Jesusqa Nazaretpi wiñakun

Jesusqa Nazaret llajtapi wiñakorqa. Chay llajtaqa Galilea jallpʼaj lomarara lugaresninpi kasharqa. Chaytaj karqa Judea jallpʼaj pata ladonpi, Galilea qochamanta inti yaykuynej ladopitaj. Nazaret llajtaqa juchʼuylla karqa, nitaj may rejsisqachu kaj.

Josewan Mariawanqa, Jesusta iskay watitayojtasina Egiptomanta apakanporqanku. Chaypachaqa Jesusllasina wawitanku karqa. Jinapis qhepaman, waj wawitasninku kallarqataj. Paykunaqa sutikorqanku: Santiago, José, Simón, Judas ima. Chantapis warmi wawitasninku kallarqataj. Chayrayku Jesusqa sojta sullkʼasniyojsina karqa.

Chantapis ñaupajpi yachakorqanchejña, Elisabetwan wawan Juanwanpis Jesuspa familiaresnin kasqankuta. Paykunaqa Judea jallpʼapi tiyakorqanku. Chaytaj Nazaretmanta karupi kasharqa, ura ladopitaj. Jinapis mana paykunallachu Jesuspa familiaresnin karqanku. Galileapeqa, Salomewan qosan Zebedeowan tiyakorqanku. Wawasninkutaj sutikorqanku Santiago, Juan ima. Salomeqa ichá Mariaj hermanan karqa. Jina kajtintaj, Salomeqa Jesuspa tian karqa, Santiagowan Juanwantaj primosnin karqanku. Mana yachanchejchu, Jesuswan primosninwan khuskachus manachus wiñakusqankuta. Jinapis aswan qhepamanqa, Jesuspa sumaj amigosnin karqanku, apostolesnintaj.

Joseqa jatun familiayoj karqa. Paykunata uywananpajtaj sinchʼita trabajarqa. Joseqa carpintero karqa, Jesustataj wawitanta jinapuni uywarqa. Chayrayku Jesustaqa “carpinteroj wawan” nej kanku (Mateo 13:55). Joseqa Jesusman oficionta yachacherqa, Jesustaj sumajta yachakorqa. Chayrayku runasqa, Jesusta “carpintero” nej kanku (Marcos 6:3).

Josewan Mariawanqa, Jehová Diosta yupaychayta ñaupajmanpuni churaj kanku. Paykunaqa Ley nisqanman jina, wawasninkuman sapa kuti Diosmanta yachachej kanku: ‘wasipi kashaspa, ñanpi purishaspa, puñunapaj siriykushaspa, jatarishaspapis’ (Deuteronomio 6:6-9). Nazaretpeqa uj sinagoga kaj. Judiosqa ajinata sutichaj kanku, Diosta yupaychananku wasista. Joseqa familianta sapa kutichá chayman pusaj, Diosta yupaychanankupaj. Imajtinchus Bibliaqa Jesusmanta nin: “Yachasqa kasqanman jinataj Samarikuna Pʼunchaypi sinagogaman yaykorqa”, nispa (Lucas 4:16). Chantapis Joseqa familianta Jerusalenman pusajpuni. Tukuyninkuchá Diospa templonman kusisqa rej kanku.