¿IMATÁ RUWASUNMAN TUKUY IMAPIS VALEYKOJTIN?

Allin kausay kananta suyakuna

¿Tiyakunki chaypi tukuy imachu astawan valeykushan? ¿Ganakusqaykipis nichu alcanzashasunki necesitasqayki imaspaj? ¿May llakisqachu kashanki familiaykiman necesitasqanku imasta mana qoyta atinaykimanta? Jina chayqa, ichapis may mancharisqa kashanki imachus aswan qhepaman kananmanta. Chay jina llakiykunapi kaspaqa may sumajpuni aswan qhepaman sumaj kausay kananta yachayqa.

¿IMARAYKUTAJ ALLIN KAUSAY KANANTA SUYAKUNANCHEJ TIYAN?

Sumaj kausay kananta yachajkunaqa mana suyankuchu jinallamanta tukuy imapis allinyananta. Manaqa llakiy patapi kaspa tukuy atisqankuta ruwanku necesitasqanku imasta mana faltachikunankupaj, allin imastataj yachakunankupaj. Yachakusqanman jina, kausayninku allinyananta suyakojkunaqa kay jina kanku:

Ima llakiytapis kusiywan aguantanku.
Llakiykunaman jina waj jinasmanta kausakuyta yachakunku.
Sumajta kausakunankupaj, sanitostaj kanankupaj imatachus ruwanankuta allinta ajllayta yachanku.

¿IMATÁ RUWAWAJ?

Ñaupaj kaj, kay tiempopi imaynatachus Biblia yanapayta atisusqanpi tʼukuriy. Bibliaqa sumajta yuyaychawanchej precios wicharejtin imatachus ruwanata yachanapaj. Yanapallawanchejtaj imapis kajtin mana manchachikunanchejpaj, ima llakiypajpis sumaj wakichisqa kanapaj ima.

“Allinta piensariyta yachasqaykeqa sumajta yanapasonqa, sumajta tanteariyta yachasqaykipis cuidasonqa” (Proverbios 2:11).

Iskay kaj, aswan qhepaman imaynachus kausay kananmanta imatachus Biblia nisqanta yachakuy. Bibliapi sumaj yuyaychaykuna kasqanta reparajtiykeqa astawanchá Bibliata ukhunchariyta munanki. Ukhuncharishaspaqa reparanki Bibliaqa aswan qhepaman imaynachus kausay kananmantapis parlasqanta. Yachakullankitaj Diosqa ‘aswan qhepaman allinta kausakunanchejta’ munasqanta (Jeremías 29:11). Chay sumaj kausaytataj Reinonnejta apamonqa.

¿IMATAJ DIOSPA REINON, CHANTÁ IMATATAJ RUWANQA?

Diospa Reinonqa uj Gobierno, chay Gobiernotaj cielomantapacha jallpʼantinta kamachimonqa (Daniel 2:44; Mateo 6:10). Diospa Gobiernonpeqa niña pipis ñakʼarisunchu, niñataj pobreschu kasun, tukuytaj allinta kausakusun ni imata pisichikuspa. Bibliaqa kay jinata kausakunanchejta niwanchej:

“Tukuy imayki tiyapusonqa, kusisqa kanki” (Salmo 128:2).

Diospa Gobiernonpa kamachiyninpi tiyakojkunaqa “mana qhasipajchu sinchʼita trabajanqanku” (Isaías 65:23).

“Jallpʼapeqa ashkha trigo poqonqa” (Salmo 72:16).

May chhika runasqa mana iskayrayankuchu Bibliaj nisqasnin juntʼakunanmanta. Imaraykuchus yachanku Diosqa ni jaykʼaj llullakusqanta (Tito 1:2). Bibliaj nisqasnintaqa qanpuni ukhunchariwaj. Diospa palabran allin kausay kananta nisqanta yachayqa mayta yanapasunkiman. Chayta yachayqa tukuy ima valeykojtinpis qolqe pisiyajtinpis mana anchata llakikuspa aguantanaykipaj yanapasunkiman. Aswan qhepaman imaschus kananmantapis mana manchachikunkichu.