¿Imatataq qam ruwanayki tiyan?
50 ¿Chay kʼacha paraisopi wiñaypaq kawsayta munawaqchu?
Jina kaptinqa Diosninchik nisqanmanta astawan yachakunayki tiyan. Bibliatataq ñawiriyta yachanayki tiyan (Juan 17:3; Apocalipsis 1:3).
51 Jesusmanta astawan yachakuy (Deuteronomio 18:18, 19; Juan 3:16; Hechos 3:19-23).
52 Kʼacha kaqta ruway, Jehovatataq kasukuy (Romanos 6:17, 18, 22).
53 Yuyariy, Jehovaqa mana runata wañuchinanchikta munanchu (Éxodo 20:13; 1 Juan 3:11, 12).
54 Mana suwa kanachu (Éxodo 20:15; Efesios 4:28).
55 Qhariqa warmillanwan tiyakunan tiyan, payllawan puñunan tiyan, mana wak warmiwanqa (Éxodo 20:14, 17; 1 Tesalonicenses 4:3).
56 Dios nisqanmanjina, ¿Machkha warmiyuqtaq qhari kanan karqa? ¿Machkha unaytataq qusa warminwan tiyakunan karqa? (Génesis 2:22, 24; Mateo 19:5, 6; 1 Corintios 7:2, 10, 11).
57 Yuyariy, Jehovallata yupaychananchis tiyan (Mateo 4:10; 1 Corintios 8:6).
58 Lantikunaqa mana yanapawanchikchu. ¿Imaraykutaq? (1 Corintios 8:4).
¿Wasinchikpi lantikuna kananchu tiyan? ¿Allinchu kanman lantikunata yupaychay? (Deuteronomio 27:15; 1 Juan 5:21).
59 ¿Imaraykutaq mana qʼuwarakunachu tiyan? ¿Imaraykutaq mana layqaman rinachu tiyan? (Deuteronomio 18:10-13; Apocalipsis 21:8).
60 Saqra angelkuna Dioswan churanakunku. Paykunaqa layqakunaniqta runata chʼawkiyachkanku (Hechos 16:16).
61 Diosmanta mañakunanchik tiyan. Mañakuyqa Dioswan parlariy, chaypiqa kasukuyta munasqanchikta willarisunman, chantapis yanapayninta mañakuyta atisunman (Filipenses 4:6, 7).
62 Jesusta kasukunanchik tiyan, paypitaq iñinanchik tiyan (Hebreos 5:9; Juan 3:16).
63 Jesús ñuqanchikrayku wañusqanta yuyariy (Romanos 5:8).
64 Jesús janaqpachapi Reyninchik kasqanta yuyariy. Payta kasukunanchik tiyan (Filipenses 2:9-11; Apocalipsis 19:16).
65 Jesús yachakusqaykimanta wakkunaman willanaykita nirqa, chantapis Diosta kasukuyta munaqkuna bautizakunankuta nirqa (Hechos 2:38; Juan 4:7-15).
66 Chayrayku, qampis masiykikunaman yachakusqaykimanta willanayki tiyan (Mateo 10:32).
67 Ñawiriyta yachakunki chayqa, astawan yachakuyta atinki, wakkunatataq astawan yanapayta atinki (2 Timoteo 2:15).
68 Jesusqa wawakunatapis Diosta kasukunankupaq yachachirqa. Paykunawan parlarinanpaq tiempochakurqa (Mateo 19:13-15).
69 Tatamamaqa, wawasninkuta Diosta munakunankupaq, kasukunankupaq ima, yachachinanku tiyan (Deuteronomio 6:6, 7; Proverbios 6:20-22; Efesios 6:4).
70 May chhika religionkuna tiyan. Yachachisqankutaq mana Biblia nisqanmanjinachu. Chayrayku Jehovaqa, chay llulla religionkunamanta lluqsinanchikta niwanchik (Apocalipsis 18:4; Juan 4:23, 24).
71 Jallpʼapi Jehovamanta yachachikuchkan, paykuna Jehovamanta astawan yachachisunkuman. ¿Pikunataq kanku? (Hechos 15:13, 14; Romanos 10:14, 15).
72 Jehovamanta sutʼinchaqkuna kanku. Paykunaqa mana chiqninakunkuchu. ¿Imaraykutaq? Puraqmanta munanakusqankurayku (Isaías 43:10-12, Qheshwa Biblia; Juan 13:34, 35).
73 Jehovata munakusqankurayku, bautizakunku. Chayta ruwaspa tukuyman ñawpa saqra kawsayninta saqisqankuta rikuchinku, Diosta kasukuyta munasqankutapis rikuchinku (Hechos 2:41).
74 Jehovamanta sutʼinchaqkuna tʼikapacha paraisopi kawsakuyta suyanku (Salmo 37:9-11, 29).
¿Imatataq paykunawan khuska kawsanaykipaq ruwanayki tiyan? (Santiago 1:22, 25; 2:20-26).
75 Paykunawan khuska Jehovap munasqanta ruway. Paykunaqa Jehovata, Jesucristotapis munakunku, kasukunku ima. ¿Qamri paykunata munakunkichu? ¿Wakkunata Diosta riqsinankupaq yanapayta munankichu? (Juan 6:45-47).
76 Jehová, Jesucristo ima, munakususqankurayku, paraisopi wiñay wiñaypaq kawsanaykita munanku (Juan 3:16).
Kay qillqaramanta dibujokunata qhawarispa yachakusqaykirayku, wiñay wiñaypaq kay Jallpʼapi kawsayta munankichá. Astawan yachakuyta munanki chayqa, Jehovamanta sutʼinchaqkunawan parlariy. Manachayqa qillqamuy chayri pillawanpis qillqachikuy kay qillqarapi iskay kaq paginapi rikhuriqman.