¿Imatá ñaupajman churana?

UJ KUTI, Jesusman uj runa chimpaykorqa. Payqa Jesús may yachayniyoj kasqanta yachaspa nerqa: ‘Yachachej Señor, niripuway hermanoyman herenciata partinakunaykuta’, nispa. Chay runaqa herenciata japʼiytapuni munarqa.

Jesús kaspa, ¿imatá chay runaman niwaj karqa?... Jesusqa repararqa, chay runa mana allintachu yuyashasqanta. Imaraykuchus herenciallamanta llakikusharqa, nitaj yacharqachu imatachus kausayninpi ñaupajman churananta.

Noqanchejpajrí, ¿imataj ñaupajpi kanan tiyan? ¿Pujllanasniyoj kaychu, mosoj ropayoj kaychu, chayri waj imasniyoj kaychu?... Jesusqa yachacherqa, mana chaykunatachu ñaupajman churanata. Chaypajtaj Diosmanta qonqapoj runamanta parlarerqa. ¿Chayta yachayta munawajchu?...

Chay runaqa may qhapaj kasqa, jallpʼasniyoj, pirwasniyojtaj. Uj wata, chajrasnin sumajta poqosqa. Cosechata oqharisqantaj pirwasninta atipaykusqa. Chayrayku sonqonpi yuyaychakusqa: “Pirwasniyta phaskaspa, aswan jatuchajta ruwasaj, chaypitaj tantasaj cosechasqasniyta, tukuy kapuyniytawan”, nispa.

Chay qhapaj runaqa, chayta ruwaspa sumajta ruwashasqanta yuyasqa. Sonqonpitaj nisqa: ‘Ashkhaña tiyapuwan, sumaj jallchʼasqa ashkha wataspaj. Samarikullasajña, mikhusaj, ujyasaj, kusikusajtaj’, nispa. Ajinata yuyaspa pantasharqa. ¿Yachankichu imaraykuchus?... Chay runaqa payllapi yuyasharqa, nitaj Diosmanta yuyarikorqachu.

Chayrayku Diosqa, payman nisqa: “Wampu, kunan chʼisipacha wañunki. Chantá pipajtaj kanqa chay tantasqaykiri?”, nispa. Chay runa, ¿wañuspa imallantapis apanmanchu karqa?... Mana, wajkunapaj kanman karqa. Chayrayku Jesús nerqa: ‘Ajinallataj kanqa payllapaj qhapajyajwanqa, Diospajtaj mana imayoj kaj runawanqa’, nispa (Lucas 12:13-21).

¿Manacharí chay qhapaj runa jinachu kayta munanki?... Chay runaqa qhapajyayllata maskʼasharqa. Chaypitaj pantarqa. Kapusqanwan mana sonqo juntʼasqachu karqa. ‘Diospa ñaupaqenpitaj mana imayoj’ karqa.

Ashkha runas chay qhapaj runa jina kanku, astawan kapuyniyoj kayllata munanku. Chaytajrí llakiyllapi paykunata rikhurichin. Kaypi tʼukurina, ¿pujllanasniyki kapusunkichu?... ¿Ima pujllanastaj kapusunki?... Ichapis amiguitoyki chayri amiguitayki pelotayoj, muñecayoj chayri waj pujllanayoj, qanpatataj chay pujllana mana kapusunkichu. ¿Allinchu kanman tataykita chayri mamaykita sapa kuti ninayki: “Chay pujllanata rantipuway, rantipuway”, nispa?...

Ichá yuyawaj chay pujllanallawan kusisqa kanaykita. Jinapis, ¿chay pujllana unaypajchu?... Mana. Thantakonqa, pʼakikonqa, chantataj niña qhawarillankipischu. Pujllanasmanta nisqaqa, qanpata imachá aswan valorniyoj kapusunki. ¿Imataj chay kanman?...

Kausayniyki. Mana kausayniyoj kaspaqa, ni imata ruwayta atiwajchu. Jinapis kausanaykeqa Diosta kusichinaykimanta kashan, ¿icharí?... Chayrayku mana, Diosmanta qonqapoj wampu runa jinachu kananchej tiyan.

Mana wawasllachu ajina kanku. Ashkha kuraj runaspis, chay qhapaj runa jina kapuyniyoj kayllata maskʼanku. Mikhunanku, ropanku, wasinku kajtinpis, mana chaykunawan kusisqachu kanku. Aswan ashkha ropata munanku, aswan jatuchaj wasistataj. Tukuy chaykunaqa qolqepaj. Chayrayku mayta trabajanku. Ashkha qolqeyojña kajtinkupis, astawan munallankupuni.

Wakin runasqa mayta trabajasqankurayku, mana familiankupaj tiempochakunkuchu, nitaj Diospajpis. ¿Qolqenku mana wañunankupaj yanapanmanchu?... Mana. Wañuspa, ¿qolqenkuwan imatapis ruwankumanchu?... Mana, imajtinchus wañusqasqa manaña imatapis ruwayta atinkuchu (Eclesiastés 9:5, 10).

¿Chay ninayanchu qolqeyoj kay jucha kasqanta?... Mana. Qolqewanqa mikhunata, ropatapis rantisunman. Bibliapis nin, qolqeqa jarkʼakuna escudo jina kasqanta (Eclesiastés 7:12). Chaywanpis qolqeta munakuspaqa, ashkha llakiykunapi rikukusun. Chay qhapaj runa jinataj kasun, pichus payllapaj qhapajyarqa, manataj Diospa ñaupaqenpi qhapajchu karqa.

¿Ima ninayantaj Diospaj ñaupaqenpi qhapaj kay?... Niyta munan, kausayninchejpi Diosta ñaupajman churay. Wakin runasqa Diospi creesqankuta ninku, yuyankutaj chayllata ruwananku kasqanta. Paykuna, ¿Diospa ñaupaqenpi qhapajchu kankuman?... Mana, Diosmanta qonqakapoj chay qhapaj runa jina kanku.

Jesusqa Diosmanta ni jaykʼaj qonqaporqachu. Payqa mana qolqetachu maskʼarqa, nitaj kapuyniyoj kaytachu. Jesusqa yacharqa imatachus kausayninpi ñaupajman churananta. ¿Yachankichu imachus chay kasqanta?... Diospa ñaupaqenpi qhapaj kay.

¿Imaynatá Diospa ñaupaqenpi qhapaj kasunman?... Paypa munayninta ruwaspa. Jesús nerqa: “Paypa munaynillanta ruwani”, nispa (Juan 8:29). Chaytaj Diosta kusichin. ¿Imatá ruwawaj Diosta kusichinaykipaj?... Bibliata leewaj, tantakuykunaman riwaj, Diosmanta mañakuwaj, wajkunatataj payta rejsinankupaj yanapawaj. Chay ruwaykunata kausayninchejpi ñaupajman churana tiyan.

Jesusqa Diospa ñaupaqenpi qhapaj karqa. Chayrayku Diosqa ni jaykʼaj saqerparerqachu, wiñay kausaytataj qorqa. Jesús jina kasun chayqa, Jehovaqa munakuwasun, nitaj saqerpariwasunchu. Chayrayku Jesús jina kana, nitaj Diosmanta qonqapoj qhapaj runa jinachu.