Kay allin willaykunamanta willasuyta munanku

JESÚS Jallpʼapi kachkaptin, yachachisqasnin tapurqanku: “Ima señaltataj rikuchiwasqayku kutimunaykimanta, kay pachaj tukukuyninmantawan?”, nispa. Jesustaq, jatuchaq maqanakuykuna, yarqhaykuna, unquykuna, jallpʼa ikhakuykuna, saqra ruwaykuna ima, kanqa nispa kutichirqa. Chantá, llulla yachachiqkuna achkha runasta pantachinankuta, chiqa cristianos chiqnisqas, qhatiykachasqas ima, kanankuta, runap munakuyninpis chirayapunanta, nillarqataq. Tukuy kay imas rikhuriyta qallarisqantaq, Cristop kutimuynin kaypiña kasqanta, janaqpacha Reino qayllamusqantaña ima, rikuchinan karqa. Kaytaq may sumaq willay. Chayrayku Jesús, señalmanta parlaspallapuni nirqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachama tukukoyqa jamonqa” (Mateo 24:3-14).

Kay tukukuy pʼunchaykunapi, saqra ruwaykuna kasqanqa, mana allinchu, chaywanpis Cristop kutimuynin kaypiña kasqanqa, may allin. Tukuy kay saqra ruwaykunaqa, may suyasqa 1914 watapi juntʼakuyta qallarirqa, chay watapitaq gentilespa tiempon tukukurqa, runap kamachiynintaq Cristop waranqa wata kamachiyninman pasayta qallarichkarqa.

Kay Salmo 110:1, 2, Apocalipsis 12:7-12, nisqanmanjinaqa, Cristop kamachiynin mana jukllatachu qallarinan karqa, manaqa janaqpachapi Diospa pañanpi tiyaykusqa suyakunanraq karqa, kamachiqjina churasqa kanankama. Chantapis kay pʼitikunaqa, janaqpachapi jatun maqanakuy kasqanrayku, Satanás Jallpʼaman wikchʼuchikamusqanta nin. Chaymantapachataq, achkha llakiykuna kay pachapi yapaykukunan karqa. Cristotaq, enemigosninpa chawpinpi kamachiyta qallarinan karqa. Kay saqra pachap tukukuyninqa, “manchay ñakʼariy” nisqawan qallarinqa, Armagedón nisqa jatun maqanakuypitaq tukukunqa, chaymantataq, Cristop waranqa wata kamachiynin qallarinqa (Mateo 24:21, 33, 34; Apocalipsis 16:14-16).

Biblia nin, “yachanallaykitaj tiyan kayta: Qhepaman manchay sajra pʼunchaykuna jamonqa. Runasqa kay jina kanqanku: Imallatapis paykunallapaj munajkuna, qolqeta munakojkuna, runaykachajkuna, tukuypa contranta millayta rimajkuna, jatunchakojkuna, tatasninkuta mana kasojkuna, mana graciasta qoyta yachajkuna, Diosta mana manchachikojkuna, mana sonqoyojkuna, rumi sonqos, qhasimanta tumpajkuna, aychaj sajra munayninta mana atipayta atejkuna, mana khuyarispa sajrata ruwajkuna, allin kajta chejnejkuna, wasanchajkuna, mana qhawarikuspa imallatapis ruwarparejkuna, may kasqankuta yuyakojkuna, kay pachaj kusikuyninta astawan munakojkuna Diosta munakunankumanta nisqaqa. Chaykunaqa Diosta yupaychajkunaman rijchʼakullanku, kawsasqankuwanri, Diospa atiyninta qhesachanku. Chaykunawanqa ama ima ruwanayki kachunchu” (2 Timoteo 3:1-5).

Wakinqa, kay saqra kawsayta rikuspa, karqapuni ninku, chaywanpis, ni jaykʼaqpis tukuy pachantinpi kunanjina rikukurqachu. Runap kawsayninmanta qillqaqkunapis, runap kawsaynin, 1914 watamantapacha ni jaykʼaqjina tikrakusqanta ninku (7 paginata qhawariy). Chayjina ñakʼariykunaqa, ni jaykʼaqpis rikukurqachu. Chantapis Cristoqa, tukukuy pʼunchaykunapaq kay señalmanta parlallarqataq: Cristop kutimuyninmanta, kamachiyninmanta ima, willakunan karqa, kunantaq, ni jaykʼaqjina tukuy suyuspi chay ruwakuchkan. Jehovamanta sutʼinchaqkunapis, willasqankurayku may qhatiykachasqas karqanku. Nazispa kamachiyninpipis, achkha wañurqanku. Kunankamataq, achkha suyuspi Bibliamanta willaqta mana saqinkuchu, wak suyuspitaq japʼichisqas, wisqʼasqas, maqasqas ima, kanku. Kay ruwaykunaqa, Jesús nisqanmanjinapuni juntʼakuchkan.

Apocalipsis 11:18 nisqanmanjina, Jehovamanta sutʼinchaqkunap contranta “tukuy naciones phiñarikorqanku”, chayraykutaq Jehovap ‘phiñakuyninpis’ tukuy suyuspaq kanqa. Dios kay pʼitipi nillantaq, “kay pachata phirejkunatapis tukuchina[nta]”. Jallpʼanchikqa, manaña runa kawsananpaqjinaman tukuchkan, chayqa, ñawpaqta mana rikukurqachu, chaywanpis chayjinaman chayachkanchik. Yachayniyuq runasqa, runas Jallpʼata chʼichichallaptinkupuniqa, manaña kawsanapaqjina kananta ninku. Chaywanpis Jehovaqa, Jallpʼata “ruwarqa, [...] kawsayniyojkuna chaypi tiyakunankupaj”, chayrayku, niraq Jallpʼata astawan chʼichichachkaptinku, paykunata chinkachinqa (Isaías 45:18).

REINOP KAMACHIYNINQA, JALLPʼAPAQ TʼINKASTA APAMUNQA

Diospa Reinon Jallpʼata kamachimuptin, runas chaypi kawsakunankuta uyarispa wakinqa, mana creenkuchu, imaraykuchus paykunata kʼacha runas janaqpachaman rinankuta yachachinku. Chaywanpis, Bibliaqa, yupasqa runaslla janaqpachaman rinankuta, Jallpʼapitaq may chhika runas wiñaypaq kawsanankuta nin (Salmo 37:11, 29; Apocalipsis 7:9; 14:1-5). Daniel libropi juk profeciaqa, Cristoniqta Diospa Reinon tukuy Jallpʼata kamachinanta nin.

Chay profeciapiqa, Cristop Reinonta, “orqomanta” —Diospa kamachiyninmanta— juk rumi urmamuqwan kikinchakun. Chay rumitaq, juk lantip —runaspa atiyniyuq kamachiqkunaman—, chakisninman chayaspa chay lantita phirirpan, phirirpaytawantaq, chay rumiqa, “uj jatun orqoman tukorqa, tukuynin jallpʼamantaj juntʼaykorqa”. Profecía nillantaq: “Chay reykuna kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajri wiñaypaj sayanqa” (Daniel 2:34, 35, 44).

Jehovamanta sutʼinchaqkunaqa, chay Reinomanta, runas paraíso Jallpʼapi wiñaypaq kawsanankumanta ima, parlasuyta munanku. Kay tiempopi may chhika runas kawsaqkuna, may achkha wañusqaspis, chay paraisopi wiñaypaq kawsayta atinqanku. Cristop waranqa wata kamachiyninpiqa, Jehová imatachus Jallpʼapaq, runapaq ima, munasqan juntʼakunqa. Chay paraisopiqa, achkha llamkʼayniyuq kasqankurayku, tukuy runas kusisqa kawsakunqanku. Diosqa, imaynatachus Edén huertapi, Adanman juk llamkʼayta qurqa, jinallatataq runasman Jallpʼata, uywasta, sachʼasta ima, qhawanankuta kamachinqa. Jinamanta, runasqa “makisninkoj tarpusqanta mikhurikonqanku” (Isaías 65:22, Génesis 2:15).

Jesús jinata mañakurqa: “Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis”, nispa. Chay mañakuynin juntʼakuptin, imaynachus chay wiñay kawsay kananta, Bibliamanta achkha pʼitikuna sutʼinchawanchik (Mateo 6:10). Chaywanpis, kayllata ñawirisun: “Jinapi kamachina tiyanamanta sinchʼita qhaparejta uyarerqani: Kunanqa Diospa tiyakuynin runas ukhupi kashan, paytaj paykunawan khuska tiyakonqa. Runasqa paypa ayllun kanqanku, Diostaj paykunaj Diosninku kanqa. Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu, nispa. Kamachina tiyanapi tiyasqa kashajtaj nerqa: Noqa tukuy imata mosojyachini, nispa. Nillarqataj: Kayta qhelqay, imaraykuchus kay palabrasqa maychus kajpuni, cheqataj kanku” (Apocalipsis 21:3-5).

[15 paginapi sutʼinchaynin]

“Manchay sajra pʼunchaykuna”,

CHAYWANPIS, “tukukoyqa jamonqa”

[18 paginapi dibujo/foto]

Países Bajos

[18 paginapi dibujo/foto]

Nigeria