30 yachachiy
Lawraq sachʼa
MOISESQA Horeb urquman ovejitasnita michiq rirqa. Chaypitaq juk lawraq chʼaqrata rikurqa, chaytaq mana qʼulakuchkarqachu.
‘¡Imataq kunan jaqayri! Rispa astawan allinta qhawarqamusaq’, nispa Moisés tʼukurirqa. Qayllaykuchkaptin chʼaqramanta pichá parlamurqa: ‘Ama qayllamuychu. Jukʼutasniykita lluchʼukuy, kay jallpʼaqa ñuqapaq tʼaqasqa jallpʼa’, nispa. Diosninchik jinata angelninniqta parlachkarqa, chayraykutaq Moisés uyanta pakakurqa.
Chanta Dios nirqa: ‘Rikuni imaynatachus israelita wawasniy Egiptopi ñakʼarichkasqankuta. Paykunata kacharichisaq, chayman riy urqhumunaykipaq’, nispa. Jehovaqa llaqtanta Canaán sumaq jallpʼaman apanan karqa.
Moisestaq nirqa: ‘¿Pitaq ñuqa kani chayta ruwanaypaqri? Risaq chayri, ¿pitaq kachamusunki?, nispa niwanqanku. ¿Imatataq kutichisaq?
Dios kutichirqa: ‘Kayta ninki: Tata Dios JEHOVÁ Abrahampata, Isaacpata, Jacobpata Diosnin qamkunaman kachamuwan. Kay sutiyqa wiñaypaq’, nispa.
Moisestaq nirqa: ‘Paykuna mana qam kachawasqaykita creewaptinkuri’, nispa.
‘¿Imataq makiykipi kachkanri?’, nispa Diosninchik tapurqa.
Moisestaq: ‘Juk kʼaspi’, nispa kutichirqa.
Diostaq nirqa: ‘Pampaman chuqaykuy’, nispa. Moisés chayta ruwaptintaq, kʼaspiqa katariman tukurqa. Chanta Jehová wak milagrotawan Moisesman rikuchirqa. Nirqa: ‘Makiykita uqllayniykiman churaykuy’, nispa. Moisés kikinta ruwarqa, urqhuspataq, makinta qhawarikurqa, ¡yuraq ritʼijina karqa! Lepra unquyman rikchʼakurqa. Chaymanta Jehovaqa juk milagrotawan ruwananpaq Moisesman atiyninta qurqa. Chaymanta nirqa: ‘Kay señalkunawan israelitakunaqa ñuqap kachasqay kasqaykita yachanqanku’, nispa.
Moisés wasinman kutipuytawan Jetrota nirqa: ‘Wawqisniyta waturikuq kutinaypaq saqinawaykita mañakuyki’, nispa. Jetroqa Moisés Egiptoman rinanta saqirqa.