¿Wajkunata chejnikunchejchu?
Wajkunata chejnikoyqa uj onqoy jina. Ashkha runastaj chay onqoyniyoj jina kanku, nitaj chayta reparakunkuchu.
Runasqa sajra ñawiwan qhawanku waj llajtayoj runasta, waj colorniyoj kajkunata, waj parlayniyoj kajkunata, waj religionmanta kajkunata, wajcha chayri qhapaj kajkunata, qharista, warmista ima. Wakenqa wajkunata qhawaranku edadninkurayku, mana profesionniyoj kasqankurayku, waj jinitas kasqankurayku chayri waj imasrayku. Jinapis chay runasqa yuyanku, ni pita chejnikusqankuta.
Ichá noqanchejpis wajkunata sajra ñawiwan qhawashanchej. Chayta reparakuytataj mana atillasunmanchu, jinapis wajkuna ajina kasqankutaqa chay rato reparasunman. Arí, imaynallamantapis tukuypuni wajkunata sajra ñawiwan qhawanchej. Chaymanta parlaspa uj runa nerqa: ‘Uj ayllumanta mana allinta yuyaj runaqa, chay ayllumanta pillawanpis tinkuspa, mana reparakuspalla chay runata pisipaj qhawan’, nispa.
Uj runamanta parlarina. Payqa Yovitsa sutikun, Europa ladopitaj tiyakun. Maypichus tiyakun chaypitaj, waj parlayniyoj grupo runas tiyakunku. Pay nin: “Piensarqani chay runasmanta ni pi kʼachas kasqankuta. Mana reparakorqanichu paykunata chejnikushasqayta. Yuyarqanitaj ajinapuni chay runasqa kasqankuta”, nispa.
Ashkha gobiernosqa leyesta churanku, mana wajkunata chejnikunapaj, nitaj sajra ñawiwan qhawanapaj. Jinapis runasqa mana cambiankuchu. Imajtinchus chay leyesqa runaj ruwasqallanta jarkʼan, nitaj imatachus yuyasqanta, sientesqantapis. Wajkunata sajra ñawiwan qhawayqa sonqonchejpi, yuyayninchejpi ima qallarin. Entonces, ¿imatá ruwasunman mana wajkunata sajra ñawiwan qhawanapaj?
Qhepan yachaqanaspi Bibliamanta phishqa yuyaychaykunata qhawarisunchej. Chaykunataj ashkha runasta yanaparqa, wajkunata mana sajra ñawiwan qhawanankupaj.