Jesuspa yachachisqasnin yapakunku, Juanpatataj pisiyanku

Jesusqa 30 watapi Pascua fiestata Jerusalenpi pasaytawan, mana Galileamanchu kuterqa. Manachayqa yachachisqasninwan khuska Judeaj ranchosninman rerqa. Chaypi kashaspa paykunaqa ashkha judiosta bautizarqanku. Manataj Jesuspunichu bautizasharqa, manachayqa yachachisqasnillan. Juan Bautistapis watataña Jordán mayupi bautizashallarqataj, wakin yachachisqasnintaj paywanraj kasharqanku.

Judiosqa Diospa Leyninta mana kasukuspa juchallisqanku. Jesuswan Juan Bautistawantaj juchankuta reparacherqanku. Ashkha judíos chay juchankumanta pesachikorqanku. Pesachikusqanku sutʼi kananpajtaj, Juan Bautistawan bautizachikorqanku, wakintaj Jesuspa yachachisqasninwan (Hechos 19:4).

Juan Bautistaj yachachisqasnenqa, Jesusta allin risqanmanta envidiakorqanku. Chayrayku Juanman nerqanku: ‘Qanwan kasharqa chay Jesusqa bautizashan, tukuy runastaj payman rishanku’, nispa (Juan 3:26). Juanrí mana paykuna jinachu yuyarqa. Astawanpis Jesusta allin risqanmanta kusikorqa, munarqataj yachachisqasninpis kusikunallankutataj. Chayrayku Juanqa, yachachisqasninman nerqa: “Qankuna uyarerqankichej nisqayta: ‘Noqaqa mana Cristochu kani, manachayqa paypa ñaupaqenta rinallaypaj Dios kachamuwan’, nispa”. Chantá sutʼita entiendenankupaj, Juanqa casarakoj runamanta parlarqa. Pay nerqa: “Noviaqa noviojta. Novioj qayllanpi kaj amigontajrí, novioj parlasqanta uyarispa mayta kusikun. Ajinallatataj noqapis mayta kusikuni”, nispa (Juan 3:28, 29).

Imaynatachus novioj amigon kusikun, ajinallatataj Juan Bautistapis Jesusta yachachisqasninman rejsichispa mayta kusikorqa. Juanpa wakin yachachisqasnenqa, Jesusta rejsiytawan qhepanta rerqanku, aswan qhepamantaj Diosqa paykunaman atiyninta qorqa. Juanqa munarqa, paywanraj kasharqanku chay yachachisqasninpis, Jesuspa qhepanta rinankuta. Imajtinchus payqa runasta Cristoman pusananpaj kachamusqa karqa. Payllataj nerqa: “Cristoj yachachisqasnenqa yapakullanqankupuni, yachachisqasniytajrí pisiyallanqankupuni”, nispa (Juan 3:30).

Jesuspa ujnin yachachisqan Juan sutikorqa. Paytaj aswan qhepaman Jesusmanta jinata qhelqarqa: “Cielomanta jamojqa tukuypa patanpi kashan. [...] Tata Diosqa Wawanta munakun, paypa makinmantaj tukuy imata churan. Diospa Wawanpi creejqa wiñay kausayniyoj kanqa, Diospa Wawanta mana kasojrí, mana wiñay kausayta japʼenqachu, astawanpis Diospa kʼajaj phiñakuynin paypa patanpi kanqa”, nispa (Juan 3:31, 35, 36). Tukuy runastaj chayta yachananchej tiyan.

Juan Bautista llankʼaynin tukukunantaña nisqantawan, rey Herodesqa Juanta japʼichispa carcelman wisqʼaykucherqa. Imaraykuchus Juanqa, Herodesman uyanpi nipusqa qhenchachakusqanta. Herodesqa hermanon Felipej warmin Herodiasta warminpaj japʼikapuspa juchallisqa. Jesustajrí “Juanta presochasqankuta uyarispa, Galileaman riporqa” (Mateo 4:12; Marcos 1:14).