19 Yachaqana
Mana manchachikuspa Diospa rimayninta willanallapuni
1. a) ¿Ima allin willaytataq Jesuspa discipulosnin willarqanku, imaynatá wakin judíos chayta japʼikurqanku? b) ¿Imatataq tapukusunmanri?
JEHOVAQA yaqha iskay pachak wata ñawpaqta Jesusta Jallpʼapi kamachinanpaq akllarqa. Chaypachaqa, religionta apaykachaqkuna Jesusta wañuchirqanku. Chaywanpis, Jehovaqa payta wañuymanta jatarichimurqa, runa Jesusniqta wiñay wiñaypaq kawsayta atinanpaq. Jesuspa discipulosnin chayta yacharqanku, kusikuywantaq chaymanta willayta qallarirqanku. Chayllapi, saqra runakuna paykunata qhatiykachayta qallarirqanku. Wakinkunata wisqʼaykurqanku, siqʼurqanku, manaña Jesusmanta willanankupaq kamachirqanku (Hechos 4:1-3, 17; 5:17, 18, 40). ¿Imatataq ruwankuman karqari? ¿Imatataq qam ruwawaq karqa? ¿Mana manchachikuspa willallawaqpunichu karqa?
2. a) ¿Ima allin willaykunataq kunan willakunan tiyan? b) ¿Pikunataq kay allin willaykunata willananku tiyan?
2 Kay 1914 watapi Jehovaqa Jesuscristota Diospa Reinonpi churarqa ‘enemigosnin ukhupi kamachinanpaq’ (Salmo 110:2). Cristotaq Satanasta supayninkunatawan janaqpachamanta wikchʼumurqa (Apocalipsis 12:1-5, 7-12). Jinamanta kay saqra pachap qhipa pʼunchaynin, tukukuq pʼunchaynin, qallarinku. Kay pʼunchaykuna tukukuptin, Diosqa Supay ruwasqanta chinkarparichinqa (Daniel 2:44; Mateo 24:21). Saqra runawan mana chinkaqkunaqa, wiñay wiñaypaq tʼikapacha Jallpʼapi kawsanqanku. Qam, kay allin willaykunata yachankiña chayqa, ichapis wak runaman willayta munanki (Mateo 24:14). Chaywanpis ¿imaynatá runa kutichiwasunman?
3. a) ¿Imaynatá willasqanchikman runa kutichinman? b) ¿Imatataq tapukunanchik tiyan?
3 Diospa Reinonmanta runaman willaptiyki, wakinkunaqa tukuy sunqu uyarisunqanku, wakinkunataq mana uyariyllatapis munanqankuchu (Mateo 24:37-39). Ichapis asipayasunqanku, chayri churanakusunqanku. Jesusqa, familianchikpis churanakunanta nirqa (Lucas 21:16-19). Chantapis llamkʼayninchikpi, yachaywasipipis churanakullankumantaq. Wakin suyukunapiqa kamachiq runakuna, Jehovamanta sutʼinchaqkunata qhatiykachakunanpaq kamachinku. Qamta qhatiykachasuptinku, ¿mana manchachikuspa Diospa Reinonmanta willallankipunichu, creesqaykipi sinchita sayaspa? (1 Corintios 16:13).
Mana kallpanchikpi atienekunachu
4. a) ¿Imatataq ruwananchik tiyan Diospa ñanninpi purinapaq? b) ¿Imaraykutaq tantakuykuna may sumaq kanku?
4 Jehovawan chiqa sunqu kanapaq pay quwasqanchikpi atienekunanchik tiyan. Chaykunataq tantakuykuna kanku. Bibliaqa tantakuykunata mana saqinanchikta niwanchik (Hebreos 10:23-25). Ñakʼariykunapi mana Diosta wasanchaqkunaqa, mana tantakuykunata saqirqankuchu. Chay tantakuykunapi Bibliamanta astawan yachakunchik, yachasqanchikta ukhunchanchik, chaymanjina kawsananchikpaq. Chantapis chay tantakuykunapiqa, Diospa munayninta ruwanapaq kallpachakunchik, khuskamanta payta yupaychanchik, hermanopurataq astawan masichakunchik. Jehovaqa espiritunwan qutuchakuyniqta ñanninta rikuchiwanchik. Jesustaq qutuchakuy chaywpipi kachkan (Mateo 18:20; Apocalipsis 3:6).
5. Jehovamanta sutʼinchaqkunata qhatiykachakuptin, ¿imatataq tantakunapaq ruwanku?
5 Qamri, ¿tukuy qutuchakuykunaman richkankichu, uyarisqaykitataq ruwachkankichu? Wakin llaqtakunapi, saqra runaqa Jehovamanta sutʼinchaqkunata mayta qhatiykachachkanku. Chaypiqa, pisi hermanoslla wasispi tantakunku. Mana juk wasillapi tantakuyta atinkuchu, nitaq kikin horapi; wakinkunaqa karuta purinanku tiyan. Wakin kutiqa mana rikuchikunapaq tutataña tantakunku. Rikuchikuspa wañunankuta yachaspapis, hermanosqa tantakuyman rinapaq tukuy imata ruwanku.
6. ¿Imaynatá Jehovapi atienekusqanchikta rikuchinchik, imaynatá mana manchachikuspa parlanapaq pay yanapawanchik?
6 Jehovapi astawan atienekunapaq, paylla yanapanawanchikta yachaspa, tukuy sunquwan paywan parlanapaq yachaykukunanchik tiyan. ¿Chayta ruwachkankichu? Jesusqa, Jallpʼapi kachkaspa mayta Tatanwan parlarqa (Lucas 3:21; 6:12, 13; 22:39-44). Wañunan kachkaptintaq jinata discipulosninman nirqa: “Qhawakuychej ama puñuspa. Diosmanta mañakuychej ama juchaman urmanaykichejpaj”, nispa (Marcos 14:38). Willasqanchikta mana uyariyta munaptinku, ichapis manaña Diosmanta willayta munasunmanchu. Jinallataq runa qhatiykachawaptinchik, asipayawaptinchik, ichapis mana qhatiykachachikunapaq Diospa llamkʼayninta saqiyta munasunman. Mana llawchʼiyananchikpaq, Jehovap espiritunta mañakuna tiyan (Lucas 11:13; Efesios 6:18-20).
Mana manchachikuspa willarqanku
7. a) ¿Imaraykutaq Hechos librota ñawirinanchik tiyan? b) Kay tapuykunaman kutichiy, tʼukurispa imaynatachus qamta yanapasunkiman.
7 Bibliapi Hechos libroqa mayta yanapawanchik. Chaypiqa willakun imaynatachus apostolkuna, Jesuspa qhipanta puriqkuna ima —ñuqanchikjina runallataq— jarkʼaykunata atiparqanku, chiqa sunqu karqanku, mana manchachikuq Jehovamanta sutʼinchaqkuna karqanku. Kay Bibliap pʼitinkunata ñawirispa, tapuykunaman kutichispa ima, qhawarisunchik imaynatachus paykunamanta yachaspa astawan kallpachakusunman.
¿Apostolkuna yachayniyuq runachu karqanku? ¿Manachu imamantapis manchachikuq kanku? (Juan 18:17, 25-27; 20:19; Hechos 4:13.)
Judiospa juntan Diospa Churinta juchacharqa, ¿jinapis, imaraykutaq Pedro mana manchachikuspa chaypi parlarqa? (Mateo 10:19, 20; Hechos 4:8.)
¿Imatataq apostolkuna judiospa juntanpi tumpachikunankupaq ruwarqanku? (Hechos 1:14; 2:1, 42.)
Kamachiqkuna, apostolkunaman manaña Jesuspa sutinpi willanankuta nichkaptinku, ¿imatataq Pedrowan Juanwan kutichirqanku? (Hechos 4:19, 20.)
Kacharichikuytawan, ¿pimantataq watiqmanta apostolkuna yanapata mañakurqanku? ¿Manaña qhatiykachachikunankupaqchu mañakurqanku, chayri imapaqtaq? (Hechos 4:24-31.)
Saqra runakuna discipulosta chʼinyachiyta munachkaptinku, ¿imaynatá Jehová discipulosta yanaparqa? (Hechos 5:17-20.)
¿Imaraykutaq apostolesta kacharikurqa? ¿Imaynatá paykuna chayta yacharqanku? (Hechos 5:21, 41, 42.)
May chhika discipulosqa qhatiykachachikuspa tukuyniqman ayqirqanku, ¿imatataq paykuna mana saykʼuspa ruwarqanku? (Hechos 8:3, 4; 11:19-21.)
8. Ñawpa cristianos willasqankurayku, ¿machkhamantaq chayarqanku, imaraykutaq ñuqanchikpis runaman willamunanchik tiyan?
8 Diosmanta willasqankuqa mana qhasipaqchu karqa, 33 watapi, Pentecostes nisqapi, kimsa waranqa runakuna bautizakurqanku, chaymantataq creeqkuna “astawan yapakusharqanku qharis, ajinallataj warmispis” (Hechos 2:41; 4:4; 5:14). Juk may saqra runapis cristianoman tukurqa, payqa Tarso llaqtamanta Saulo karqa, qhipaman paytaqa apóstol Pablo sutiyuqta riqsikurqa (Gálatas 1:22-24). Chay pʼunchaykunapi willayta qallarikusqanqa, kunankama mana chinkanchu. Astawanpis, kunanqa may chhika runa Jallpʼantinpi Diosmanta willachkanku. Ñuqanchikpis ñawpa cristianosjina, mana manchachikuspa chay sumaq ruwaypi yanapasunman.
9. a) ¿Maykunapitaq Pablo runaman willarqari? b) ¿Imaynamanta qampis Diospa Reinonmanta willankiri?
9 Pablo Jesusmanta chiqa kaqta yachaytawan, ¿imatataq ruwarqa? Biblia kutichiwanchik: “Chaymantapacha [...] willayta qallarerqa Jesusqa Diospa Churin kasqanta” (Hechos 9:20). Pabloqa Diosman graciasta quyta munarqa, munakuyninta rikuchisqanrayku. Chayrayku yachakusqanta tukuy runa yachananta munarqa. Judío kasqanrayku sinagogaspi yachachirqa. Chantapis wasimanta wasi, plazaspi, qhatuspi ima willarqa. Astawanpis wak llaqtakunaman rirqa chiqa kaqta willamunanpaq (Hechos 17:17; 20:20; Romanos 15:23, 24).
10. a) ¿Imaynatá Pablo runaman willachkaspa yuyayniyuq kasqanta rikuchirqa? b) ¿Imaynatá Pablojina parlasunman familianchikwan, llamkʼaq masinchikwan, yachaywasipi masinchikwan ima?
10 Pabloqa, yuyayniyuq runa karqa, mana manchachikuqchu, ñuqanchikpis kikillantaq kananchik tiyan. Judioswan parlachkaspa, Dios ñawpa tatasninkuman nisqanmanta parlaq. Griegoswan parlaspataq, paykuna yachasqankumanta parlaq. Wakin kutiqa runaman yachachinapaq, willaq imaynatachus paypis Diosmanta yachakurqa. “Chay tukuyta ruwani evangeliorayku, ajinamanta paykunawan khuska kanaypaj”, nispa pay nirqa (1 Corintios 9:20-23; Hechos 22:3-21).
11. a) ¿Imatataq Pablo ruwaq churanakuq runawan mana tinkuchkananpaq? b) ¿Maykʼaqtaq Pablojina ruwasunman, imaynatá? c) ¿Pitaq kallpachawasunchik parlanallanchikpaqpuni?
11 Anchata willasqanman churanakuchkaptinku, mana chay runakunawan sapa kuti tinkuchkananpaq, Pabloqa wak llaqtasmanñataq willaq ripuq (Hechos 14:5-7; 18:5-7; Romanos 12:18). Chaywanpis mana jaykʼaq willasqanmanta pʼinqakurqachu (Romanos 1:16). Churanakuq runakunaqa payta kʼumuykachachirqanku, chaywanpis ‘Dios payta kallpacharqa’ willanallanpaqpuni. Jinata pay nirqa: “Señormin noqawan karqa, kallpachawarqataj evangeliota sutʼita willanaypaj”, nispa (1 Tesalonicenses 2:2; 2 Timoteo 4:17). Pʼunchayninchikpi qutuchakuypa uman, Jesusqa, kallpachawachkanchik imatachus pay kamachisqanta juntʼananchikpaq (Marcos 13:10).
12. ¿Imaynatá mana manchachikusqanchikta rikuchinchik, imaraykutaq mana manchachikunchikchu?
12 Jesusjina, ñawpa cristianosjina, ñuqanchikpis mana manchachikuspa Diospa rimayninmanta willanallanchikpuni tiyan. Runa mana uyariyta munawaptinchikqa, runata saqisunchik, chaywanpis willamullasunpuni. Runa churanakuptintaq mana chʼinyakusunchu. Jesusjina Diospa Reinollan Jallpʼantinta allinchananta willasunchik. Mana manchachikuspa willamunchik, Jehovata kamachiqninchiktajina qhawasqanchikrayku, chantapis willasqanchikqa mana ñuqanchikpatachu, paypata. Astawanpis, payta munakusqanchikrayku, payta yupaychanchik (Filipenses 1:27, 28; 1 Tesalonicenses 2:13).
Yuyarinapaq
• ¿Imaraykutaq Reinomanta tukuy runaman riqsichinanchik tiyan, imaynatá kutichinawanchikta suyasunman?
• ¿Imaynatá Jehovata kasukunapaq mana kallpanchikpi atienekusqanchikta rikuchinchik?
• ¿Ima allin yachaykunataq Hechos libromanta urqhusunman?
[173 paginapi dibujos/fotos]
Jehovata kasukuqkuna, ñawpa cristianosjina mana manchachikuspa paymanta willanku