13 Yachaqana

May chhika runa Jehovap kamachina tiyanan ñawpaqinpi

1. a) Unay chiqa sunqu runakuna, 144.000 akllasqakuna ima, ¿imanakunanku karqa tʼinkakunata japʼinankupaq? b) ¿Imatataq “may chhika runas” kunan suyanku?

ABELMANTA Juan bautistakama, tukuy chiqa sunqu runakunaqa Diospa munayninta ruwarqanku. Chaywanpis tukuy paykunaqa, paraíso Jallpʼapi kawsarimuyta suyaspa wañurqanku. Kay 144.000 janaqpachapi Cristowan kamachinapaq akllasqakunaqa, janaqpachaman ripunankupaqqa wañunallankutaq tiyan. Chaywanpis Apocalipsis 7:9 kay tukukuq pʼunchaykunapi “may chhika runas” kananta willawanchik, paykunaqa mana wañuspalla wiñay wiñaypaq tʼikapacha Jallpʼapi tiyakunqanku. Qamri, ¿paykunawanchu kachkanki?

¿Pikunataq kay ‘may chhika runas’ kanku?

2. Kay Apocalipsis 7:9 nisqanmanjina, ¿imaynatá sutʼimanta pikunachus ‘may chhika runas’ kasqankuta yachanchik?

² Kay 1923 watapi Jehovata kasukuqkuna, Jesús kay Mateo 25:31-46 pʼitikunapi ‘ovejasmanta’ parlasqanqa, kay Juan 10:16 pʼitipi “wak ovejas” nisqanwan juklla kasqankuta sutʼincharqanku. Kay ovejas nisqataq wiñay wiñaypaq tʼikapacha Jallpʼapi kawsaq runakuna kanku. Chantapis kay 1931 watapi Ezequiel 9:1-11 pʼitipi, señalniyuq runasqa, chay wiñaypaq kawsaqkuna runallataq kasqankuta sutʼinchakurqa. Astawanpis 1935 watapi yachakurqa chay ‘may chhika runasqa’, Jesús nisqanmanjina, ‘wak ovejasmanta’ kasqankuta. Kunanqa kay “may chhika runasqa” waranqa waranqa kanku.

3. Kay may chhika runas “kamachina tiyanaj ñawpaqenpi” kaspa, ¿janaqpachapi kasqankutachu niyta munan?

³ Kay Apocalipsis 7:9 pʼitipiqa, kay may chhika runas, Diospa ‘kamachina tiyanan ñawpaqenpi’ kasqankuta nin. Kaytaq mana janaqpachapi kasqankuta niyta munanchu, manaqa Dios paykunata qhawachkasqanta niyta munan (Salmo 11:4). Astawan sutʼinchanapaqqa, kaypi tʼukurina; paykunaqa “mana yupay atina” kanku, mana yachakunchu machkhachus kanku, mana chayman jinataq Apocalipsis 7:4-8; Apocalipsis 14:1-4, niwanchik, janaqpachaman riqkunaqa 144.000 kasqankuta.

4. a) ¿Imataq chay “jatun ñakʼariy”, maymantachus chay may chhika runas lluqsinku chay? b) Apocalipsis 7:11, 12 nisqanmanjina, ¿pikunataq chay ‘may chhika runasta’ qhawanku, paykunawantaq Diosta yupaychanku?

⁴ Chantapis Apocalipsis 7:14 niwanchik: “Kaykunaqa chay jatun ñakʼariy tiempomanta llojsimujkuna kanku” nispa. Kay runakunaqa aswan jatun ñakʼariypipis mana wañunqankuchu (Mateo 24:21). Paykuna tukuy sunquwan, may kusisqas, mana wañusqankumanta Diosta pachis niptinku, janaqpachapi tukuy kawsaqkuna, paykunawan khuska Jehovata jinata yupaychanqanku: “Ajina kachun. Jatumpaj qhawasqa kay, jatunchasqa kay, agradecekuy, kallpa, atiytaj Diosninchejman wiñay wiñaypaj kachun. Ajina kachun”, nispa (Apocalipsis 7:11, 12).

¿Imatataq mana wañunankupaq ruwanku?

5. Salvakuyta munaqkuna, ¿imatataq ruwananku tiyan?

⁵ Chay jatun ñakʼariy chayamuptinqa Jehová may chhika runasta mana wañunankupaq jarkʼanqa, chiqan kayninta rikuchinanpaq. Bibliaqa sutʼimanta imayna runachus, mana wañuqkuna kanankuta niwanchik. Chayrayku salvakuyta munaqkuna, kunanpacha allin runaman tikrakunanku tiyan. ¿Imatataq ruwananku tiyan?

6. ¿Imaraykutaq may chhika runasta ovejaswan kikinchasunman?

⁶ Ovejasqa mana phiñakunkuchu, kasukunku. Chayrayku Jesús “waj ovejasniy tiyapullawantaj mana kay tropamanta kajkuna”, nispa nichkaptin, kay Jallpʼapi kawsanapaq, kasukuq mana phiñakuq runasmanta parlachkarqa; mana janaqpachapi kawsaqkunamantachu. Nirqa: “Ñoqaqa ovejasniyta rejsini, paykunataj parlasqayta uyariwanku, qhepaytataj jamunku”, nispa (Juan 10:16, 27). Chay runakunaqa parlasqanta allinta uyarinku kasukunkutaq, jinamanta discipulosninman tukunku.

7. ¿Ima kʼacha kaykunatataq Jesusta qhatiqkuna puquchinku?

⁷ ¿Ima kʼacha kaykunatataq Jesusta qhatiqkuna puquchinanku tiyan? Diospa rimaynin niwanchik: “Ñawpa sajra kawsayniykichejpi karqa, chay mawkʼa runamanta tʼaqakuychej, [...] chay mosoj runa kaywan pʼachawan jina pʼachallikuychej, mayqenchus Diosman jina ruwasqa, cheqan kaypi, cheqamanta santo kaypiwan kashan, chaywan”, nispa (Efesios 4:22-24). Cristianokunaqa mana tʼaqanakunankupaq kay kʼacha kaykunata puquchinku, “munakuyniyoj kay, kusikuyniyoj kay, sonqo tiyasqa kay, pacienciayoj kay, khuyakuyniyoj kay, kʼacha kay, nisqanta juntʼaj kay, llampʼu sonqo kay, sajra munayninwan mana atipachikoj kay ima” (Gálatas 5:22, 23).

8. ¿Imatataq may chhika runas muchunku kay Jallpʼapi akllasqakunata yanapasqankurayku?

⁸ Janaqpachapaq akllasqakunaqa pisilla kanku, kay may chhika runastaq paykunata yanapanku Diosmanta runaman yachachispa (Mateo 24:14; 25:40). Wak ovejakunaqa ñakʼarinankuta yachaspapis, akllasqakunata yanapanku. Kay tukukuq qhipa pʼunchaykuna qallarichkaptin, Cristoqa angelesninwan, Satanasta, supayninkunatawan janaqpachamanta wikchʼumurqanku. ¿Imatataq chay apamuwanchik? Biblia niwanchik: “Ay, kay pacha jallpʼa patapi [...], imaraykuchus Kuraj Supayqa manchay phiñasqa qankunaman uraykʼamun, yachaspa paypaj pisi tiempollaña kasqanta” (Apocalipsis 12:7-12). Chayrayku kay saqra pachap tukukuynin chayamuchkaptin, Satanasqa astawan Diosta kasukuqkunata ñakʼarichichkan.

9. Diosta kasukuqkuna runaman willasqankurayku, ¿yapakunkuchu, imaraykutaq?

⁹ Chayjinatapuni qhatiykachachikuspapis mana willayta saqinkuchu. Diospa Reinonmanta willaqkunaqa ñawpa Guerra Mundial nisqa tukukuchkaptin, pisilla kasqankumanta, kunankama waranqa waranqaman yapakunku, Jehová jinata willarqa: “Mana mayqen arma ruwasqankupis qanta chinkachisunampaj jina kanqachu”, nispa (Isaías 54:17). Juk runa judiospa jatun juntanmanta, mana pipis Diospa ruwasqanta chinkachiyta atinanta nirqa. Payqa Jesuspa tiemponpi discipulosmanta parlaspa fariseosman nirqa: “Kacharipuychej. Kay yachachisqanku, ruwasqasninku ima runaspallata kashkan chayqa, manakajman tukuponqa. Diosmanta kashan chayrí, mana atiwajchejchu paykunata atipayta. Pajtataj Diospa contrampi sayashaj rikhuriwajchej”, nispa (Hechos 5:38, 39).

10. a) ¿Imataq chay may chhika runaspa señalnin? b) ¿Imaynatá Diosta kasukuqkuna janaqpachamanta parlakusqanta uyarinku?

¹⁰ Kay may chhika runaqa, señalniyuq kanku (Ezequiel 9:4-6). Kay ‘señalqa’ Jehovaman qukusqankuta rikuchin, Jesuspa qhipanta purinankupaq bautizakunku, chantapis astawan kʼacha runa kayta munanku. Chay runakunaqa llulla religionta saqinankupaq ‘janaqpachamanta kay parlakusqanta uyarinku’: “Llojsimuychej chay llajtamanta, noqajta kajkuna. Ama chay llajtaj juchasninman chhapukuychejchu, ama paywan khuska castigasqa kanaykichejpaj” (Apocalipsis 18:1-5).

11. ¿Imaynatá kay may chhika runakuna Jehovap munayninta kasukusqankuta rikuchinku?

¹¹ Astawanpis Jesús paywan puriqkunata nirqa: “Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:35). Kay pachapi religionniyuq runaqa, puraqmanta wañuchinakunku, wakinkunaqa wak llaqtayuq kasqankuraykulla maqanakunku. Diospa rimayninqa niwanchik: “Kay jinapi yachakun Diospa wawasninchus, chayrí Kuraj Supaypatachus kasqankoqa. Mana cheqan kajta ruwajqa mana Diospa wawanchu, nitaj hermanontapis mana munakojqa [...]. Ujkuna ujkunawan munanakunanchej. Mana Caín jinachu kananchej; payqa Kuraj Supaymanta kaspa, wawqenta wañucherqa”, nispa (1 Juan 3:10-12).

12. ¿Imatataq Jehová mana allin puquq religionkunawan ruwanqa?

¹² Jesús yachachirqa: “Ajinata, allin sachʼaqa sumaj poqoykunata poqon; mana walej sachʼarí, manallataj allin poqoykunatachu poqon. Sumaj sachʼaqa mana atinchu poqoyta mana walej poqoykunataqa, nillataj mana allin sachʼapis allin poqoyta atinchu. Ima sachʼallapis mana walejta poqospaqa, kʼutusqa kanqa, ninamantaj kanasqa. Ajinata, ruwasqasninkunejta llulla profetastaqa rejsinkichej”, nispa (Mateo 7:17-20). Kay pachapi religionespa puquyninqa mana allin sachʼas kasqankuta rikuchin. Chayrayku Jehovaqa, jatun ñakʼariypi chaykunata chinkachinqa (Apocalipsis 17:16).

13. ¿Imatataq kay may chhika runas salvakunankupaq ruwanku?

¹³ Apocalipsis 7:9-15 pʼitikunaqa, ima ruwaspachus kay may chhika runa salvakunankuta rikuchiwanchik. Tukuy “paykunaqa kamachina tiyanaj ñawpaqenpi” kachkanku, juk runajinalla Diosllata kamachiqninkutajina qhawachkanku. “Pʼachasninkuta yurajyacherqanku, corderoj yawarnimpi tʼajsaspa”. Arí, jinamanta paykuna Jesús wañusqanta jatunpaq qhawasqankuta rikuchinku (Juan 1:29). Yakupi pʼulltiykukuspa bautizakunku, Diosman qukusqankuta rikuchinankupaq, jinamanta Diospa ñawpaqinpi llimphu kanku; chaytaq yuraq pʼachasninkuwan ninakun, paykunaqa “tuta pʼunchay” Diosta yupaychanku. Qamri ¿tumpatawan allinchakuyta atiwaqchu paykunaman rikchʼakunaykipaq?

Kunanpaq tʼinkakuna

14. ¿Ima tʼinkakunatataq Jehovata kasukuqkuna kunan japʼinku?

¹⁴ Ichapis rikunki ima tʼinkakunatachus Jehovata kasukuqkuna kunan japʼinku. Qampis, Diosninchik ruwananmanta uyarispa, may sumaq tʼinkasninmanta yacharqanki. Kunantaq imatachus ruwanaykita yachanki: Diosta kasukunayki tiyan, qhipaman wiñay wiñaypaq tʼikapacha Jallpʼapi kawsanaykipaq. Ari Rey Jesusqa may chhika runasta ‘kawsaq yaku juturisman pusanqa’ (Apocalipsis 7:17).

15. Jehovamanta sutʼinchaqkuna mana kay pachap ruwayninwan chhapukuspa, ¿ima tʼinkakunatataq tarinku?

¹⁵ Kunanqa kay may chhika runas tukuy Jallpʼapi munanakunku, yanapanakunku, mana tʼaqanakunkuchu. Tukuypis Diospa munayninta, kamachiyninta, kawsanapaq yuyaychayninta ima, Bibliamanta yachakunchik. Chayrayku mana runap yachayninwan tʼaqachikunchikchu. Chantapis allinta kawsananchikpaq Dios kamachisqanta kasukunchik (1 Corintios 6:9-11). Jinamanta Diospa llaqtanqa, mana kay pachap maqanakuyninpi, tʼaqanakuyninpi, khuchichakuyninpi ima satʼikunchu, manaqa yachasqankuwan may kusisqa kawsanku. Qhawariy ima tʼinkakunatachus kay Isaías 65:13, 14 rikuchiwanchik.

16. Kay pachapi mayta ñakʼarispapis, ¿ima tʼinkakunatataq may chhika runas suyanku?

¹⁶ Jehovata kasukuqkuna pantaq runallataq kanku. Kay pachap llakiynin paykunatapis llakichin, maqanakuykuna kaptinqa, paykunapis ñakʼarinku, unqunku, wañunku ima. Chaywanpis Diospa tʼikapachanpi kawsayta suyanku, chaypitaq: “[Diosqa] tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu” (Apocalipsis 21:4).

17. Mayta ñakʼarispapis, ¿ima tʼinkakunatataq qhipaman japʼisunchik?

¹⁷ Chaywanpis machuyaspapis, unquspapis, ima ñakʼariypipis, wañunki chayqa, Jehová paraisopi kawsarichimusunqa (Hechos 24:15). Cristo Waranqa watata Kamachichkaptin, Diospa tukuy tʼinkanta japʼiyta atinki. Astawantaq payta munakunki (Isaías 25:6-9). ¿Manachu may sumaq kawsay Diospa llaqtanpaq kanqa?

Yuyarinapaq

• ¿Maymantataq kay may chhika runa lluqsinku?

• ¿Imatataq kay may chhika runawan khuska kanapaq ruwananchik tiyan?

• ¿Imatataq kay may chhika runaspaq kunan tʼinkakunamanta ninki? ¿paraisopi tʼinkakunamantari?

[123 paginapi dibujo/foto]

Kay may chhika runakuna khuska kʼata chiqa Diosta yupaychanku