21 Yachaqana

Jehovap munasqanmanta jatun juntʼakuynin

1, 2. a) ¿Imatataq Jehová tukuy yuyayniyuq kaqkunamanta munan? b) ¿Imatataq Jehová munakuyninpi ruwan?

JEHOVAQA, tukuy yuyayniyuq kaqkuna khuskamanta payta, kʼata chiqa Diosta, yupaychananchikta munan. Jinamanta wawasninjina kacharichisqa, jatun kusiypi kanapaq. Jehovata munakuqkunaqa chayllatataq munanku.

² Jehová munasqanta juntʼayta qallarirqa tukuy imata ruwayta qallarichkaptin. Tukuy imamanta ñawpaqtaqa Jesusta ruwarqa. Wañuymanta kawsarimusqanmantapacha Jesusqa “Diospa jatun kaynimpa, kʼanchaynimpa lliphipiynin, paypa kaynintaj Dios Tataj kaynimpuni” (Hebreos 1:1-3). Jesusqa kʼata karqa, Dioslla sapan payta ruwasqanrayku. Payniqtataq tukuy kaq chhikata Dios ruwarqa, ñawpaqtaqa janaqpachapi angelesta, chaymantataq jallpʼapi runakunata (Job 38:7; Lucas 3:38). Tukuy paykunaqa juk jatun familiajina karqanku. Tukuypis Jehovata Diostajina, tukuy imata Kamachiqtajina, munakuyniyuq Tatankutajina qhawaq kanku.

3. a) ¿Imatataq tukuypis ñawpa tatamamanchikmanta herenciatajina japʼinchik? b) ¿Imatataq Jehová jatun munakuyninpi Adanpa mirayninpaq ruwan?

³ Ñawpaq tatamamanchik yachachkaspa juchallikusqankurayku, Diosqa paykunata wañunankuta nirqa, Edén huertamanta qharqurqa, manaña wawasnintajina qhawarqachu, Diospa familianmanta wikchʼuchikurqanku (Génesis 3:22-24; Deuteronomio 32:4, 5). Tukuy ñuqanchikqa paykunamanta jamunchik, chayrayku juchasapa kanchik. Chaywanpis, Jehovaqa Adanpa Evaptawan mirayninmanta, wakinkuna chiqan kaqta munakunankuta yacharqa, chayrayku munakuyninpi tukuy imata ruwarqa “Diospa kacharichisqa wawasninwan khuska jatun kusiypi” kanankupaq (Romanos 8:20, 21).

Israel llaqtaqa, Dioswan allinta apanakusqanta chinkachin

4. ¿Imatataq Jehová israelitasman qurqa?

⁴ Adán kawsayta qallarisqanmanta, yaqha waranqa phichqa pachak watanman, Jehovaqa wakin runakunata akllarqa paywan allinta apanakunankupaq. Israel llaqtata akllarqa paypa llaqtan kananpaq, kamachiykunatataq qurqa (Génesis 12:1, 2). Chaymantaqa, paykunata apaykacharqa munayninta juntʼananpaq (Deuteronomio 14:1, 2; Isaías 43:1). Chaywanpis israelitasqa juchaman, wañuyman ima, watasqallapuni kachkarqanku, manataq qallariypijina Adán Evawanjina kacharichisqa kawsarqankuchu.

5. ¿Imaynatá israelitas Jehovawan allinta apanakusqankuta chinkachirqanku?

⁵ Chaywanpis Diosqa israelitasta allinpaq qhawaq, paykunapis Jehovata, Tatankutajina qhawananku karqa, munasqantataq ruwananku karqa. Jesusqa chayta juntʼanankuta nirqa (Mateo 5:43-48). Llakikunapaqjina mana chayta ruwarqankuchu. Paykuna, “uj Tatayojlla kayku, chaytaj Dios” nispa, nichkaptinkupis, ruwasqankuwan, purisqankuwan ima, llullakuchkaskankuta rikuchirqanku, Jesustaq chayta uyankupi sutʼincharqa (Juan 8:41, 44, 47). Chayrayku 33 watapi, Jehovaqa Moisesman Ley qusqanta yanqhayachirqa, israelitaswan allinta apanakusqantataq tukuchirqa. Kunan, ¿manañachu pipis allinta Dioswan apanakunman karqa?

“Janaj pachapi kajkunata”, Cristopi tantakun

6. Pablo Efesios 1:9, pʼitipi nisqanmanjina, ¿imatataq Dios ‘juntʼayta munan’?

⁶ Apóstol Pabloqa iñiyniyuq qharikuna, warmikuna ima, allinta Dioswan apanakunankuta willarqa. Chantapis rikuchirqa imatachus Dios ruwarqa chay runakuna familiaman yaykunankupaq, Pablo nirqa: “[Diosqa] pakasqa imasninta rejsichiwarqanchej munasqanman jina, mayqentachus Cristopi juntʼayta munarqa, chayta. Chayman jinataj, churasqa pʼunchaykuna juntʼakojtin, Diosqa ujllaman tantanqa janaj pachapi kajkunata, jinallataj kay pachapi kajkunatapis Cristoj kamachiynimpi kanankupaj” (Efesios 1:8-10). Arí, runaqa Cristoniqta Diospa ñawpaqinpi allinpaq qhawasqa kanman: wakinkunaqa janaqpachapi kanankupaq, may chhika runataq wiñay wiñaypaq kay Jallpʼapi tiyakunankupaq.

7. ¿Pikunataq “janaj pachapi kajkuna” kanku?

⁷ Kay 33 watapi Pentecostés nisqamantapacha, Diosqa “janaj pachapi kajkunata”, tantayta qallarirqa. Paykunaqa Jesuswan khuska Diospa Reinonpi kamachinqanku, Diosqa paykunata Jesuspi iñisqankurayku chiqan runapaq qhawan (Romanos 5:1, 2). Chaymanta qhipamanqa mana judío kaqkunapis paykunawan kananku karqa, 144.000 kanankukama (Gálatas 3:26-29; Apocalipsis 14:1). Kunanqa chay runakunamanta pisillaña puchunku.

“Kay pachapi kajkunata” Cristopi tantakun

8. “Kay pachapi kajkuna” ¿pikunataq kanku, imaynatá Jehovawan apanakunku?

⁸ Chantapis Diosqa, munasqanmanjina “kay pachapi kajkunatapis” Cristopi tantachkan. Paykunaqa, waranqa waranqa runakuna kanku, wiñaypaqtaq kay Jallpʼapi tiyakuyta suyanku. Chantapis akllasqakunamanta puchuqkunawan khuska, Jehovap sutinta jatunchanku, yupaychanku ima (Isaías 2:2, 3; Sofonías 3:9). Kay Jallpʼapi Jehovata yupaychaqkunapis Jehovata Tatankutajina qhawanku, paylla kawsayta quyta atisqanta yachasqankurayku. Diospa ñawpaqinpitaq allinpaq qhawasqa kanku Jesuspi iñisqankurayku (Apocalipsis 7:9, 14). Chaywanpis, pantaq runa kasqankurayku, Jehovaqa paykunata manaraq wawasnintajina qhawanchu.

9. Romanos 8:21 nisqanmanjina, ¿imataq runapaq kanqa?

⁹ Kay Jallpʼapi kawsayta suyaqkunaqa, mayta munanku “Diospa kacharichisqa wawasninwan khuska jatun kusiypi” kayta (Romanos 8:21). Chay kacharichiyqa qallarinqa, Jesucristo, janaqpachapi kaqkuna ima, Armagedón maqanakuypi, jatun ñakʼariyta tukuchiptinku. Jinamanta Satanaspa tukuy ruwasqanta chinkachikunqa. Chaymantataq, Jesusqa Waranqa watata Kamachichkaptin mayta tʼinkawasunchik (Apocalipsis 19:17-21; 20:6).

10. ¿Ima yupaychana takiytataq Jehovata kasukuqkuna takinqanku?

¹⁰ Jallpʼapi Jehovata kasukuqkunaqa, janaqpachapi payta kasukuqkunajina, mayta kusikuspa jinata yupaychanqanku: “Ancha jatuchaj, tʼukunapajtaj ruwasqasniykeqa, Tukuy Atiyniyoj Señor Dios. Ñankunaykeqa cheqan, cheqataj kanku. Qanqa tukuy nacionespa Reynin kanki. [¿]Pitaj mana qanta manchachikunmanchu, Señor? [¿]Pitaj sutiykita mana jatunchanmanchu? Qanllamin Santo kanki. Tukuy runas ñawpaqeykiman jamonqanku, yupaychasonqankutaj, imaraykuchus cheqanta justiciata ruwasqasniykeqa sutʼinchasqa kanku” (Apocalipsis 15:3, 4). Arí, Jehovata tukuy kasukuqkunaqa, khuska kʼata chiqa Diosta yupaychanqanku. Wañusqakunapis kawsarimunqanku, qhaparispa Jehovata yupaychanankupaq (Hechos 24:15).

Qhipaman kacharichisqa kasunchik

11. Jatun ñakʼariypi mana wañuqkuna, ¿imayna kacharichiytataq rikunqanku?

¹¹ Jatun ñakʼariypi, Armagedonpi ima, saqra kaq Jallpʼamanta chinkaptin, Kuraq Supay Satanasqa manaña ‘kay pachap diosnin’ kanqachu. Jehovata yupaychaqkunaqa manaña saqra ruwaykunawan atipachikunqankuchu (2 Corintios 4:3, 4; Apocalipsis 20:1, 2). Llulla religionqa manaña Jehovap sutinta chʼichichanqachu, nitaq runata tʼaqanqachu. Diosta kasukuqkunata manaña tumpakunqachu, nitaq mayqin kamachiqpis paykunata qhatiykachanqachu. ¿Manachu kayjina kacharichiy sumaq kanman?

12. ¿Imaynatá tukuy runata juchamanta kacharichikunqa?

¹² “Diospa Corderon” Jesusqa, kawsayninta qusqanwan runap juchanta pichanqa (Juan 1:29). Jallpʼapi kachkaspa Jesusqa, unqusqa runakunata jampiq, juchankuta pampachasqanrayku (Mateo 9:1-7; 15:30, 31). Jinallataq qhipaman, Cristo Jesusqa Diospa Reinonpi Reyjina; ciegosta, opasta, suchusta, yuyayninkuya chinkachiqkunata , tukuy unqusqakunata ima jampinqa (Apocalipsis 21:3, 4). Tukuy kasukuqkunaqa manaña juchaman watasqachu kanqanku, jinamanta yuyayninkuwan, ruwasqankuwan ima, kusikunqanku, Diostapis kusichillanqankutaq (Romanos 7:21-23). Jesús waranqa watata kamachiyta tukuptin, runaqa mana juchayuq kanqa, kʼata chiqa Diosman rikchʼakunqa (Génesis 1:26).

13. Waranqa watata kamachiytawan, ¿imatataq Cristo ruwanqa, imapaqtaq?

¹³ “Cristo tukuy kamachiyta, tukuy atiyta, tukuy kallpata ima chinkachiytawan reinota Dios Tataman jaywaponqa chaypacha. Cristoqa kamachinampuni tiyan, tukuynin enemigosnin chakisnin uraman churasqa kanankukama”. Arí, Jesusqa, runata mana juchayuq kananpaq yanapaytawan, kamachinapaq atiyninta Tatanman kutichipunqa (1 Corintios 15:24, 25). Jesús Waranqa watata Kamachisqanpi, ruwananta juntʼanqa. Jinamanta runaqa, manaña Jesuspa kamachiyninniqta Jehovaman qayllaykunqachu. Chantapis manaña jucha, nitaq wañuy kaptinqa, runataq rantisqaña kaptinqa, Jesuspis manaña rantikapuwaqninchikjina llamkʼanqachu. Chayrayku Bibliaqa jinata niwanchik: “Chaymanta tukuy imas paypa chaykisnin urapi kashajtinku, kikin Churipis Tatampa makinman churakonqa, pichus tukuy imata chakisnin uraman churajpaman; ajinamanta Diosqa tukuy kaj chhikata kamachenqa”, nispa (1 Corintios 15:28).

14. ¿Imatataq Jehová mana juchayuq runawan ruwakunanta saqinqa, imaraykutaq?

¹⁴ Chaymantataq, mana juchayuq juntʼa runakunaqa, wiñay wiñaypaq Jehovata kasukuyta munasqankuta rikuchiyta atinqanku. Jehovaqa manaraq wawasnintajina qhawachkawaptinchik, watiqmanta juchaman tanqasqa kananchikta saqinqa. Chaypaqqa Satanasta, supayninkunatawan kacharichinqa. Tukuy sunquwan Jehovata munakuqkunaqa, mana ñakʼarinqankuchu mana jampiy atinata. Chaywanpis, Jehovata wasanchaqkuna, Supaywan apachikuspa mana kasukuqkuna ima, wiñay wiñaypaq Satanaswan, supayninkunawan ima wañunqanku (Apocalipsis 20:7-10).

15. Jehovata tukuy kasukuqkuna, ¿imaynatá kawsanqanku?

¹⁵ Chaypacha, Jehovaqa kamachiyninpi atienekuqkunata wawasnintajina japʼikapunqa. Chay pʼunchaymantapacha, paykuna kacharichisqa wawasninwan khuska jatun kusiypi Jehovap familianwan kanqanku. Watiqmanta tukuy janaqpachapi, kay pachapipis tukuy yuyayniyuq kaqkuna khuskamanta kʼata chiqa Diosta yupaychanqanku, jinamanta Diospa jatun munasqan juntʼakunqa. ¿Manachu tukuy pachantinmanta chay kusisqa familianwan wiñaypaq kawsayta munawaq? Jina kaptinqa allinta kay 1 Juan 2:17 nisqanpi tʼukuriy: “Kay pachaqa tukukapushan, jinallataj chay sajra munaynimpis; Diospa munayninta ruwajrí wiñaypaj kawsanqa”.

Yuyarinapaq

• Edén huertapi manaraq uqharikuchkaptinku, ¿imaynatá Jehová payta yupaychaqkunawan apanakuq?

• ¿Imatataq Diosta kasukuqkuna ruwananku tiyan?

• ¿Pikunataq qhipaman Diospa wawasnin kanqanku, pikunallataq qhipaman khuska Jehovata yupaychanqanku?

[190 paginapi dibujo/foto]

Diosta kasukuq runakunaqa Jallpʼantinpi tʼikapacha paraisopi kawsanqanku