Jesusqa Samarikuna Pʼunchaypi allin kajta ruwan

Jesusqa Galilea jallpʼapi predicarqa, milagrostapis ruwarqa. Jinapis mana chayllapichu willayta munarqa. Payllataj nerqa: “Waj llajtaspipis Diospa Gobiernonmanta sumaj willaykunata willamunallaytaj tiyan”, nispa. Chayrayku Jesusqa Judea jallpʼaman rerqa, chaypitaj “sinagogasninpi willararqa” (Lucas 4:43, 44). Manataj predicajllachu Judeaman rerqa, manachayqa Pascua fiestapajwan. Chay fiestaqa Jerusalenpi ruwakoj, marzo, abril killaspi, qayllapiñataj kasharqa.

Mateo, Marcos, Lucas, Juan librospeqa, Jesús Galileapi willasqanmanta ashkhata parlakun, Judeapi willasqanmantarí pisillata parlakun. Ichapis Judeamanta runasqa, mana Jesusta uyariyta munarqankuchu. Jinapis payqa chaypi willallarqapuni, sapa lugarpitaj allin imasta ruwarqa.

Chaymanta Jesusqa, Pascuapaj 31 watapi Jerusalenman rerqa. Jerusalenpeqa Ovejas Punku nisqa qayllapi, jatun estanque karqa. Chay estanqueqa Betzata sutiyoj karqa, chaymantaj rej kanku ciegos, cojos, waj onqosqas ima. Paykunaqa yuyaj kanku, yaku kuyurejtin estanqueman yaykojtinku sanoyapunankuta.

Jesusqa Samarikuna Pʼunchaypi chaynejta pasasharqa. Ajinapi 38 watastaña onqosqa runata estanque kantupi rikorqa. Chantá Jesusqa payta nerqa: “¿Munawajchu sanoyapuyta?”, nispa. Chay runataj kuticherqa: “Wiraqochíy, mana piniypis tiyapuwanchu yaku kuyurejtin estanqueman ichuykunawanpaj. Sapa kuti yakuman yaykuyta munashajtiy wajllapuni ñaupaykuwan”, nispa (Juan 5:6, 7).

Jesustaj chay runaman nerqa: “Sayariy, wantunaykita oqharispa puririy”, nispa (Juan 5:8). Chay runataj chay ratopacha sanoyaporqa, wantunanta oqharispataj purirerqa.

Chaymanta chay runaqa judioswan tinkorqa. Paykunatajrí sanoyasqata rikuspa mana kusikorqankuchu. Astawanpis payta nerqanku: “Kunan Samarikuna Pʼunchay kasqanrayku, mana chay wantunaykita apayta atinkichu”, nispa. Paytajrí kuticherqa: “Sanoyachiwan chay runallataj niwarqa: ‘Wantunaykita oqharispa puririy’, nispa” (Juan 5:10, 11). Chay judiosqa mana munarqankuchu, pipis Samarikuna Pʼunchaypi onqosqasta sanoyachinanta.

Chayrayku pichus chay runata sanoyachisqanta yachayta munaspa, payta taporqanku: “¿Pitaj nisorqa, ‘wantunaykita oqharispa puririy’ nispari?”. Chay runatajrí mana yacharqachu pichus sanoyachisqanta, Jesús “ashkha runas chaupipi chinkarisqanrayku” (Juan 5:12, 13). Jinapis watejmanta Jesuswan tinkorqa. Templopi kashajtin Jesús payta parlapayarqa, jinapitaj yacharqa pichus sanoyachisqanta.

Chantá payqa, taporqanku chay judiosta maskʼamorqa. Paykunata tarispataj Jesús payta sanoyachisqanta willarqa. Judiostajrí chay rato Jesusta maskʼaj kachaykukorqanku. Paykunaqa mana Jesusmanta yachakuyta munaspachu maskʼamorqanku, manachayqa Samarikuna Pʼunchaypi chay runata sanoyachisqanmanta juchachanankupaj. Chayrayku judiosqa Jesusta qhatiykachayta qallarerqanku.