¿Diosmantapunichu sumaj willaykuna jamun?

1. ¿Pitaj Bibliata qhelqacherqa?

Bibliaqa willawanchej kay jallpʼapi wiñay kausay kananta (Salmo 37:29). Bibliaqa 66 librosniyoj, 40 runas jinataj qhelqarqanku. Moisés qallariypi 5 librosta qhelqasqanmantaqa, 3.500 watasña pasan. Apóstol Juan qhepa kaj librota qhelqasqanmantataj, 1.900 watasña pasan. ¿Pejpa yuyaynintaj Bibliapi qhelqasqa kashan? Diospa yuyaynin. Diosninchejqa atiyninwan Bibliata qhelqajkunata yuyaycharqa (2 Samuel 23:2). Paykunaqa Diospa yuyayninta qhelqarqanku, mana paykunaj yuyayninkutachu. Chayrayku Bibliaqa, Jehová Diosmanta jamun. 2 Timoteo 3:16; 2 Pedro 1:20, 21 leey.

Kay ¿Pitaj Biblia qhelqakunanpaj yuyaycharqa? nisqa videota qhawariy.

2. ¿Imaraykú Bibliaj nisqanpi atienekusunman?

Imaraykuchus qhepaman imachus kananta nisqanqa, juntʼakunpuni. Runaqa mana chayta niyta atinmanchu (Josué 23:14). Arí, Tukuy Atiyniyoj Dioslla, imachus qhepaman kananta niyta atin. Isaías 42:9; 46:10 leey.

Bibliaqa Diospa yuyaychasqan kasqanrayku, ni mayqen librowan kikinchakunchu. Kunankamaqa may chhika Bibliasña, ashkha parlaykunapi runasman jaywakun. May unayniyoj kaspapis, runaspa yachasqankumanta parlaspa mana pantanchu. Tawa chunka runas qhelqajtinkupis, Bibliaqa mana iskaytachu parlan. Chantapis Diosqa Bibliata qowarqanchej munakuwasqanchejrayku. Bibliataj kausayninchejta cambiayta atin. Chayrayku ashkha runas Bibliata Diospa Palabranta jina japʼikunku. 1 Tesalonicenses 2:13 leey.

Kay Bibliaqa cheqata parlan nisqa videota qhawariy.

3. ¿Imamantataj Biblia parlawanchej?

Imatachus Dios runaspaj munasqanmanta. Chantapis Bibliaqa willawanchej ñaupa tatasninchej Edén huertamanta qharqochikusqankuta. Nillawanchejtaj imaynatachus Dios sumaj kausayta watejmanta apamunanta. Apocalipsis 21:4, 5 leey.

Diospa Palabranpeqa kamachiykuna, yuyaychaykuna ima tiyan. Bibliaqa Diosta rejsinapaj yanapawanchej. Chaypeqa Diosninchej runaswan manchay kʼachapuni kasqanta yachasunman. Chantapis Bibliaqa, imaynatachus Dioswan amigos kayta atisqanchejta sutʼinchawanchej. Salmo 19:7, 11; Santiago 2:23; 4:8 leey.

4. ¿Imataj Bibliata entiendenapaj yanapawasunman?

Kay folletoqa Bibliata entiendenapaj wakin versiculosta sutʼinchashan. Jesuspis ajinallatataj sutʼincharqa runas “Diosmanta Qhelqasqata allinta entiendenankupaj”. Lucas 24:27, 45 leey.

Diosninchej imastachus runaspaj ruwananmanta astawan yachakuspaqa, mayta kusikusunchej. Wakin runastajrí, mana yachayta munankuchu. Wakintaj Bibliamanta parlajtinchej phiñarikunku. Jinapis Bibliamanta yachakunallapuni. Imaraykuchus Diosta rejsispaqa, wiñay kausayta japʼisun. Juan 17:3 leey.