun, qosantaj iskay warmi wawitasnintawan saqerparisqa. Chayrayku paykunata uywananpaj, iskay trabajosman yaykusqa, sapa diataj 4 de la mañanata sayarikoj. Sabinaqa saykʼusqa kajtinpis, Bibliata estudiayta qallarerqa. ¿Imaynatá chay yanaparqa?

Mana astawan qolqeyoj kaspapis, Sabinaj kausaynenqa niña ñaupajta jinachu karqa. Payqa aswan kusisqa karqa, Diosmanta yachakusqanrayku, yachakusqanta wajkunaman yachachisqanrayku ima (Mateo 5:3). Chantapis cristianos ukhupi sumaj amigosta tarerqa.

Arí, kapuyninkuwan sonqo juntʼasqa kajkuna, qorikuyta yachajkuna, runasta munakojkuna ima, aswan kusisqas kanku. Chaytaj rikuchiwanchej, Bibliaj yuyaychaykunasnenqa sumajpuni kasqanta.