4 yachachiy

Huertamanta wikchʼuchikunku

ADANTA Evatawan qhawariy. Edén huertamanta qharquchikuchkanku. ¿Imaraykutaq?

Paykunaqa mana allintachu ruwarqanku, chayrayku Jehová Diosninchik paykunata qharquchkan. ¿Imatataq ruwarqanku?

Mana ruwanankuta ruwarqanku. Diosninchik juk sachʼallamanta mana mikhunankuta nirqa. Mikhunkichik chayqa, wañunkichik, nispa nirqa. Chay sachʼataqa Diosninchik paypaq jallchʼakuchkarqa. Yachanchikjina, mana ñuqanchikpata kaptinqa, mana imatapis uqharikunachu, ¿ichari? ¿Imatataq paykuna ruwarqanku?

Juk pʼunchay Eva sapan huertapi kachkaptin, juk katari payta jinata parlapayarqa, mana mikhunaykimanta sachʼap puquyninta mikhuy, nispa. ¿Imaynatá juk katari parlanman karqari? Jehovaqa katarita mana parlananpaqchu ruwarqa. Chayrayku, Evata parlaqqa mana katarichu karqa. ¿Pitaq Evata parlapayarqari?

Adanqa mana katariniqta parlarqachu. Chayrayku Evata parlaqqa, Dios ruwasqanmanta juknin ángel karqa, paytaqa mana rikuyta atisunmanchu. Kay angelqa mayta uqharikurqa. Diosninchikjina kamachiq kayta munarqa. Jehovata yupaychanamantaqa, yupaychachikuyta munarqa. Chay saqra ángel katariniqta parlarqa.

Chay angelqa, kayta mikhuspa Diosjina kanki, nispa Evata chʼawkiyarqa. Evataq chayta creerqa. Jinamanta chay puquyta mikhuykurqa, Adanpis mikhuykullarqataq. Chayrayku, Adanwan Evawan mana Diosta kasukusqankurayku, chay kʼacha huertamanta wikchʼuchikurqanku.

Chaywanpis, Diosninchikqa juktawan Jallpʼata kʼachitu huertaman tukuchinqa. ¿Chaypi tiyakuyta munawaqchu? Qhipaman qhawasunchik, imatachus chaypi tiyakunapaq ruwananchik tiyan. Kunanqa imapichus Adán Evawan tukusqankuta qhawarina.

Génesis 2:16, 17; 3:1-13, 24; Apocalipsis 12:9.