25 yachachiy
Ayllun Egiptoman ripun
JOSEQA waqanayachkarqaña. Tukuy kamachisninta jawaman qhatiytawan, waqarikurqa. Josep wawqisnin mana imamantachus waqasqanta yachasqankurayku maytachá mancharikurqanku. Chayllapi José nirqa: ‘Ñuqa José kani. ¿Tatay kawsakuchkallanraqchu?’, nispa.
Wawqisninqa mancharikuspa mana imatapis kutichirqankuchu. Chayrayku José nirqa: ‘Qayllamuwaychik, ñuqa waqiykichik José kani, pitachus qamkuna Egiptoman venderqankichik, chay’, nispa.
Joseqa paykunata sunquchanapaq nirqa: ‘Ama chaymanta llakikuychikchu. Diosmin ñuqata kachamuwan runata kawsachinaypaq. Faraonqa tukuy kay suyuta kamachinaypaq churawan. Chayrayku usqhayta tatayman riychik, kayman kawsakuq jampunanta nimuychik’, nispa.
Chanta José wawqisninta uqllaykuspa, muchʼaykuspa waqarikullarqataq. Faraón Josep wawqisnin jamusqankuta uyariytawan Joseta nirqa: ‘Usqhayllata burrosninkuman chaqnaykuspa, tataykichikta familiaykichiktawan apamuychik. Astawan sumaq jallapʼata qusaq’, nispa.
Jinatataq ruwarqanku. Ayllun Egiptoman chayamuptin, ¿imaynatachus José tatanta napaykuchkasqanta rikunkichu?
Jacobpa ayllunqa mayta mirarqa. Jacobta, churisninta, allchhisninta ima yupaspaqa 70 karqanku. Warmisninkupis kamachisninkupis chayamullankutaq. Tukuyninku Egiptopi tiyakuyta qallarirqanku. Jehová Jacobpa sutinta Israelman tikrasqanrayku, paykunata Israel llaqtatajina sutichakurqa. Paykunaqa Diospa akllasqa llaqtan karqanku.