¿Imaraykutaj onqonchej?

PILLAPIS onqosqa kashasqanta, ¿yachankichu?... Ichá qanpis wakin kuti onqoykorqanki. Ichapis chʼojowan chayri wijsa nanaywan karqanki. Wakin runasqa sinchʼi onqosqa kaspa, mana sapallankumanta sayariytapis atinkuchu, astawanraj machitusña kajtinkoqa.

Tukuy runas maykʼajllapis onqoykunkupuni. ¿Imaraykutaj runas onqonku, machuyanku, wañunku ima? ¿Yachankichu?... Jesusqa chayta sutʼincharqa, uj suchu runata sanoyachishaspa. Imachus kasqanta willarisqayki.

Jesusqa Galilea qocha kantupi uj wasipi kasharqa. Chayta yachaspa, ashkha runas Jesusman rerqanku. Chay wasimantaj juntʼaykorqanku, nitaj punkullamanpis chimpaykuyta atikorqachu. Runasrí chayashallarqankupuni. Ajinapi, tawa runas uj suchu runata aparqanku. Mana kuyuriytapis atisqanrayku, camanpi wantorqanku.

¿Imaraykutaj chay onqosqata Jesusman aparqanku?... Paykunaqa Jesús sanoyachiyta atisqanpi creerqanku. Jinapis maypichus Jesús kasharqa chay waseqa juntʼa kasharqa. ¿Imaynatataj chay suchu runata Jesusman qayllaykuchinkuman karqarí?...

Yachanaykipaj dibujota qhawariy. Ñaupajtaqa suchu runata wasi pataman wicharicherqanku. Chay waseqa pʼalta techoyoj karqa. Chaymantaqa techota juskʼorqanku. Chantá chay juskʼunta, suchu runata camanpi uraykucherqanku. Chay runasqa, ¡may creeyniyojpuni karqanku!

Chay wasipi kaj runasqa imachus kasqanmanta tʼukorqanku. Imaraykuchus chay suchu runaqa chaupinkupi rikhurerqa. Onqosqata uraykuchejkunapaj, ¿Jesús phiñakorqachu?... Mana. Astawanpis kusisqa kasharqa, chay runas creesqankurayku. Chay suchu runatataj nerqa: ‘Juchasniykeqa perdonasqaña’, nispa.

Wakin runaspajqa Jesuspa nisqan mana allinchu karqa. Paykunaqa mana creerqankuchu Jesús juchasta perdonayta atisqanta. Jesustaj chayta ruwayta atisqanta rikuchinanpaj, chay suchu runaman nerqa: “Sayariy, camayquita okharispataj wasiyquiman ripuy”, nispa (Mosoj Testamento, 1956).

Jesús chayta nisqantawan, suchu runaqa ujllata sayarerqa, purirerqataj. Chayta rikojkunataj mayta tʼukorqanku. Paykunaqa ni jaykʼaj chay jina milagrota rikorqankuchu. Chantá Diosta jatuncharqanku Jesusta kachamusqanmanta, pichus onqosqastapis sanoyachiyta atej (Marcos 2:1-12).

¿Imatá chaymanta yachakunchej?... Jesusqa juchasta perdonananpaj, onqosqasta sanoyachinanpajpis atiyniyoj kasqanta. Chantá yachakullanchejtaj, onqoykunaqa jucharayku kasqanta.

Tukuypis onqoyta yachanchej. Chay, ¿ninayanchu tukuyninchej juchasapas kasqanchejta?... Arí, Bibliaqa juchayoj nacekusqanchejta nin. ¿Yachankichu imachus chay niyta munasqanta?... Nacekusqanchejmantapacha pantaj runas kanchej. Chayrayku, mana munaspapis wakin kuti pantanchejpuni. Chantá, ¿imaraykutaj tukuyninchej juchasapas kanchej?...

Ñaupaj kaj runa Adán juchallikusqanrayku. Payqa Diospa kamachisqanta mana kasorqachu. Tukuyninchejtaj Adanmanta juchata herenciata jina japʼinchej. ¿Imaynamantá? Entiendenaykipaj jina sutʼincharisqayki.

Ichá pitapis rikorqanki quequeta chayri biscochota uj moldepi ruwashajta. Chay queque ruwana molde ñatʼusqa kajtin, ¿imaynataj queques llojsinkuman?... Tukuy queques ñatʼusqallataj llojsenqanku, ¿icharí?...

Adanqa chay molde jina karqa. Noqanchejtaj chay queques jina kanchej. Adanqa Diosta mana kasukusqanrayku juchasapaman tukorqa. Chaymantapachataj chay ñatʼusqa molde jina karqa, nisunman juchayoj. Wawasninrí, ¿juchayojllatajchu kankuman karqa?... Arí, juchayojllataj nacekorqanku.

Ashkha wawasqa sanitoslla kaspa jinanku. Mana chʼulla chakichu, nitaj chʼulla makichu nacekunku. Juchata herenciata jina japʼisqankuraykutaj, onqonku, tiempowantaj wañupunku.

Wakin runasqa astawan onqonku. ¿Imaraykutaj? ¿Aswan juchayoj nacekusqankuraykuchu?... Mana. Mana pipis wajkunamanta nisqa aswan juchayoj nacekunchu. Tukuyninchej juchasapas kanchej, chayraykutaj maykʼajllapis onqonchejpuni. Diospa leyninta kasukunankupaj, sajra kajta mana ruwanankupaj kallpachakojkunapis onqonkupuni.

Chantá, ¿imaraykutaj wakin runas astawan onqonku?... Ichapis mana mikhunayoj kasqankurayku chayri mana kallpachaj mikhunasta mikhusqankurayku. Wakinkunataj onqonku miskʼisllata chʼonqasqankurayku. Wakintajrí ancha tuta puñusqankurayku, wakintaj chiripi qʼalalla purisqankurayku. Wakenqa kallpanku pisiyasqanrayku, mana onqonapaj tukuy imata ruwajtinkupis onqonku.

¿Onqoykuna chinkanmanchu? ¿Maykʼajllapis juchamanta kacharichisqachu kasunchej?... ¿Yuyarikunkichu imatachus Jesús suchu runawan ruwasqanta?... Payqa juchasninta perdonarqa, sanoyacherqataj. Ajinamanta Jesusqa rikucherqa, kasukoj runaspaj imatachus qhepaman ruwananta.

Mana juchallikunapaj kallpachakojtinchej, sajra kajtataj chejnikojtinchej, Jesusqa sanoyachiwasun. Payqa Diospa Gobiernonmanta Rey jina, juchamanta kacharichiwasun. Juchaqa mana uj ñawi chʼirmiypichu chinkanqa, manaqa pisimanta pisi. Jucha chinkajtintaj, manaña onqosunchu. Tukuyninchej sanos kasunchej. ¡Chaymá may kusiy kanqaqa!