KAY MUNDOPEQA LLAKIYLLA TIYAN

4 | Allin kausay kananpi yuyayninchejta churana

¿IMAJTIN?

Kay mundopi kausakoyqa mana atikullanchu onqosunman chayri llakikusunman. Sinchʼi llakiypi rikukoj runasqa qhepaman aswan llakiylla kananta yuyanku, ¿imajtin?

Wakin runasqa allin kausay kananpi mana yuyayta munankuchu.
Wakin runasqa drogakuyman chayri machaykuyman qokunku.
Wakin runastaj niña kausayta munankuchu, ninkutaj: “¿Imapajñataj kay jina llakiypi kausasajri?”, nispa.

Kay imasta yuyarikunapuni

Ichapis wakin problemasninchejqa uj tiempollapaj kanman, aswan qhepamantaj allinchakunman.
Ima problemallanchejpis mana allinchakunchu chayqa, imallatapis ruwasunman mana anchata llakikunapaj.
Bibliaqa niwanchej tukuy problemas wiñaypaj chinkananta.

¿Imatá ruwasunman?

Biblia nin: “Ama jaykʼajpis phutikuychejchu imachus qʼaya kananmanta, qʼaya pʼunchaypa llakiynenqa kallanqa. Sapa pʼunchaypa llakiynenqa kallan”, nispa (Mateo 6:34).

Imachus qʼaya kananmantaqa mana llakikunanchejchu tiyan, imatachus kunan ruwayta atisqanchejta ruwana.

Sajra imas pasanawanchejpi piensaspalla kasunman chayqa, llakisqalla kasun, chantapis ni jaykʼaj allin kausay kananta yuyasunman.

¿IMATÁ RUWASUNMAN? Kayta ruwana

ALLIN IMASPI YUYANA

Biblia nin: “Llakisqa runapajqa sapa día phutiylla. Runaj sonqon kusisqa kajtintaj sapa día kusisqa kausakun”, nispa (Proverbios 15:15). Problemasninchej piensarisqalla kasun chayqa ichapis mana reparayta atisunchu imaynatachus uj problemata allinchanata. Mana kay problemaqa atipawanqachu nikojtinchejqa ichapis imaynatachus allinchanata sutʼita reparasun.

Ama anchata noticiasta uyarinachu, nitaj qhawanachu.
Sapa día Diosman iskay chayri kinsa imasmanta agradecekuna.
Papelpi anotakusunman imastachus kunan día ruwanallanchejta. Imastachus ruwananchej kashan chayta pisimanta pisi ruwanapaj tʼaqasunman, ajinamanta reparasun imatachus chay día ruwasqanchejta.

YANAPATA MASKʼANA

Biblia nin: “Pichus sapallan kananpaj karunchakojqa […] yachayniyoj kayta pisipaj qhawashan”, nispa (Proverbios 18:1). Uj juskʼumanta llojsinapajqa necesitanchej pillapis yanaparinawanchejta.

Familianchejta chayri amigosninchejta yanaparinawanchejta nina.
Noqanchejpis paykunata yanapayta atillanchejtaj. Wajkunata yanaparispaqa mana problemasnillanchejpichu yuyasun.
Ni imapaj valesqanchejta yuyaspa wañupuyllataña munashanchej chayqa, allin kanman doctorman rinanchej. Ichapis depresión nisqa onqoywan kashasunman. Ashkha runas tratamientota ruwaspa chay onqoymanta walejyapunku.a

a ¡Rijchʼariy! revistaqa, mana ninchu ima tratamientotapunichus ruwanata.

Bibliaqa allin kausay kananmanta parlan

Uj salmota qhelqaj runaqa Diosman kayta nerqa: “Palabraykeqa chakisniypaj uj lámpara jina, ñanniytataj kʼanchan”, nispa (Salmo 119:105). ¿Imatá chaywan niyta munarqa?

Laqhapi purinapajqa kʼanchata necesitanchej maymanchus sarunanchejta yachanapaj. Ajinallataj Bibliapis uj kʼanchay jina, sumaj yuyaychaykunata qowanchej llakiypi rikukuspa imatachus ruwananchejta yachanapaj.

Kʼanchayqa aswan jaqaynejpi imachus kasqanta rikunapaj yanapawanchej. Ajinallatataj Bibliaqa aswan qhepaman uj sumaj kausay kananta willawanchej.

Bibliaqa Diospa Palabran. Willawanchejtaj imaynatachus runas rikhurisqankuta, chantá willallawanchejtaj sumaj kausay kananta. Kay tapuykunamantaj kutichin:

¿Imajtín?

¿Imajtín sufrinchej? Biblia nin: “Uj runanejta jucha kay mundoman yaykumorqa, juchanejtataj wañuy yaykumorqa. Ajinamanta wañoyqa tukuy runasman chayarqa, tukuyninku juchallikusqankurayku”, nispa (Romanos 5:12).

¿Imaraykú?

¿Imaraykú runas mana problemasninchejta allinchayta atinchejchu? Biblia nin: “Runaqa mana nillaytapis atinchu imatachus kausayninpi ruwananta”, nispa (Jeremías 10:23). Chaytaqa sutʼita reparanchej kay mundopi problemasta rikuspa.

¿Imatá?

¿Imatá Dios ruwanqa kay mundomanta problemasta allinchananpaj? Biblia nin: “Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj waqaypis, nitaj nanaypis”, nispa (Apocalipsis 21:4).