Ricardowan Andreswan

Bibliaj yuyaychaykunasnenqa runasta yanapan kausayninkuta cambianankupaj. Kunantaj qhawarina imaynatachus Ricardota, Andrestawan yanapasqanta.

RICARDO. 15 watasniyoj kashaspa, uj pandillawan purerqani. Jovenllaraj kasqayraykutaj chay pandillamanta amigosniy jina kausayta qallarerqani. Munarqanitaj carcelpi 10 watata wisqʼasqa kayta. Imajtinchus tiyakorqani chaypeqa, carcelmanta llojsimojkunata respetaj kanku. Noqapis respetasqa kayta munarqani.

Noqaqa ashkha warmiswan purej kani, drogakoj kani, pitapis maqarpayllata munaj kani. Uj chʼiseqa manchayta baleanakorqayku, piensarqanitaj wañuchinawankuta, jinapis ayqekorqani. Chantá allinta qhawarikorqani imatachus kausayniywan ruwashasqayta, imatatajchus ruwayta munasqaytawan. Jinallapitaj cambianayta nikorqani, manataj yacharqanichu pichus yanaparinawanta.

Casi tukuynin familiaresniy problemasniyoj karqanku, nitaj kusisqaschu kausakorqanku. Jinapis ujnin tioypa familianqa kʼachas karqanku, Bibliaj nisqanman jinataj kausakorqanku. Paykunaqa ñaupajtaña yachachiwarqanku Diospa sutin Jehová kasqanta. Chayrayku chay baleanakumanta ayqeytawanqa, Jehová Diosmanta mañakorqani. Tʼukunapaj jinataj, qʼayantinpacha Jehovaj testigon visitawarqa, Bibliamantataj yachachiwarqa.

Jinallapitaj chay pandillapi kasharqani chay amigosniy wajyamuwarqanku. Paykunaqa mayta munarqanku paykunallawanpuni kanayta, chaytaj mayta llakichiwarqa. Sonqoy nanawajtinpis manaña paykunawan kanayta nerqani. Astawanqa Bibliamanta yachakullaytapuni munarqani. Chaymantapachataj kausayniyqa cambiarqa, kusisqataj kani.

Ñaupaj wataspi carcelman 10 wataspaj yaykuyta munarqani respetasqa kanaypaj. Bibliamanta yachakuytawantaj Diosmanta mañakorqani 10 watasllatapis paymanta runasman yachachinaypaj yanapanawanta, imaynatachus noqata yanapawarqa ajinata. Diostaj mañakusqayta uyariwarqa, imajtinchus runasta yanaparqani paymanta yachachispa 17 watasta. Carcelmanqa ni jaykʼaj yaykorqanichu.

Chay pandillamanta wakin amigosneyqa carcelpi kashanku, wakintaj wañunkuña. Maytapuni agradecekuni familiaresniy Bibliaj nisqanman jina kausakunankupaj kallpachakusqankumanta. Paykunataqa mayta respetani, nitaj ni mayqen pandillerotapis ajinata respetarqanichu. Astawantaj Diosman mayta agradecekuni sumajta kausakunaypaj yanapawasqanmanta.

ANDRÉS. Tiyakorqani chaynejpeqa drogasta vendej kanku, wañuchinakoj kanku, qolqerayku khuchichakoj kanku, terroristastaj kaj kanku. Tatayqa borracho karqa, cocaina vicioyojtaj. Paywan mamaywanqa sapa kuti chʼajwaj kanku, maqanakojtaj kanku.

Noqaqa wawallaraj kashaspa tomayta, drogakuyta ima qallarerqani. Chantapis callellapi sayaj kani suwaspa, chay suwasqaytataj vendespa. Aswan qhepamantaj tatayqa noqawan kayta munaspa drogasta, contrabandotawan vendeyta yachachiwarqa. Pisi tiempollapi ashkhata qolqechakorqani. Uj diataj wasiypi kashajtiy policías japʼiwarqanku, uj runata wañuchiyta munasqaymanta. Chayraykutaj 5 watapaj carcelman wisqʼaykuwarqanku.

Carcelpitaj uj paqarin presosman niwarqayku: “Jehovaj testigosnin parlarisonqachej”, nispa. Chaypi imatachus niwasqaykoqa allin rijchʼawarqa. Chayrayku Bibliamanta yachakuyta qallarerqani. Jehovaj testigosnenqa Bibliaj yuyaychaykunasninta sutʼita, allintataj yachachiwarqanku.

Chayrayku chay rato repararqani cambianay kasqanta, chaypajtaj yanapata necesitasqayta. Astawantaj yanapata necesitarqani, carcelmanta kajkuna Bibliamanta yachakushasqayta mana allinpajchu qhawasqankurayku. Chayrayku Jehová Diosmanta kallpata, yuyayta ima mañakorqani. Paypa yanapanwantaj Bibliamanta yachakushasqaymanta waj presosman parlariyta aterqani.

Carcelmanta llojsinpushaspaqa mancharisqa kasharqani, chayllapitaj qhepakuyta munarqani. Carcelmanta llojsinpushajteyqa wakin presos makinkuwan “tinkunakama” nimuwarqanku. Wakintaj: “Allillanta kutipuy pastorcito”, nispa niwarqanku.

Mana Jehová Diosmanta yachakuyman karqa chayqa, kausayniyqa llakiychá kanman karqa. Chayrayku mayta Jehová Diosman agradecekuni munakuwasqanmanta, yanapawasqanmanta ima.a