¿Imapitaj llulla religiones tukonqanku?

1. ¿Tukuy iglesiaschu allin kanku?

Tukuy religionespi kʼacha runas tiyan. Chay runasmantataj Diosqa mana qonqapunchu. Chaywanpis llakikunapaj jina, ashkha religionespi sajra ruwaykuna rikukun (2 Corintios 4:3, 4; 11:13-15). Sapa pʼunchay uyarinchej wakin iglesiaspi wawasta abusasqankuta, runasta wañuchisqankuta, guerrasman satʼikusqankuta ima. Chaytaj tukuyta llakichiwanchej. Mateo 24:3-5, 11, 12 leey.

Cheqan religionmanta kajkunaqa Diosta jatunchanku, llulla religionmanta kajkunarí Diospa sutinta chʼichichanku. Paykunaqa Bibliaj yachachisqanta qʼewinku, Diosmanta, wañusqasmantapis llullata yachachinku. Jehová Diosninchejrí runas cheqa kajta rejsinankuta munan. Eclesiastés 9:5, 10; 1 Timoteo 2:3-5 leey.

2. ¿Imapitaj religiones tukonqanku?

Diosta simillamanta munakojkunaqa, ruwasqankuwan Satanaspa mundonta munakusqankuta rikuchinku. Jehová Diostajrí mana paykunawan engañachikunchu (Santiago 4:4). Bibliaqa tukuynin llulla religionesta “Jatun Babilonia” nispa sutichan. Imaraykuchus Jatun Para pasayta, tukuy llulla religiones Babilonia llajtapi qallarerqanku. Jehová Diostaj pisimantawan llulla religionesta ujllata chinkarparichenqa, runata engañasqankurayku, sufrichisqankurayku ima. Apocalipsis 17:1, 2, 5, 16, 17; 18:8 leey.

Diosqa llulla religionespi kashanku chay kʼacha runasmanta mana qonqapunchu. Chayrayku paykunaman sumaj willaykunata willachishan. Miqueas 4:2, 5 leey.

3. ¿Imatataj llampʼu sonqo runas ruwananku tiyan?

Jehová Diosqa cheqa kajta rejsiyta, allin kajtataj ruwayta munajkunamanta yuyarikun. Chayrayku llulla religionmanta llojsipunankuta nin. Chay runas payta munakuspaqa, paypa munayninman jina kausakuyta qallarenqanku. Apocalipsis 18:4 leey.

Ñaupa tiempopi, llampʼu sonqo runasqa apóstoles willasqankuta tukuy sonqo japʼikorqanku. Jehová Diostaj paykunata kusisqas, sonqo juntʼasqas, suyakuyniyojtaj kanankupaj yanaparqa. Noqanchejpis paykuna jina ruwananchej tiyan, Diospa munaynintataj ñaupajman churananchej tiyan. 1 Tesalonicenses 1:8, 9; 2:13 leey.

Jehová Diosqa, llulla religionmanta llojsipuspa llajtanman yaykupojkunata kusiywan japʼikapun. Chay runasqa Diospa amigosnin kayta atinku, uj kʼacha familiata tarinku, wiñay kausaytataj tariyta atinku. Chay bendicionesta, ¿qanpis japʼiyta munawajchu? Marcos 10:29, 30; 2 Corintios 6:17, 18 leey.

4. ¿Imatá Dios ruwanqa allin kausay kananpaj?

Jehová Diosqa llulla religionesta chinkachenqa. Ajinamantataj llulla religionqa manaña runasta engañanqachu, nitaj tʼaqanachenqachu. Tukuytaj Jehová Diosllata yupaychasunchej. ¡Chaymá sumaj willayqa! Apocalipsis 18:20, 21; 21:3, 4 leey.