KAY MUNDOPEQA LLAKIYLLA TIYAN

2 | Qolqeta, kapuyninchejtapis waqaychana

¿IMAJTINTAJ WAQAYCHANA?

Ashkha runasqa necesitasqanku imas kapunanpaj mayta trabajanku. Kay mundopi llakiykuna kasqanraykutaj, necesitasqankuta rantinankupaj mana ganakuyta atillankuchu, ¿imajtin?

Jatun llakiykunapi rikhurej llajtaspeqa tiyakunapaj wasispis mikhunaspis may valesqa.
Jatun llakiykuna kasqanrayku mana trabajo kallanchu chayri pisita paganku.
Terremotospis loco paraspis runaspa wasisninkuta, negociosninkuta thuñiran, chayraykutaj ashkha runas wajchayanku.

Kay imasta yuyarikunapuni

Qolqenchejta sumajta apaykachasun chayqa, ima llakiy kajtinpis wakichisqa kasun.
Qolqeqa mana wiñaypajchu jarkʼawasun. Ganakusqanchej qolqepis jallchʼakusqanchej qolqepis tiempomanqa niña valenmanchu.
Qolqeqa mana rantinmanchu kusisqa kausakuyta, familiawan ujchasqa kausakuytapis.

¿Imatá ruwasunman?

Biblia nin: “Mikhunayoj, ropayojtaj kaspaqa, chaywan sonqo juntʼasqa kausakuna”, nispa (1 Timoteo 6:8).

Sonqo juntʼasqa kanapajqa mana gustitusninchejpichu qolqeta tukuna tiyan, astawanqa necesitasqallanchejta rantikuna, chayqa sumajta yanapawasun qolqenchej pisilla kajtin.

Sonqo juntʼasqa kanapajqa pisi qolqellawan kausakuyta yachananchej tiyan. Wajcha kashaspa valesqa imasta rantisun chayqa llakiyllapi rikukusun.

¿IMATÁ RUWASUNMAN? Kayta ruwana

Kay mundopi llakiykuna kajtinpis qolqenchejta, kapuyninchejtapis waqaychanapaj kay imasta ruwana

GASTOSNINCHEJTA PISIYACHINA

Verdurasta poqochina

Ama qolqenchejta gastanallachu, necesitasqanchej imasllata rantina. Chayrayku tapurikuna: “¿Autota necesitanipunichu? ¿Wasiypi verduritasta plantakuymanchu?”.
Niraj imatapis rantishaspa kayta tapurikuna: “¿Kayta necesitanipunichu? ¿Chayta rantinaypaj qolqey kanchu?”.
Gobiernomanta chayri empresasmanta yanapas tiyan chayqa, chaywan yanapachikuna.

• Gift nin: “Familiaywan parlarikuykupuni imapichus qolqeta gastashasqaykuta. Kusirikunaykupaj ashkha qolqeta gastashasqaykuta reparakuyku chayqa pisiyachiyku. Chantapis pisi imasllawan mikhunata waykʼukuyku”, nispa.

GASTOSNINCHEJTA QHAWARIKUNA

Gastosninchejta qhawarikuna

Biblia nin: “Kʼuchi runaj wakichikusqanqa allinpuni llojsin. Mana allinta yuyaychakuspa imatapis ruwarpajkunataj wajchayanku”, nispa (Proverbios 21:5). Gastosninchejta anotakoyqa yanapawasun mana qolqenchejta tukurpanapaj.

Ñaupajtaqa mashkhatachus sapa killa ganakusqanchejta anotana.
Chantá qolqenchejta sapa killa imaspichus gastasqanchejta anotakuna, ajinapi reparasunchej imaspichus manaña gastanachu kasqanta.
Gastosninchej ganakusqanchejmanta aswan ashkha chayqa, ichapis wakin imasta niña rantinachu kanqa, ajinamanta ganakusqanchej qolqe alcanzallawasun.

Carlos nin: “Sapa killa anotakuyku mashkhatachus gastasqaykuta, mashkhatachus ganakusqaykuta ima. Chantapis qolqesituta tantakuykupuni ima urgenciapajpis chayri imata rantinaykupajpis. Chayrayku niña anchata llakikuykuchu qolqemanta”, nispa.

QOLQETA JALLCHʼAKUNA, AMATAJ MANUCHAKUNACHU

Qolqeta jallchʼakuna amataj manuchakunachu

Ñaupajmantaña piensarina ama anchata manuchakunapaj, atikojtenqa amañapuni manuchakunachu. Astawanqa imatachus necesitasqanchejta rantikunapaj qolqeta tantakuna.
Sapa killa ganakusqanchej qolqesitumanta uj chhikanta jallchʼakuna, aswan qhepapaj imapajchus necesitasunchej chaypaj chayri urgenciaspaj.

SUMAJTA TRABAJANA, AMATAJ TRABAJOTA PIERDENACHU

Biblia nin: “Ima laya sinchʼi trabajopis runapajqa sumajpuni”, nispa (Proverbios 14:23).

Sumajta trabajana amataj trabajota pierdenachu

Trabajonchej mana gustawanchej chaypis tukuy sonqo trabajana, imaraykuchus chay trabajonchejrayku qolqesitunchej tiyapuwanchej.
Sumajta trabajana, confianzankutataj ganakuna. Chay yanapawasun trabajonchejta mana pierdenapaj. Trabajonchejta pierdesunman chaypis waj trabajota conseguinapaj yanapawasun.

Dimitri nin: “Ima trabajochus tiyan chayta japʼikuni mana gustawajtinpis chayri pisillata pagajtinkupis. Sumajta trabajoyta ruwani, noqapajpis trabajashayman jina”, nispa.

Trabajota maskʼashanchej chayqa kayta ruwana:

Tukuy empresasman wajyasunman trabajota maskʼashasqanchejta ninapaj. Amigosninchejman, familiaresninchejmanpis willasunman trabajota maskʼashasqanchejta.
Mana gustawasqanchej trabajota tarikuspapis chay trabajota japʼikuna.