14 Yachaqana
¿Imaynatá Jehová llaqtanta kamachin?
1. ¿Imatataq Biblia Jehovap llaqtanmanta niwanchik, imaraykutaq chayta yachananchik tiyan?
¿DIOSQA llaqtayuqchu? Arí, Bibliaqa imaynachus janaqpachapi Diospa llaqtan wakichisqa kasqanta rikuchiwanchik (Ezequiel 1:1, 4-14; Daniel 7:9, 10, 13, 14). Janaqpachapi Diospa llaqtanta manapis rikunchikchu, chay llaqtaqa kay Jallpʼapi Diosta kasukuqkunata yanapachkan (2 Reyes 6:15-17). Jehovap llaqtanqa mana janaqpachallapichu, manaqa kay jallpʼapipis kachkan, chaytataq rikuyta atinchik. Bibliaqa imaynachus chay llaqta kasqanta, imaynatachus Jehová kamachichkasqanta ima yachachiwanchik.
¿Mayqintaq Diospa llaqtanri?
2. ¿Ima musuq llaqtata Dios akllarqa?
2 Israel llaqtaqa 1.540 watakunalla, Diospa llaqtan karqa (Hechos 7:38). Mana paypa kamachisqanta kasukusqankurayku, Churintataq wañuchisqankurayku, Diosqa paykunata qhisacharqa. Jesusqa judiosta nirqa: “Qhawaychej: Wasiykichejqa chʼusajpacha qhepakonqa”, nispa (Mateo 23:38). Chayrayku Jehovaqa wak llaqtata akllakuspa paykunawan juk tratota ruwarqa. Diosqa chay llaqtapi kanankupaq 144.000 runakunata akllarqa, Jesuswan khuska janaqpachapi kamachinankupaq (Apocalipsis 14:1-4).
3. ¿Imaynamanta Diosninchik 33 watapi Pentecostespi, wak llaqtata akllakusqanta rikuchirqa?
3 Chay musuq llaqtaman yaykuqkunataqa, Jehová 33 watapi Jesús wañusqanmanta phichqa chunka pʼunchayninman santo espiritunwan akllarqa. Jinata Biblia chaymanta willawanchik: “Pentecostés nisqa pʼunchay chayamojtenqa, tukuyninku uj cheqallapi tantasqa kasharqanku. Chantá ujllata janaj pachamanta uj sonay uyarikorqa, sinchʼitapis wayramushanman jina. Chay sonayqa wasi ukhuman juntʼaykorqa, maypichus paykuna kasharqanku, chayman. Paykunaman nina lawray qallus jina rakʼisqa rikhurerqa, tiyaykorqataj sapa ujpa patanman. Tukuyninkutaj Espíritu Santowan juntʼasqa karqanku”, nispa (Hechos 2:1-4). Jinamanta Diosqa santo espiritunwan rikuchirqa ima runakunatachus Jesusniqta apaykachananta.
4. ¿Pikunataq Jallpʼapi Jehovap llaqtan kunan kanku?
4 Kunanqa chay 144.000 runakunamanta pisillaña Jallpʼapi puchunku. Biblia nisqanmanjinataq “may chhika runas” ‘wak ovejasmanta’ chay puchuqkunata yanapachkanku. Jesusqa, Sumaq Michiqjina, kay iskay qututa jukllaman tantan, juk tropalla juk michiqllawan kanankupaq (Apocalipsis 7:9; Juan 10:11, 16). Tukuy paykunaqa juk tantasqa llaqtalla kanku, Jallpʼapi Jehovap llaqtan.
¿Imaynatá Diospa llaqtan kamachisqa kachkan?
5. ¿Pitaq Diospa llaqtanta kamachin, imaynatá chayta ruwan?
5 Bibliapi, “kawsashaj Diospa Iglesian” nispaqa, Jehovallataq llaqtanta kamachisqanta sutʼinchawanchik. Payqa Jesusniqta llaqtanta kamachin, Jesusta llaqtanmanta umatajina churan, chantapis Bibliata qillqachin, munasqanta ruwananchikpaq (1 Timoteo 3:14, 15; Efesios 1:22, 23; 2 Timoteo 3:16, 17).
6. a) ¿Imaynatá apostolespa pʼunchayninpi Dios llaqtanta kamachichkasqanta rikukurqa? b) ¿Imaynatá yachanchik, Jesús Diospa llaqtanmanta umallanpuni kasqanta?
6 Dios llaqtanta kamachichkasqanta imaymanamanta rikukurqa: Pentecostespi (Hechos 2:14-18, 32, 33); chantapis, Diospa angelnin África suyukunapi willakunanpaq kamachichkaptin; chantapis, Saulo Diosman kutirikuchkaptin, chay pachaqa Jesús janaqpachamanta Sauloman imatachus ruwananta nirqa; chantapis, Pedro mana judiokunaman willayta qallarichkaptin ima (Hechos 8:26, 27; 9:3-7; 10:9-16, 19-22). Chaymanta aswan qhipamanqa, pisimanta pisi manaña janaqpachamanta parlaykunata uyarikurqachu, manaña angelkunata rikukurqachu, manaña milagrostapis ruwakurqachu. Chaywanpis Jesús jinata nirqa: “Chantá yachaychej, noqa qankunawan tuta pʼuchay kasqayta, kay pacha tukukunankama”, nispa (Mateo 28:19,20; 1 Corintios 13:8). Kunanqa Jehovamanta sutʼinchaqkunaqa, Jesús paykunata yanapachkasqanta yachanku. Mana chay yanapawanqa, mana kay saqra pʼunchaykunapi Diospa Reinonmanta willayta atinkumanchu.
7. a) ¿Pikunataq “allin kamachi yuyayniyojtaj” kanku, imaynatá chayta yachanchik? b) ¿Imatataq Jesús chay ‘kamachiman’ nirqa?
7 Manaraq Jesús wañupuchkaptin, discipulosninman juk “allin kamachi yuyayniyojtaj” nisqamanta parlarqa, chay kamachimanqa patronnin tukuy imanta saqinan karqa. Chay ‘kamachiqa’ Jesús janaqpachaman ripuchkaptin karqaña, Jesuspa mana rikukuq kutimuyninkamataq llamkʼachkanan karqa. Chayrayku kay kamachiqa mana juk runallachu kanman, manaqa Cristowan khuska kamachinankupaq tukuy akllasqakuna kanku. Jesusqa kay runakunata yawarninwan rantisqanrayku, “kamachi” nispa paykunata sutichan. Paykunaqa, runaman yachachinanku karqa, kallpachananku karqa, ‘mikhunatataq horanpi jaywananku karqa’ (Mateo 24:45-47; 28:19, 20; Isaías 43:10; Lucas 12:42; 1 Pedro 4:10).
8. a) ¿Imatataq “allin kamachi yuyayniyojtaj” ruwanan tiyan? b) ¿Imaraykutaq Dios llaqtanniqta yachachisqanta kasukunanchik tiyan?
8 Kay kamachip patronninqa 1914 watapi, mana pipis rikuchkaptin, kutimurqa. Kay ‘kamachitaq’ patronin nisqanta ruwachkarqa, chayrayku 1919 watapi astawan llamkʼayta kamachiman qurqa. Chaymanta kunankamaqa tukuy Jallpʼapi Diospa Reinonmanta runaman willakun, jinamanta waranqa waranqa runakunata Diosta yupaychanankupaq tantakun. Kay waranqa waranqa runaqa, jatun ñakʼariy jamuptin mana wañunqankuchu (Mateo 24:14, 21, 22; Apocalipsis 7:9, 10). Kay runakunapis Diosmanta jamuq mikhunata mikhunanku tiyan, allin kamachitaq “horampi mikhunata jaywan”. Jinamanta Jehovata kusichinapaq, llaqtanniqta yachachisqanta uyarinanchik tiyan, chaymanjinataq kawsananchik tiyan.
9, 10. a) ¿Imaynatá apostolespa pʼumchayninpi chʼampaykunata allinchakuq, chantapis imaynatá runaman willakunanpaq wakichikuq? b) ¿Imaynatá kunan Jehovap llaqtan purinanpaq wakichikun?
9 Wakin kutiqa mana yachanchikchu imatachus Biblia yachachisqanta, chayri imatachus ruwananchikta. ¿Imatataq ruwasunman? Hechos 15 tʼaqan, willawanchik imatachus ñawpa cristianos juk chʼampayta allinchanapaq ruwasqankuta. Chay chʼampayta apostolkunaman, Jerusalenmanta kuraqkunaman ima willakurqa, paykunaqa Jallpʼapi Diospa llaqtanta ñawpaqman apachkarqanku. Paykuna pantaq runa kaptinkupis, Diosqa paykunaniqta chay chʼampayta allincharqa. Diospa rimayninta ñawirispa, espíritu santo mana judío kaqkunata yanapasqanta rikuspa ima, imatachus ruwanankuta sutʼincharqanku. Diostaq tukuy ruwasqankuta tʼinkarqa (Hechos 15:1-29; 16:4, 5). Chaypacha Jallpʼapi Diospa llaqtanta kamachiqkunaqa, may chhika qharikunata tukuyniqpi Diospa Reinonmanta willamunankupaq kacharqanku.
10 Pʼunchayninchikpi Jallpʼapi Diospa llaqtanta kamachiqkunaqa, tukuy suyukunamanta Diospa akllasqasnin kanku, paykunaqa Jehovamanta sutʼinchaqkunap centralninpi Nueva York llaqtapi kachkanku. Jesusta kasukuspa, paykunaqa waranqa waranqa qutuchakuykunapi, Jehovamanta sutʼinchaqkunata runaman yachachinankupaq wakichinku, jinamanta chiqamanta Jehovata yupaychakun. Paykunaqa apóstol Pablojina ninku: “Mana noqaykoqa creesqaykichejmanta patrones jinachu kayta munayku; astawanqa qankunata yanapayta munayku kusisqa kanaykichejpaj, imaraykuchus creeyrayku sinchʼita sayashankichej”, nispa (2 Corintios 1:24).
11. a) ¿Imaynatá ancianosta, siervos ministerialestawan akllakun? b) ¿Imaraykutaq paykunata kasukunanchik tiyan?
11 Diospa llaqtanta kamachiqkunaqa, qutuchakuykunapaq allin wawqikunata akllanku. Paykunaqa qutuchakuykunata jarkʼanankupaq qhawanankupaq ima ancianosta, siervos ministeriales nisqata ima akllanku. Ancianos, siervos ministeriales ima, Biblia mañasqanta juntʼananku tiyan. Paykunaqa ñuqanchikjina pantallankutaq. Pikunachus juk runata anciano kanapaq akllanku, mana qunqanankuchu tiyan Diospaq akllachkasqankuta (1 Timoteo 3:1-10, 12, 13; Tito 1:5-9). Chayrayku paykuna Diosmanta espiritunta mañakunku, Biblia nisqantataq kasukunku (Hechos 6:2-4, 6; 14:23). Diosman pachis ninanchik tiyan kay runakunata quwasqanchikrayku “ajinamanta tukuyninchej creeypi ujchasqa kas[unchik]” (Efesios 4:11-16).
12. ¿Imaynatá Diosninchik warmikunata qhawan?
12 Diospa rimayninqa, qharikuna qutuchakuyta apaykachanankuta niwanchik. Kayta nispaqa mana warmita juchʼuychanchu, imaptinchus wakin warmikunaqa janaqpachapi kamachinqanku, chantapis warmikunaqa, qharikunamanta astawan, Diosmanta runaman willanku (Salmo 68:11). Astawanpis, warmikuna wasinkupi allinta llamkʼaspaqa, Diospa llaqtanta jatunchanku (Tito 2:3-5). Chaywanpis, Diospa llaqtanpiqa qharikunalla yachachinanku tiyan (1 Timoteo 2:12, 13).
13. a) Biblia nisqanmanjina, ¿imaynatá ancianos qutuchakuyta apaykachananku tiyan? b) ¿Imatataq kunan tukuypis ruwayta atinchik?
13 Kay pachapiqa, runaqa mayta jatunchakun. Diospa llaqtanpitaq kay kamachiyta kasukunku: “Qankunamanta aswan llampʼu sonqo kajqa aswan kurajpaj qhawasqa kanqa” (Lucas 9:46-48; 22:24-26). Bibliaqa ancianosta nin, imatapis qutuchakuypi ama jatunchakuspa ruwanankuta, manaqa hermanos qhatinankupaqjina imatapis ruwananku tiyan (1 Pedro 5:2, 3). Mana akllasqakunallachu, manaqa tukuy Jehovamanta sutʼinchaqkuna, warmikuna, qharikuna ima, Diospa sutinpi mana jatunchakuspa puriyta atinku, kʼumuykukuywan sutinmanta parlaspa, Reinonmantataq tukuyman yachachispa.
14. ¿Bibliata ñawirispa, kay tapuykunaman kutichiy?
14 Kaykunata tapukuspa allinta ruwanchik: ¿Sutʼita yachanichu imaynatachus Jallpʼapi Jehová llaqtanta kamachichkan? Jina kaptinqa ¿ruwasqaywan, parlasqaywan ima, chayta rikuchinichu? Sunqunchikpi imachus kasqanta yachanapaq, kay tapuykunapi allinta tʼukurina.
Tukuy sunquwan Cristota kasukuni chayqa, ¿imatataq kay pʼitikunata ñawirispa ruwasaq? (Mateo 24:14; 28:19, 20; Juan 13:34, 35.)
Diospa llaqtanpi ancianokunata jatunpaq qhawani chayqa, ¿pikunatataq jatunchachkani? (Lucas 10:16.)
¿Imaynatá tukuypis qutuchakuypi puraqmanta apanakunanchik tiyan? (Romanos 12:10.)
15. a) ¿Imata rikuchisunchik Diospa llaqtanta kasukuspa? b) ¿Imaynatataq Supay llulla kasqanta rikuchisunman, Jehovatataq kusichisunman?
15 Kunanqa, Jehová llaqtanniqta, imatachus ruwananchikta niwanchik. Chayrayku, Diospa llaqtanta tukuy sunquwan kasukuptinchikqa, Diosta Kamachiqninchiktajina qhawasqanchikta rikuchisunchik (Hebreos 13:17). Satanasqa tukuy imata ñuqallanchikpaq munasqanchikta nin. Chayrayku pillatapis yanapana kaptinqa, mana runa qhawanallawanchikpaqchu yanapana, jinamanta Satanás llulla kasqanta rikuchisunchik. Chantapis Diospa llaqtanpi ñawpaqkunata jatunpaq qhawaptinchik, munanakuptinchik ima, mana llunkʼukuspaqa Jehovata kusichisunchik (Judas 16; Hebreos 13:7). Jehovap llaqtanman munakuywan kʼaskaykusunchik chayqa, pay Diosninchik kasqanta, payta yupaychanapaq tantasqa kasqanchikta ima, sutʼita rikuchisunchik (1 Corintios 15:58).
Yuyarinapaq
• ¿Mayqintaq Diospa llaqtan kunan pʼunchaykunapi? ¿Imatataq ruwachkan?
• ¿Pitataq Diosninchik qutuchakuypi umatajina churan, pikunaniqtataq munakuywan kamachiwanchik?
• ¿Imaynatá Jehovap llaqtanta apaykachaqkunata qhawananchik tiyan?
[133 paginapi dibujos/fotos]
Jehovaqa Jesuspa makinpi llaqtanniqta kamachiwanchik