26 yachachiy
Job Diosta mana wasanchanchu
¿MANACHU chay unqusqa runa phutichisunki? Job sutikun, warmintaq paywan kachkan. ¿Imatataq nichkan? ‘Diosta maldeciy jinaspataq wañuy’, nispa nichkan. ¿Imaraykutaq warmin chayta nirqa, chantapis imaraykutaq Job chayjinata ñakʼarirqa?
Job chiqan sunquyuq runa karqa, Diosta kasukuq. Uz llaqtapi tiyakurqa, Canaanpa qayllanpi. Jehovaqa Jobta mayta munakuq, chaywanpis, juk saqra ángel Jobta chiqnikuq, ¿pitaq?
Kuraq Supay, Satanás chay karqa. Satanasqa Jehovata chiqnikuq juk saqra ángel. Payqa Adanta Evatawan Diospa contranta uqharichirqa, chantapis mayqin runatapis Diospa contranta sayaykuchiyman, nispa nirqa. ¿Chay nisqanta juntʼarqachu? Mana, yachanchikjina may chhika runa Diosta munakuspa kasukurqanku. ¿Pikunamanta yuyarikunki?
Jacob, José ima Egiptopi wañupusqankumanta, mana pipis Jobjina jallpʼantinpi Diosta munakurqachu. Jehovaqa Supayman mana tukuy runachu paymanta karunchakusqanta rikuchiyta munarqa. Chayrayku Supayman nirqa: ‘Qhawariy Jobta, payqa chiqan sunquyuq runa’, nispa.
Supaytaq nirqa: ‘Payqa ajina, tukuy imata qusqaykirayku. Tukuy imanta qhichunki chayqa, madecisunqa’, nispa.
Chayrayku Jehová nirqa: ‘Qam munasqaykimanjina Jobpa tukuy imanta qhichuyta atinki. Payllata amapuni wañuchiychu’, nispa.
Supayqa Jobpa uywasninta, camellosnintawan suwachirqa, ovejasnintataq wañuchirqa. Chantapis 7 churisninta 3 ususisnintawan wanuchirqa. Chanta Jobta llakiyta unquykuchirqa, Job manchayta ñakʼarirqa. Chayrayku warminqa Jobta nirqa: ‘Diosta maldeciy jinaspataq wañuy’, nispa. Jobqa mana munarqachu. Chantapis 3 masisnin jamuspa, juchachakusqanta nirqanku. Jinapis, Jobqa mana Diosta wasancharqachu.
Chayta rikuspa Jehová mayta kusikurqa. Chaymanta Jehovaqa Jobta tʼinkarqa dibujitupi rikukunjina. Unquyninmanta jampirqa, juktawan 10 wawasta qurqa. Uywasnin, ovejasnin, camellosnin ima kapusqanmanta astawan yapakurqa.
Qamri ¿Jobjinachu kanki? Ajina kaptiykiqa, Diosninchik tʼinkasunqa. Jallpʼa tʼikapacha paraisoman, Edenmanjina tukuptin, wiñay wiñaypaq kawsayta atinki.