18 yachachiy
Jacob haranman rin
¿PIKUNAWANTAQ Jacob parlachkanri? Jacob Haranman chayananpaq maytaña purirqa. Kay runaswan pukyup qayllanpi tinkurqa. Jacob paykunata tapurqa, ¿maymanta kankichik?, nispa.
‘Haran jallpʼamanta kayku’, nispa paykuna kutichirqanku.
Jacobtaq ‘¿Nacorpa churinta Labanta riqsinkichikchu?’, nispa tapurillarqataq.
‘Ari, riqsiyku’, nispa kutichirqanku. ‘Qhawariy, jaqayqa ususin Raquel ovejasninta qhatimuchkan’, nispa nirqanku. ¿Rikunkichu Raquel qayllamuchkasqanta?
Jacob Raquelta rikuytawan yanaparimurqa, ovejitas yakuta ukyanankupaq pukyup ruminta kuyuchirqa. Chaymanta Jacob Raquelta muchʼaykuspa napaykuytawan, primun kasqanta willarqa. Raquelqa mayta kusikurqa, wasinman rispataq tatan Labanman sobrinon chayamusqanta willamurqa.
Labanqa, Jacob wasinpi qhipakusqanmanta mayta kusikurqa. Ususin Raquelwan casarakuyta munasqanta niptintaq, kusikullarqataq. Labanqa Jacobta 7 watata Raquelrayku llamkʼananta mañarqa. Jacob Raquelta munakusqanrayku 7 watata llamkʼarqa. Casarakunan kachkaptin, ¿imataq karqa?
Labanqa Raquelta qunanmantaqa, kuraq ususin Leata Jacobman qurqa. Chayrayku Jacobqa 7 watatawan Raquelrayku Labanpaq llamkʼallarqataq. Chantaraq Labanqa Raquelta qurqa. Jaqay tiempopi Diosqa qharikuna achkha warmiyuq kanankuta saqirqa. Kunanqa Biblia nisqanmanjina qhariqa juk warmillawan casarakunan tiyan.