¿Celular wawasninchejta yanapanchu?
Wawasqa celularta sumajta tʼojpiyta yachanku, machu runastaj mana atillankuchu.
Wakin runas reparasqankuman jina, celular tʼojpirisqalla kaj jovenesqa kay llakiykunapi rikukunku:
Mana celularwanqa mana kausankuchu.
Internetnejta toreyanku chayri toreyachikunku.
Mana ropayoj runasta qhawankuman.
KAYTA YACHANA
CEBAYKUKUNKUMAN
Internetpi wakin imasqa chayman cebaykukunapaj chayri chayman qokunapaj jina kanman. Chaykunamanta ujtaj Internetnejta videojuegosta pujllay. Chaymanta parlaspa En defensa de la conversación nisqa libro nin: “Celularpi kaj aplicacionesqa, chayman cebaykukunapaj jina ruwasqa kanku”, nispa. Empresasqa aplicacionespi propagandasninkuta runas astawan qhawajtinku, astawan qolqechakunku.
KAYPI PIENSARIY: ¿Wawasniyki celular tʼojpirisqallachu kashanku? ¿Imaynatá wawasniykichejta yanapawajchej tiemponkuta mana usuchinankupaj? (EFESIOS 5:15, 16).
INTERNETNEJTA TOREYASUNKUMAN
Wakin runasqa Internetllawan kasqankurayku astawan usqhayta phiñakunku, rumi sonqosman tukunku, wajkunatapis manaña respetankuchu. Ajina kasqankuraykutaj wajkunata toreyanku, kʼumuykachachinku ima.
Wakin runasqa chay imasta ruwanku Internetpi may rejsisqa kayta munasqankurayku. Wakintaj uj fiestaman mana invitasqa kasqankumanta mayta llakikunkuman, creenkumantaj paykunata pisipaj qhawasqankuta.
KAYPI PIENSARIY: ¿Wawasniyki Internetpi kashajtinku kʼachaschu kanku? (Efesios 4:31). ¿Imayná wawasniyki sientekunku imallamanpis mana invitarisqa kajtinku?
PORNOGRAFÍA
Kay tiempopi tukuynejpi Internet kasqanrayku, qʼala runasmanta fotosta chayri videosta pillapis qhawayta atin. Tatas wawasninku Internetpi millay imasta mana qhawanankupaj imata ruwajtinkupis, millay imasqa rikhurimonqapuni.
Celularpi qhariwarmi jina puñuykuymanta fotosta qhaway chayri apachiy carcelniyoj kanman. Ajina fotosta apachejkunaqa leyesman jina demandasqa kankuman.
KAYPI PIENSARIY: ¿Imaynatá wawaykita yanapawaj qʼala runasmanta fotosta mana qhawananpaj nitaj wajkunaman apachinanpaj? (EFESIOS 5:3, 4).
¿IMATÁ RUWASUNMAN?
WAWASNINCHEJTA YACHACHINA
Wawas celularta sumajta tʼojpiyta yachajtinkupis, allinta apaykachanankupaj yanapata necesitanku. Chaymanta parlaspa uj libro nin mana allinchu wawasman celularta jayway, paykuna niraj sumajta apaykachayta yachashajtinku.
BIBLIA NIWANCHEJ: “Wawamanqa imaynatachus kausananta allinta yachachiy; machuyayninpipis mana qonqanqachu chay yachasqantaqa” (PROVERBIOS 22:6).
Imatachus ruwayta munasqanchejpi piensarina chayri qhelqana:
Wawaywan parlariyman imaynatachus celularta apaykachananmanta.
Wawayta imallamanpis mana invitarejtinku, mana llakikunanpaj yanapariyman.
Wawayta jarkʼayman Internetpi wakin paginasta bloqueaspa.
Wawaypa celularninta sapa kuti revisayman.
Wawayman niyman mashkha unaytachus sapa día celularta qhawananta.
Wawayman niyman chʼisisninpi celularninta cuartonpi mana apaykachananta.
Mikhuna horasta ni pi celularninta apaykachananta niyman.