Diosman qayllaykuspa kusisqas kausakuychej

Jehovaqaa ñaupa tatasninchejta casaracherqa. Biblia niwanchej Jehová, warmita ruwaspa Adanman pusamusqanta. Adantaj may kusiywan nerqa: “Kayqa kikin tulluymanta, kikin aychaymanta”, nispa (Génesis 2:22, 23). Kunankamapis, Jehovaqa casarasqas kusisqas kausakunankuta munan.

Casarakojkunaqa ichapis ni jaykʼaj chʼampayniyoj kanankuta yuyankuman. Mayta munanakuspapis chʼampayninku kanqapuni (1 Corintios 7:28). Kay folletopeqa Bibliaj yuyaychaykunasninta tarinki, nisqanman jinataj ruwanki chayqa, qhariwarmi kausayniykipi may kusisqa kausakunki (Salmo 19:8-11).

1 JEHOVÁ KAMACHISUSQANTA JUNTʼAY

BIBLIA NIN: “Qosaqa warmimpa umanmin”, nispa (Efesios 5:22, 23).

Qosa kanki chayqa, Jehová munan warmiykita sumajpaj qhawanaykita (1 Pedro 3:7). Yanapajniykita jina ruwasqanraykutaj munakunaykita munan, nitaj pisipaj qhawanaykitachu (Génesis 2:18). Warmiykita mayta munakusqaykirayku allinninta maskʼay, ama qanpa allinnillaykitaqa (Efesios 5:25-29).

Casarasqa warmi kanki chayqa, Jehová munan qosaykita jatunpaj qhawanaykita, llankʼayninta juntʼananpaj yanapanaykitapis (1 Corintios 11:3; Efesios 5:33). Imatapis ajllajtenqa tukuy sonqowan yanapay (Colosenses 3:18). Ajinata ruwajtiykeqa Jehová, qosayki ima may allinpaj qhawasonqanku (1 Pedro 3:1-6).

KAYTA RUWAWAJ:

• Qosaykita chayri warmiykita tapuriy, imatachus ruwanaykita uj sumaj qosa chayri uj sumaj warmi kanaykipaj. Sumajta uyariy, nisusqanman jinataj ruwanaykipaj kallpachakuy

• Pacienciayoj kay. Ama suyaychu chay rato tukuy ima allin kanantaqa

2 QOSAYKEJ CHAYRI WARMIYKEJ ALLINNINTA MASKʼAY

BIBLIA NIN: Qosaykej chayri warmiykej allinninta maskʼanaykeqa may sumaj (Filipenses 2:3, 4). Jehovaqa munan allinta apanakunaykichejta, kʼachas kanaykichejta ima (2 Timoteo 2:24). Tʼukuriy imatachus ninaykipi. Biblia nin: “Imallatapis mana yuyaychakuspalla runaj parlarparisqanqa espada jina tʼojsin; yachayniyojkunaj parlasqasninkurí jampi jina sonqota thañichin”, nispa (Proverbios 12:18). Jehovaj espiritonqa kʼachamanta, munakuywantaj parlanaykichejpaj yanapasonqachej (Gálatas 5:22, 23; Colosenses 4:6).

KAYTA RUWAWAJ:

• Mana phiñanakuspalla imatapis parlanaykichejpaj, Diosmanta mañakuychej

• Sumajta tʼukuriy imatachus, imaynatachus ninaykipi

3 UJLLA KASQAYKICHEJTA YUYARIKUYCHEJ

BIBLIA NIN: Casarasqas “ujllaña” kasqankuta (Mateo 19:5). Chaywanpis mana kikintapunichu yuyankuman. Chayrayku imatachus yuyasqaykichejta, imatachus munasqaykichejta ima yachanaykichej may allin kanman (Filipenses 2:2). Khuska imatapis ajllanaykichej tiyan. ¿Imaynatá chayta ruwawajchej? Biblia nin: “Ima ruwanatapis wakichina sumaj yuyaychaywan”, nispa (Proverbios 20:18). Imatapis ajllanaykichejpajqa, Bibliaj yuyaychaykunasninwan yanapachikuychej (Proverbios 8:32, 33).

KAYTA RUWAWAJ:

• Qosaykiwan chayri warmiykiwan imatachus yuyasqaykimanta, munasqaykimanta ima, sutʼita parlariy

• Manaraj imatapis ajllashaspa, qosaykita chayri warmiykita tapuriy