Wajkunata munakuna

TUKUYPIS MUNASQA KAYTA MUNANCHEJ. Mana munakuy kajtenqa, qhariwarmis, familias, amigospis mana kankumanchu. Chayrayku kusisqa, allintataj kausakunapajqa, munakuy kananpuni tiyan. ¿Imayna munakuymantataj parlashanchej?

Mana qhariwarmis munanakusqankumantachu parlashanchej, manaqa waj jina munakuymanta. Chay munakoyqa, wajkunaj allinninkuta maskʼanapaj tanqawanchej, paykunarayku wañunanchej kajtinpis. Chay jina munakoyqa, Diospa yuyaychasqanman jina kashan.

Bibliaqa munakuyniyoj runamanta nin: “Munakuyniyoj runaqa pacienciayoj, kʼachataj. Munakuyniyoj runaqa mana envidiakunchu, nitaj may kasqanta yuyakunchu, nillataj jatunchakunchu. Munakuyniyoj runaqa mana pʼenqay imasta ruwanchu, mana payllapajchu imatapis maskʼan, mana usqhayllata phiñakunchu. Nitaj yuyarikullanpunichu contranpi ima sajrata ruwasqankumantapis. Munakuyniyoj runaqa mana kusikunchu mana cheqan kajmantaqa, astawanqa kusikun cheqa kajmanta. Munakuyniyoj runaqa tukuy imata aguantan, [...] tukuy imata suyan, tukuy imapi sinchʼita sayan. Munakoyqa manapuni jaykʼajpis tukukonqachu” (1 Corintios 13:4-8).

Tiempo pasasqanman jinataj astawan wiñan, runastapis “sumajta ujchan”. Munakuyniyoj runaqa pacienciayoj, kʼacha, perdonaytataj yachan (Colosenses 3:14). Chayrayku munakuyniyoj kasun chayqa, pantaj runas kaspapis wajkunawan allinta, kusisqataj kausakusun. Chayta entiendenapaj, qhariwarmi kausaymanta parlarina.

MUNAKOYQA “SUMAJTA UJCHAN”

Jesusqa casarasqas kajkunaman sumajta yuyaycharqa. Pay nerqa: “Qhareqa tatanta, mamantawan saqespa, warminman ujchaykukonqa, iskayninkutaj ujllaña kanqanku”, nispa. Chantá nillarqataj: “Diospa ujchasqantaqa, ama pipis tʼaqachunchu”, nispa (Mateo 19:5, 6). Jesusqa iskay sumaj yuyaychaykunata qorqa.

“ISKAYNINKUTAJ UJLLAÑA KANQANKU”. Casarasqas kajkunaqa, machʼawan jina kʼaskasqa kashanku. Purajmanta munakojtinkutaj, mana wasanchanakonqankuchu, nisunman ni mayqenninku khuchichakuy juchapi urmanqachu (1 Corintios 6:16; Hebreos 13:4). Qosa chayri warmi qhenchachakun chayqa, niña ñaupajta jinachu kausakunku, tʼaqanakunkumantaj. Wawasniyoj kajtinkutaj, aswan llakiyraj kanman. Imajtinchus wawasqa ni pi munakusqanta yuyankuman, juchachakunkuman chayri phiñasqalla kankuman.

“DIOSPA UJCHASQANTAQA”. Qhariwarmi kausaytaqa Jehová Diosninchej rikhuricherqa. Casarasqas chayta mana qonqajtinku, tukuy atisqankuta ruwanqanku khuskallapuni kanankupaj. Problemasniyoj kajtinkutaj, mana chay rato tʼaqanakonqankuchu. Chantapis sinchʼita munanakusqankurayku, ima chʼampaytapis khuska atipanqanku, kallpachakonqankutaj allinta kausakunankupaj.

Tatamama mayta munanakojtinku, wawasqa kusisqas kanku. Jessica sutiyoj sipas jinata nerqa: “Tataywan mamaywan mayta munanakunku, respetanakunkutaj. Tatay imatapis niwajtiyku, mamayqa tataypa nisqanta respetan. Chayta rikuspa, mamay jina kayta munani”, nispa.

Diosqa may munakuyniyoj. Biblia nin: “Diosqa munakuymin”, nispa (1 Juan 4:8). Chayraykuchá Biblia, Jehová Diosmanta “kusikuyniyoj” Dios kasqanta nin (1 Timoteo 1:11). Noqanchejpis Dios jina munakuyniyoj kasunchej chayqa, kusisqas kasun. Efesios 5:1, 2 niwanchej: “Diospa munasqa wawasnin kaspa, pay jina ruwaychej. Jinallataj munakuypi puriychej”, nispa.