44 yachachiy
Rahab 2 runata pakan
KAY 2 runaqa mana wañunankupaq ayqinanku tiyan. Israelmanta watiqaqkuna kanku, Rahab warmitaq paykunata yanapachkan. Rahabpa wasinqa Jericop pirqanpi kachkan. Qhawarina imaynachus chay karqa.
Israelitasqa Canaanman Jordán mayunta yaykunayachkarqanku. Chaypaq Josué iskay watiqaqkunataraq kachaspa: ‘Chay jallpʼata, Jericó llaqtatawan allinta qhawamunankuta’, nirqa.
Watiqaqkuna Jericó llaqtaman yaykuspa, Rahabpa wasinman rirqanku. Chayta reyman willaykunku: ‘Iskay israelitas chʼisi jamunku, jallpʼanchikta watiqaq’, nispa. Kayta uyarispa reyqa Rahabpa wasinman runata kacharqa: ‘¡Qamman jamusuq runasta urqhumuy!’, nispa. Rahabtaq watiqaqkunata techonpi pakaykuspa, nirqa: ‘Arí, iskay runas chamuwarqanku, chaywanpis maymantachus kasqankuta mana yachanichu. Laqhayaykuchkaptinña ripunku, llaqta punku wisqʼakunanpaq kachkaptin. Usqhayta rispaqa ichapis taripankichik’, nispa. Jinamanta usqhayta maskʼaq lluqsirqanku.
Ripusqankutawan, Rahab usqhayta techoman rispa watiqaqkunata nirqa: ‘Ñuqa yachani Jehová Diosniykichik kay jallpʼata qusunaykichikta. Ñuqayku uyariyku, Diosqa Puka quchata iskayman tʼaqasqanta, Egiptomanta lluqsimunaykichikpaq. Chantapis Sehón Og reykunata wañuchisqaykichikta. Chayrayku, imaynatachus ñuqa qamkunamanta khuyakuni, jinallatataq qamkuna ñuqamanta familiaymanta ima khuyakunaykichikta mañakuykichik’, nispa.
Watiqaqkunaqa Rahab mañakusqanta ruwarqanku. Chaypaqqa kayta ruwananta nirqanku: ‘Kay puka waskhata ventanaykiman warkhunki, aylluykitataq kay wasiykiman tantamunki. Ñuqayku Jericó llaqtaman kutimuptiykutaq, kay puka waskhata qhawaspa, mana pitapis wasiykimanta wañuchisqaykuchu’, nispa. Watiqaqkuna kutispa Josueman chayta willarqanku.