Diosman qayllaykunapaj
Kay revistaj kinsa paginanpi yachakorqanchej jina, ashkha runas Biblia Diospa palabranpuni kasqanta ninku. Leerispa, chayman jinataj kausakuspaqa reparanku Diosman qayllaykuyta atisqankuta, kusisqataj kausakuyta atisqankuta.
Biblia nisqanman jina ‘Dios jina yuyaj runaqa’ kusisqa kausakun (1 Corintios 2:15). Runa jinalla yuyaj runataj payllapi atienekun. Chaywanpis Dios jina yuyaj runaqa, Diospa kamachiykunasninman jina kausakun (Efesios 5:1).
SUYAKUYNIYOJ KANA
BIBLIAJ YUYAYCHASQAN: “Sichus ima llakiypi rikhurispa llawchʼiyawaj chayqa, ajinamanta rikuchinki kallpayki pisi kasqanta” (Proverbios 24:10).
¿IMA NIYTA MUNAN? Llakisqalla kaspaqa mana problemasninchejta atipayta atillanchejchu. Chaywanpis suyakuyniyoj kaspaqa ñaupajllamanpuni rinchej, reparanchejtaj problemasninchejqa mana wiñaypajchu kasqanta. Llakiykunapi kashaspapis kusisqa kayta atisunman.
YUYAYCHAYKUNA. Allin imas kananpi yuyana. Imachus kananpi llakikunamanta chayri tukuy ima allinpuni llojsinanta suyanamantaqa, imatachá ruwayta munashanchej chayta juntʼanapaj kallpachakuna. Chaywanpis kausayninchejpi imapis kanqapuni (Eclesiastés 9:11). Jinapis casi tukuy ima ruwasqanchej allinpuni llojsin. Tarpoj runamanta parlaspa Biblia jinata nin: “Tutamanta mujuta tarpunki, chʼisiyaykuytapis ama tiyaykullaychu, imaraykuchus mana yachankichu mayqenchus aswan allin kananta, kaychus, jaqaychus, chayri iskayninchus allin kananta”, nispa (Eclesiastés 11:6).
IMASTACHUS YACHAYTA MUNASQANCHEJTA MASKʼANA
BIBLIAJ YUYAYCHASQAN: “Palabraykeqa cheqapuni” (Juan 17:17).
¿IMA NIYTA MUNAN? Bibliaqa kutichin imastachus runas tapukusqankuman. Runasqa kaykunata yachayta munanku:
¿Maymantá rikhurimunchej?
¿Imapajtaj kausanchej?
¿Maymantaj wañuspa ripunchej?
¿Imapajtaj Dios ruwawarqanchej?
May chhika runasqa kay tapuykunaman, waj tapuykunamanwan Bibliapi kutichikusqanta tarispa, aswan kusisqas kanku.
YUYAYCHAYKUNA. Imatachus Biblia yachachisqanta yachanaykipajqa qanpuni Bibliata leeriy. Jehovaj testigosnintaj Bibliata entiendenaykipaj yanapasunkuman. Chantapis Internetpi jw.org nisqaman yaykuwaj chayri tantakuykunasniykuman jamuriwaj. Tantakuykunasniykuman yaykunapajqa mana qolqeta paganachu.
BIBLIA YUYAYCHALLANTAJ
Internetpi jw.org nisqaman yaykuspa ¿Imaraykutaj Bibliamanta yachakuna? nisqa videota qhaway, 880 parlaykunamanta astawanña tiyan.
DIOSMANTA YACHAKUYTA NECESITANCHEJ
“Kusisqa kanku Diosmanta yachakuyta munasqankuta reparakojkunaqa” (MATEO 5:3).
DIOSMANTA ASTAWAN YACHAKUNA
“Diosta maskʼanankupaj, tariytapuni munaspa maskʼajtinkutaj tarinankupaj. Jinapis payqa mana karupichu kashan sapa ujninchejmanta” (HECHOS 17:27).
BIBLIATA LEENA, CHAYPITAJ TʼUKURINA
‘Diospa kamachisqanpi pay sonqonta churan, chay kamachisqanpitaj tuta pʼunchay unanchan. Tukuy ima ruwasqanqa ñaupajman rin allinta’ (SALMO 1:2, 3).