13 YACHAQANA
Jesuspa yachachisqasnin
¿Pitaj pay? ¿Imaynapí Jesuspa yachachisqanman tukorqa?
¿PITAJ Diospa aswan sumaj kamachin?... Arí, Jesucristo. ¿Paymanta yachakusunmanchu?... Bibliaqa Jesús pay jina kausananchejpaj yachachiwasqanchejta nin. Paytaj yachachisqasnin kananchejpaj wajyariwanchej.
Jesuspa yachachisqasnin kanapaj, ¿imatá ruwana tiyan?... Ñaupajtaqa paymanta yachakuna tiyan. Chantapis yachachisqanpi creena, nisqantataj kasukuna.
Ashkha runas Jesuspi creesqankuta ninku. ¿Tukuyninkuchu Jesuspa yachachisqasnin kankuman?... Mana. Ashkhas mana Jesuspa yachachisqasninchu kanku. Iglesiaman rispapis, mana tiempochakunkuchu Jesuspa yachachiykunasninta rejsinankupaj. Pikunachus Jesús jina kausakunku, chaykunalla Jesuspa yachachisqasnin kanku.
Jesús Jallpʼapi kashajtin, ashkha runas yachachisqasninman tukorqanku. Wakinmanta parlarina. Ujnenqa Felipe karqa. Payqa amigon Natanaelta maskʼamorqa (Natanaelpa ujnin sutenqa Bartolomé). Natanaeltaj dibujopi rikunki jina, sachʼa urapi kasharqa. Chantá Jesusman chimpaykojtin, Jesús nerqa: “Kaymá cheqamanta israelitaqa, paypitaj ni ima llullakuypis kanchu”, nispa. Natanaeltaj tʼukulla tapurerqa: “Maypitaj noqata rejsiwarqankiri?”, nispa.
¿Pikunatataj Jesús wajyashan yachachisqasnin kanankupaj?
Jesustaj kuticherqa: “Manaraj Felipe wajyashasojtin, higo sachʼa urapi kashajtillaykiraj rikorqayki”, nispa. Natanaelqa Jesús chayta yachasqanmanta, mayta tʼukorqa. Nerqataj: “Qanqa Diospa Churin kanki, Israelpa Reynin”, nispa (Juan 1:49).
Judas Iscariote, Judas (waj sutin Tadeo), Simón
Wakenqa Jesuspa yachachisqasninman tukorqanku, Felipemanta Natanaelmantawan uj día ñaupajta. Paykuna karqanku Andrés, hermanon Pedro, jinallataj Juan, ichá Juanpa hermanon Santiagopis (Juan 1:35-51). Jinapis pisi tiemponman, tawantinku challwiri llankʼayninkuman kutipullarqankutaj. Jesusqa uj kuti Galilea qocha kantunta rishaspa Pedrota, Andrestawan rikorqa. Paykunaqa challwa japʼina chʼipata jatun qochaman wijchʼuykusharqanku. Jesustaj paykunata nerqa: “Jamuychej qhepayta”, nispa.
Santiago (Alfeoj wawan), Tomás, Mateo
Astawan jaqaypi, Jesusqa Santiagota Juantawan rikorqa. Paykunaqa uj botepi tatankuwan kasharqanku, challwa japʼina chʼipasninkuta tʼirispa. Jesusqa paykunatapis wajyallarqataj. Qanta wajyasunkiman karqa chay, ¿imatá ruwawaj karqa? ¿Chay ratochu Jesuswan riwaj karqa?... Santiagowan Juanwanqa yacharqanku Diospuni Jesusta kachamusqanta. Chayrayku llankʼayninkuta saqespa, chay rato Jesuspa qhepanta rerqanku (Mateo 4:18-22).
Natanael, Felipe, Juan
Jesuspa yachachisqasninman tukojkuna, ¿nichu ni imapi pantarqanku?... Mana. Ichá yuyarikunki mayqenninkuchus aswan kurajpaj qhawasqa kasqanmanta siminakusqankuta. Jinapis Jesusta kasukuspa, kausayninkuta cheqanyachinankupaj kallpachakorqanku. Kikinta ruwaspaqa, Jesuspa yachachisqasnin kasunman.
Santiago (Juanpa hermanon), Andrés, Pedro
Jesusqa tukuy laya runasta wajyarerqa yachachisqasnin kanankupaj. Uj kuti, Jesusman chimpaykuspa uj qhapaj kamachej joven taporqa: “Imatataj ruwasaj wiñay kawsayniyoj kanaypaj?”, nispa. Chay joven Diospa kamachisqanta wawamantapacha juntʼasqanta nejtin, Jesús nerqa: “Qhepayta jamuy”, nispa. ¿Yachankichu imatachus chay joven ruwasqanta?...
Mayta llakikorqa Jesuspa yachachisqanman tukojtin, manaña kapuynintachu ñaupajman churananta yachaspa. Payqa Diosta munakunanmantaqa qolqenta astawan munakorqa. Chayrayku mana Jesuspa yachachisqanmanchu tukorqa (Lucas 18:18-25).
Jesusqa wata khuskanniyojta jinaña willashaspa, 12 yachachisqasninta ajllarqa apostolesnin kanankupaj. Paykunamantaj uj jatun llankʼayta qorqa. ¿Yachankichu apostolespa sutisninkuta?... Yachakunachej. Dibujosta qhawarispa, apostolespa sutisninkuta leey. Chantá mana qhawaspalla sutisninkuta niy.
Jesús willamoj rejtin kay warmis yanapaj kanku. ¿Pikunataj kanku?
Qhepaman, 12 apostolesmanta ujnin sajraman tukorqa. Paytaj karqa Judas Iscariote. Cuentanmantaqa waj ajllasqa karqa. ¿Yachankichu pichus kasqanta?... Payqa Matías karqa. Aswan qhepaman, Pablowan Bernabewanpis apostolesllataj karqanku. Nitaj 12 apostoleswanchu yupasqa karqanku (Hechos 1:23-26; 14:14, 15).
Ñaupaj yachaqanapi, Jesús wawasta munakusqanta yachakorqanchej. ¿Imaraykú wawasta munakoj?... Imaraykuchus yacharqa wawaspis yachachisqasninman tukuyta atisqankuta. Chantapis wawas Sumaj Yachachej Jesusmanta parlajtinkoqa, kuraj runaspis yachakuyta munanku.
Ashkha warmispis, Jesuspa yachachisqasninman tukullarqankutaj. Paykunamanta wakin karqanku: María Magdalena, Juana, Susana ima. Jesús waj llajtasman willaj rejtin, paykunaqa Jesuswan khuska rerqanku. Ichá yanapaj kanku mikhunata waykʼupuspa chayri pʼachanta tʼajsapuspa (Lucas 8:1-3).
¿Jesuspa yachachisqan kayta munawajchu?... Jesuspa yachachisqan kayqa, mana “Jesuspi creeni” niyllachu. Nitaj tantakuykunallapichu Jesuspa yachachisqan kasqanchejta rikuchina tiyan, manaqa tukuynejpi. ¿Maykunapitaj kanman?...
Arí, wasipi, escuelapipis. Ama qonqaychu: Jesuspa yachachisqan kanapajqa, maypi kashaspapis Jesús jina kausakunanchej tiyan.
¿Maypitaj Jesuspa yachachisqan kasqaykita rikuchiwaj?
Jesuspa yachachisqasninmanta imatachus Biblia nisqanta leerina: Mateo 28:19, 20; Lucas 6:13-16; Juan 8:31, 32; 1 Pedro 2:21.