¿Celular amigosninchejwan yanapawanchejchu?
Kay tiempopi mensajesnejta, correosnejta, videollamadasnejta, redes sociales nisqanejta ima waj runaswan parlayta atillanchej, chay runas may karupi kajtinkupis. Ajinata celularta apaykachayqa mayta yanapawasunman.
Chaywanpis runasqa celularnejllata amigosninkuwan parlajtinku, kay llakiykunapi rikukunkuman:
Amigosninkumanta manaña anchata llakikunkumanchu.
Sapayakunkuman, pisipajtaj qhawakunkuman.
Paykunallapi anchata yuyankuman.
KAYTA YACHANA
WAJKUNAMANTA LLAKIKUNA
Wajkunamanta llakikunapajqa imaynachus chay runa kashasqanpi piensarina tiyan. Chaywanpis redes sociales nisqapi imatachus churasqankuta leespalla kasun chayqa chayri mensajesta apachispalla kasun chayqa, mana wajkunamanta llakikusunchu.
Celularninchejpi ashkha mensajes kajtin, amigosninchejman mana kutichiyta atillasunmanchu. Jina kajtintaj, llakiypi rikukoj amigonchejta yanapanamantaqa mensajesta kutichispalla kashasunman.
KAYPI PIENSARIY: Amigosniykiman mensajeta apachishaspa, ¿imaynatá rikuchiwaj paykunamanta llakikusqaykita? (1 PEDRO 3:8).
PISIPAJ QHAWAKUSUNMAN
Uj estudio ruwakusqanman jina, redes sociales nisqata qhawarisqalla kajkunaqa mana kusisqachu kanku. Kay estudiota ruwajkunaqa nerqanku, wajkunaj fotosninkuta, comentasqankuta ima qhawarisqalla kajkunaqa kausayninkupi ni imapi allinchu risqanta yuyasqankuta.
Chantapis redes sociales nisqapi imatachus wajkuna ruwashasqankumanta fotosta qhawaspa, paykunawan kikinchakuyta qallarisunman. Piensasunmantaj paykuna kusirikushasqankuta, noqanchejtaj mana.
KAYPI PIENSARIY: Redes sociales nisqata qhawarishaspa, ¿imatá ruwasunman wajkunawan mana kikinchakunapaj? (GÁLATAS 6:4).
NOQALLANCHEJPI YUYASUNMAN
Uj profesora nerqa, alumnosninmanta ashkhasqa paykunallapi yuyasqankuta. Chantapis paykunata yanapajkunallawan masichakusqankuta. Ajina amigosqa interesraykulla wajkunawan masichakunku, paykunata necesitajtillanku maskʼanku, mana necesitajtinkutaj mana.
KAYPI PIENSARIY: ¿Imatachus Internetman churasqanchej, rikuchinchu jatunchakushasqanchejta chayri wajkunawan atipanakupi jina kashasqanchejta? (GÁLATAS 5:26).
¿IMATÁ RUWASUNMAN?
IMAYNATACHUS CELULARTA APAYKACHASHASQANCHEJPI PIENSARINA
Celularta allinta apaykachasun chayqa amigosninchejwan sumajta parlariyta atisun, chantapis aswan sumaj amigosman tukusun.
BIBLIA NIWANCHEJ: ‘Munakuyniyoj runaqa mana payllapajchu imatapis maskʼan’ (1 CORINTIOS 13:4, 5).
Imatachus ruwayta munasqanchejpi piensarina chayri qhelqana:
Mensajesnejta chayri correosnejta parlanamantaqa, uyapura parlarinapaj kallpachakusunman.
Pillawanpis parlarikushaspa, celularta waj ladoman chayri mana sonananpaj jina churasunman.
Redes sociales nisqata pisillataña qhawasunman.
Wajkunata uyarinapaj kallpachakusunman.
Llakiypi rikukoj amigonchejwan parlarisunman.