8 rakʼiy
Diospa munayninqa, juntʼakuyta qallarinña
1, 2. ¿Imatataq Dios, ñakʼariykunata chinkachinanpaq wakichichkarqaña?
RUNASPA, supaykunaspa ima, Diosmanta karunchakuspa kamachiyninkuqa, may chhika watastaña, runaspaq may ñakʼariykunata apamun. Chaywanpis, Diosqa, mana ñakʼariykunasninchikta qhawachkallanchu. Astawanpis, runasta ñakʼariykunamanta kacharichinanpaq, munaynin juntʼakunanpaq ima, tukuy chay wataspi wakichichkarqaña.
2 Diosqa, juk Reinota sayarichiyta munasqanta, chay uqharikuy qallariptinpacha, Edén huertapi sutʼinchayta qallarirqa, chay Reinoniqtataq, Jallpʼata paraisoman tukuchinanta nirqa (Génesis 3:15). Aswan qhipamantaq, Jesús, piniqtachus Dios parlan, chay jamuq Reinomanta yachachirqa. Nirqataq, chay Reinolla kusiy kawsayta apamuyta atisqanta (Daniel 2:44; Mateo 6:9, 10; 12:21).
3. ¿Imaynatá Jesús, janaqpachamanta kamachiq gobiernota suticharqa, imaraykutaq?
3 Jesusqa, chay gobiernota ‘janaqpacha Reino’ nispa suticharqa, imaraykuchus janaqpachamanta kamachimunqa (Mateo 4:17). Chantapis, Jehová, chay gobiernota sayachiq kasqanrayku, “Diospa reinon” nispa sutichallarqataq (Lucas 17:20). Watas pasasqanmanjinataq, chay Reinopi kamachiqkunamanta, imatachus chay Reino ruwananta ima, yachakunanpaq, Dios, wakin runasta chay Reinomanta qillqanankupaq yuyaycharqa.
Jallpʼata kamachiq Rey
4, 5. ¿Imaynatá Dios, Jesusta, Reinonmanta Rey kananpaq akllasqanta rikuchirqa?
4 Jesús, Diospa Reinonmanta Reypaq profeciasninta juntʼasqanmantaqa, iskay waranqa wataña pasan. Pay, janaqpacha Reinop Reynin kananpaq akllasqa karqa, runasta kamachimunanpaq. Wañupuptintaq, Dios kawsarichirqa, janaqpachapi kawsananpaq, mana jaykʼaq wañunanpaq ima. Achkha runas, Jesús kawsarisqanta rikurqanku (Hechos 9:1-9; Romanos 1:1-4; 1 Corintios 15:3-8).
5 Chantá, Jesusqa “Diospa pañanman tiyaykukorqa” (Hebreos 10:12). Chaypitaq, Dios, Reinopi kamachinanpaq atiyta jaywanankama suyakurqa. Chay ruwasqanqa, kay Salmo 110:1 qillqasqa profeciata juntʼarqa, chaypi nin: “Kay pañaypi tiyarikuy, enemigosniykita chakisniyki uraman churanaykama”.
6. ¿Imaynatá Jesús, Diospa Reinonmanta kamachiq kananpaq wakichisqa kasqanta rikuchirqa?
6 Jesús, Jallpʼapi kachkaspataq, Rey kananpaq wakichisqa kasqanta rikuchirqa. Qhatiykachasqa kaspapis, Diosman juntʼa sunqu kayta akllarqa. Chayta ruwaspataq, Satanás llulla kasqanta rikuchirqa, imaraykuchus Satanasqa, ni mayqin runapis, juchaman tanqasqa kaspaqa Diosman juntʼa sunqu kananta nirqa. Chaywanpis, Jesús mana juchayuq ‘qhipa kaq Adanqa’, Dios, runasta ruwaspa mana pantasqanta rikuchirqa (1 Corintios 15:22, 45; Mateo 4:1-11).
7, 8. ¿Imastataq Jesús, Jallpʼapi kachkaspa runaspaq ruwarqa, imatataq chay rikuchirqa?
7 Jesusqa, Jallpʼapi kachkaspa runata ñakʼariyninkupi yanaparqa, ni mayqin runapis, jinata pisi watasllapi ruwayta atirqachu. Chantapis, Jesusqa, Diospa espíritu santonniqta atiyta japʼisqanwan, suchusta, ñukʼusta, juqʼarasta, upasta, mana rikuqkunata, wak unqusqasta ima, sanoyachirqa. ¡Wañusqastapis, kawsarichimurqa! Chay milagrostaq, imastachus runaspaq, janaqpachamanta kamachimuchkaptin, ruwananta rikuchirqa (Mateo 15:30, 31; Lucas 7:11-16).
8 Jesús, Jallpʼapi kachkaspa runaspaq ruwasqanmanta, discípulo Juan, jinata nirqa: “Jesuspa ruwasqasnenqa aswan ashkharaj tiyan. Chaykunachus ujmanta uj qhelqakunman chayqa, yuyani tukuynin kay pacha mana wakinmanchu chay qhelqasqa librosta churanapaj” (Juan 21:25).a
9. ¿Imaraykutaq llampʼu sunquyuq runas, Jesusman kʼaskakuq kanku?
9 Jesusqa, kʼacha, khuyakuyniyuq ima karqa, chantapis mayta runata munakuq. Wakchasta, pisipaq qhawasqasta ima, yanapaspapis, qhapaqkunata, jatunpaq qhawasqa runasta ima, mana chiqnikurqachu. Llampʼu sunquyuq runastaq, waqyariyninta kasukurqanku, pay nirqa: “Noqaman jamuychej, tukuy saykʼusqa kajkuna, llasa qʼepiyojkuna ima, noqataj samarichisqaykichej. Yugoyman churakuychej, yachaqakuychejtaj noqamanta. Noqaqa kʼacha, llampʼu sonqotaj kani, almasniykichejpajtaj samakuyta tarinkichej, imaraykuchus yugoyqa llampʼulla, qʼepiypis chhallalla”, nispa (Mateo 11:28-30). Diosta manchachikuq achkha runas, payman kʼaskakurqanku, kamachiq kanantataq suyarqanku (Juan 12:19).
Jesusqa, mana sapallanchu kamachimunqa
10, 11. ¿Pikunataq Jesuswan khuska janaqpachamanta kamachimunqanku?
10 Imaynatachus kay Jallpʼapi gobiernospiqa, mana jukllachu kamachin, kikillantataq Diospa Reinonpiqa, mana jukllachu kamachinqa. Manaqa, wakkunapis yanapanqanku, imaraykuchus, Jesús, yachachisqasninman paywan khuska janaqpachamanta kamachimunankuta nirqa (Juan 14:2, 3; Apocalipsis 5:10; 20:6).
11 Chayrayku, Diosqa, Jesustajina wakin runasta kawsarichimurqa janaqpachaman rinankupaq. Paykunataq, runaspaq wiñay tʼinkasta apamuq Reinopi kamachinqanku (2 Corintios 4:14; Apocalipsis 14:1-3). Rikunchikjina, Jehovaqa, kay tukuy wataspi, runaspaq allin kawsayta apamuq Reino sayananpaq, tukuy imata wakichichkarqaña.
Runap kamachiyninpa tukukuynin
12, 13. ¿Imatataq Diospa Reinon tumpamantawan ruwanqa?
12 Diosqa, iskay chunka siglo nisqapi, imachus kay Jallpʼapaq munaynin kasqanta rikuchinña. Kay folletomanta jisqʼun rakʼiyninpi rikusunjina, Diospa Reinonqa, 1914 watapi sayachisqa karqa, tumpamantawantaq Satanasta, saqra pachantawan, chinkachinqa. Arí, chay Reinoqa, ‘enemigosnin ukhupi kamachinanpaq’ wakichisqaña kachkan (Salmo 110:2).
13 Chay Reinomanta parlaspa Daniel 2:44, nin: “Chay reykuna [kunan tiempomanta kamachiqkuna] kamachishajtinku, janaj pachapi kaj Dios uj reinota [janaqpachapi] sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu [nisunman manaña juktawan runas kamachinqankuchu]. [Diospa Reinontaq] tukuynin waj reinosta tukuchenqa, chay atipaj reinotajri wiñaypaj sayanqa”.
14. Runap kamachiynin Jallpʼamanta chinkaptin, ¿imastaq runaspaq kanqa?
14 Runap kamachiynin chinkaptinqa, Diospa Reinollan Jallpʼata kamachinqa. Chay Reino janaqpachamanta kamachimusqanraykutaq, ni mayqin runapis chinkachiyta atinqachu. Kamachiytaq, qallariypijina Diospa atiyninpi watiqmanta kanqa. Chantapis, chay Reinolla Jallpʼata kamachisqanrayku, ni pipis llulla religionkunawan, runap qhasi yachachiyninwan, politicospa llullakuyninkuwan ima, chʼawkiyasqachu kanqa. Chaykunaqa, manaña kanqachu (Mateo 7:15-23; Apocalipsis 17 tʼaqamanta 19 tʼaqakama).
[Sutʼinchaynin]
a Jesuspa kawsayninmanta astawan yachanaykipaq, El hombre más grande de todos los tiempos, nisqa librota ñawiriwaq. Kay librotaqa, Jehovamanta sutʼinchaqkuna 1991 watapi, urqhunku.
[18 paginapi dibujo/foto]
Jesusqa, kamachimuchkaptin imastachus runaspaq ruwananta rikuchinanpaq, Jallpʼapi kachkaspa, unqusqasta sanoyachirqa, wañusqasta kawsarichirqa ima
[19 paginapi dibujo/foto]
Janaqpacha Reinoqa, runap kamachiyninta chinkachinqa