¿Imaynatá familias kusisqa kausakunkuman?

1. ¿Imaraykutaj leyesman jina casarakuna tiyan?

May sumaj willaykunaqa, “kusikuyniyoj Diosmanta jamun”. Paytaj familias kusisqa kausakunankuta munan (1 Timoteo 1:11). Casado kausaytaqa pay rikhuricherqa. Ley nisqanman jina casarakuytaj familiata jarkʼan, kusisqa kausanankupajtaj yanapan. Cristianosqa suyunkoj leyesninman jina, casarakunanku tiyan. Lucas 2:1, 4, 5 leey.

Jehová Diosqa, casarasqa kajkuna wañupunankukama khuska kanankuta munan. Chantapis munallantaj qhariwarmi kausay, khuchichakuymanta llimphu kananta (Hebreos 13:4). Payqa mana munanchu casarasqa kajkuna divorciakunankuta (Malaquías 2:16). Cristianosqa qosanku chayri warminku qhenchachakojtillan, divorciakuspa watejmanta casarakuyta atinku. Mateo 19:3-6, 9 leey.

2. ¿Imaynatá qhariwarmi kajkuna kausakunanku tiyan?

Jehová Diosqa qharitawan warmitawan ruwarqa, casarakuspa purajmanta yanapanakunankupaj (Génesis 2:18). Sapa familiamanta umataj qosa. Chayrayku payqa familianman necesitasqanta qonan tiyan, Diosmantapis yachachinan tiyan. Warminta munakusqanraykutaj, allinninta maskʼanan tiyan. Casarasqasqa munanakunanku, respetanakunanku tiyan. Juchasapas kasqankuraykutaj, kusisqa kausakunankupaj perdonanakuyta yachananku tiyan. Efesios 4:31, 32; 5:22-25, 33; 1 Pedro 3:7 leey.

3. Qhariwarmi kausaypi ima problema kajtinpis, ¿tʼaqanakunankuchu tiyan?

Ima problema kajtinpis, casarasqa kajkunaqa purajmanta munanakunankupaj kallpachakunanku tiyan (1 Corintios 13:4, 5). Bibliaqa mana ninchu tʼaqanakunanku kasqanta. 1 Corintios 7:10-13 leey.

4. ¿Imatataj Dios wawaspaj munan?

Jehová Diosqa, wawas kusisqas kausanankuta munan. Chayraykutaj jovenesta kusisqa kanankupaj yuyaychan. Chantapis munan tatasninkuwan yanapachikunankuta (Colosenses 3:20). Jehová Diosqa paypaj, Wawanpaj ima llankʼaspa kusisqa kanankuta munan. Eclesiastés 11:9–12:1; Mateo 19:13-15; 21:15, 16 leey.

5. ¿Imatataj tatas ruwankuman wawasninku kusisqas kanankupaj?

Tatasqa wawasninkuman mikhunata, wasita, ropata ima qonankupaj kallpachakunanku tiyan (1 Timoteo 5:8). Chantapis Diosta munakuyta, pay jina ruwaytataj yachachinanku tiyan (Efesios 6:4). Tatas Diosta munakojtinkoqa, wawaspis munakullanqankutaj. Biblia nisqanman jina kausakunankupaj yachachejtinkutaj, wawasqa allinta kausakonqanku. Deuteronomio 6:4-7; Proverbios 22:6 leey.

Wawasqa allinta ruwasqankumanta, “allinta ruwanki” ninata necesitanku. Chantapis wakin kutipi kʼaminata, yuyaychanata, yachachinata ima necesitanku sajra ruwaypi mana urmanankupaj (Proverbios 22:15). Tatasqa chayta ruwanankupuni tiyan. Jinapis mana wawasninkuta ñakʼarichinankuchu tiyan. Colosenses 3:21 leey.

Jehovaj testigosnenqa tatasta, wawasta ima yanapanapaj, ashkha librosta orqhonku. Chaykunataj Bibliamanta orqhosqa kashan. Salmo 19:7, 11 leey.