Kay mundopi llakiykuna kajtinpis amigoswan familiawan allinta kausakunapaj kay imasta ruwana
QOSANCHEJTA WARMINCHEJTA MUNAKUNA
Qosanchejta warminchejta munakuna
Biblia nin: “Aswan allin iskay ukhu kayqa, ujlla kanamantaqa [...]. Ujnin urmanman chayqa, ujnenqa yanapariyta atinman”, nispa (Eclesiastés 4:9, 10). Casadosqa pelotata jaytʼaj equipo jina kanku, khuska yanapanakunku manataj contrarioschu kanku.
Ama qosanchejwan chayri warminchejwan problemasrayku phiñanakunachu. Kallpachakunallapuni pacienciayoj kanapaj.
Semanapi ujllatapis qosanchejwan chayri warminchejwan parlarikuna ima problemasninchejchus chayri ima llakiykunasninchejchus tiyan chaymanta. Problemanchejta allinchanapi yuyana, manataj qosanchejwan chayri warminchejwan phiñanakuypichu.
Imachus gustawasqanchejta ruwanapaj tiempochakuna.
Qhariwarmi jina imastachus khuska ruwasqanchejmanta yuyarikuna, ichapis matrimonionchejmanta chayri waj kutispi khuska kusirikusqanchejmanta fotitosta qhawarisunman.
David nin: “Qhariwarmisqa mana tukuy imapipunichu uj yuyayllaman chayankuman, jinapis khuska trabajayta atinkuman. Iskayninku uj yuyayllaman chayaspaqa khuska yanapanakuspa ñaupajman rinku”, nispa.
AMIGOSNINCHEJMANTA YUYARIKUNAPUNI
Amigosninchejmanta yuyarikunapuni
Amigosninchejqa yanapawanchejpuni, noqanchejpis paykunata yanapanallataj. Wajkunata kallpacharispaqa noqanchejpis kallpachakullanchejtaj.
Sapa día iskay amigosnillanchejmanpis wajyarina chayri mensajitota apachina imaynachus kashasqankuta yachanapaj.
Noqanchej jina llakiypi tarikoj amigosninchejta tapurikuna imaynatachus llakiyninkuta atipasqankuta.
Nicole nin: “Amigosninchejqa sinchʼi llakiypi rikukojtinchej sumajta yanapawasunman allin kajta ruwanapaj chayri yuyarichiwasunman sumaj yuyaychaykunata. Amigosninchejqa noqanchejmanta llakikunku, yachankutaj noqanchejpis paykunamanta llakikusqanchejta”, nispa.
WAWASNINCHEJPAJ TIEMPOCHAKUNA
Wawasninchejpaj tiempochakuna
Biblia nin: “Sapa ujpis allinta uyariyta yachanan tiyan, manataj mana yuyaychakuspalla parlananchu tiyan”, nispa (Santiago 1:19). Qallariypeqa ichapis wawasninchej mana willallawasunchu llakiykunasninkuta chayri imachus manchachisqanta. Pero pacienciawan uyarejtinchejqa willallawasun llakiykunasninkuta.
Wawaswan parlanapajqa yachana tiyan maypichus, maykʼajchus parlarinata. Wakin wawasqa autopi rishajtinchej chayri puriykacharishajtinchej imaynachus kashasqankuta willarillawanchej, tiyaykuspapuni tapunamanta nisqaqa.
Allinta qhawarikuna mana wawasninchej mancharina noticiasta uyarinankupaj chayri qhawanankupaj.
Wawasninchejman willarina imaynatachus familianchejta cuidashasqanchejta.
Ima emergencia kajtinpis imatachus ruwananchejta ñaupajmantaña yachana, chaytataj wawasninchejwan ensayana.
Bethany nin: “Imaynachus kashasqanchejta wawasninchejman willarina ajinamanta paykunapis imaynachus kashasqankuta willarillawasun, ichapis sonqollankupi llakisqa, mancharisqa chayri phiñasqa kashankuman. Willarinallataj imaynatachus noqanchejpis llakiyninchejta atipashasqanchejta”, nispa.