Respetowan parlayqa, ladrillosta ujchanapaj mezcla jina.
QHARIWARMISPAJ
3 Respetanakuychej
¿IMA NIYTA MUNAN?
Respetanakoj qhariwarmisqa munanakunku. Mana uj yuyayllaman chayajtinkupis, mana paykunallapichu yuyanku. Casarasqasta yanapaj libro nin: “Respetanakoj qhariwarmisqa mana munayninkuwan llojsinkuchu. Astawanpis uyarinakunku, imachus sapa ujpa allin kasqanpitaj piensarinku, chaytataj ruwanku”, nispa.
BIBLIA NIWANCHEJ: “Munakuyniyoj runaqa”, “mana payllapajchu imatapis maskʼan” (1 Corintios 13:4, 5).
Miqueas nin: “Señoraytaqa respetani payta sumajpaj qhawaspa. Chayrayku kallpachakuni sonqonta mana nanachinaypaj, allinta kausakunaykupajpis”, nispa.
¿YANAPAWANCHEJCHU?
Respeto mana kajtenqa, casadosqa sonqota nanachinapaj jina parlanakunkuman, millay palabrastapis oqharinkuman. Chay kajtintaj divorcioman chayankuman. Chayta ninku yachajkuna.
Brian nin: “Chanzapi jinallapis warminchejmanta mana allintachu parlanchej chayqa, sonqonta nanachisunman. Warminchejtaj niña tukuy sonqochu parlapayawasun”, nispa.
KAYTA RUWAWAJCHEJ
PIENSARIY
Uj semanata allinta qhawarikuy imastachus ruwasqaykita, parlasqaykita ima.
¿Mashkha kutistataj qosaykej chayri warmiykej pantasqasninta qhawararqanki? ¿Mashkha kutistataj allinta ruwasqanta nerqanki?
¿Imaynamantá payta respetarqanki?
PARLARIKUYCHEJ
¿Tukuy imapichu respetanakunchej?
¿Imata ruwaspataj chayri imata nispataj mana respetanakunchejchu?
YUYAYCHAYKUNA
Uj listapi anotaychej, imaspichus respetasqa kayta munasqaykichejta. Chantá chayta jaywanakuychej. Sapa ujtaj, chay listaj nisqanta juntʼaychej.
¿Imastaj qosaykimanta chayri warmiykimanta gustasunki? Chayta uj listapi anotaytawan, payman agradecekuy.
Megan nin: “Noqaqa kallpachakuni, qosayta jatunpaj qhawanaypaj, kusichinaypaj ima. Ajinapi payta respetani. Wakin kutisqa juchʼuy imaspipis qosanchejta respetasunman”, nispa.
Ichapis qanqa qosaykita chayri warmiykita respetasqaykita ninki. Jinapis pay respetasqaykita reparanan tiyan.
BIBLIA NIWANCHEJ: “Pʼachallikuychej: khuyakuywan, munakuywan, kʼacha kaywan, kʼumuykukoj sonqo kaywan, llampʼu sonqoyoj kaywan, pacienciawan ima” (Colosenses 3:12).