¿Imaraykutaj Dios kasqanta yachananchej tiyan?
¿Imaraykutaj Dios kasqanta yachananchej tiyan? Imaraykuchus chayta yachaspaqa, Biblia paymantachus manachus jamusqanta yachayta munallasuntaj. Bibliaj nisqanpi atienekusun chaytaj sumajta yanapawasun.
Aswan kusisqa kausakusun
BIBLIA NIN: Dios “cielomanta qankunapaj parachimun, ashkhata poqochin, mikhuna patapi uywasunkichej, sonqoykichejtataj kusiywan juntʼachin” (Hechos 14:17).
¿IMA NIYTA MUNAN? Jallpʼapi kaj imasqa Diospa regalon kanku. Bibliapi Dios noqanchejmanta llakikusqanta yachaspa, astawan chay regalosmanta agradecekusunchej.
Kusisqa kausakunapaj Bibliapi sumaj yuyaychaykuna tiyan
BIBLIA NIN: “Entiendellankitaj imachus justicia kasqanta, imachus cheqan kaj kasqanta, imachus uj rejllata qhaway kasqanta, ajinamanta entiendenki imaynachus allin ñan kasqanta” (Proverbios 2:9).
¿IMA NIYTA MUNAN? Dios ruwawasqanchejrayku yachan imatachus necesitasqanchejta allinta kausakunapaj. Bibliapeqa sumaj yuyaychaykuna tiyan, chaytaj mayta yanapawasunman.
Bibliaqa tapuykunasninchejman kutichin
BIBLIA NIN: ‘Diospa yachayninta tarinki’ (Proverbios 2:5).
¿IMA NIYTA MUNAN? Dios kasqanta yachaspaqa, kay tapuykunaman kutichinapaj yanapawasun: ¿Imapaj kausanchej? ¿Imaraykutaj sufrinchej? ¿Runas wañupuspa maymantaj ripunku? Bibliaqa chayta sutʼinchan.
Sumaj kausay kananta yachay yanapawanchej
BIBLIA NIN: “Noqaqa allinta yachani imatachus qankunapaj munasqayta. Noqaqa munani allinta kausakunaykichejta, manataj ñakʼarinaykichejtachu. Chayrayku ama iskayrayaychejchu aswan qhepamanpis allinta kausakunaykichejmanta” (Jeremías 29:11).
¿IMA NIYTA MUNAN? Dios niwanchej sajra kajta, ñakʼariyta, wañuytapis chinkachinanta. Diospa nisqanpi atienekusun chayqa, llakiykunapi kaspa aguantayta atisun.