Lepra onqoyninmanta sanoyapoj runa agradecekun

Jatun Juntamanta kajkunaqa Jesusta wañuchiyta munarqanku. Chayrayku Jesusqa Jerusalenmanta Efraín llajtaman riporqa. Payqa chaypi yachachisqasninwan khuska quedakorqa, nitaj enemigosnin payta tariparqankuchu (Juan 11:54). Chaypachaqa 33 watamanta Pascua fiesta qayllapiña kasharqa, Jesustaj chaypaj Jerusalenman rinan karqa. Chantapis wañuchisqa kananpaj pisi tiempollaña faltasharqa. Jinapis Jesusqa niraj Jerusalenman rishaspa, Samarianta Galileaman riporqa. Chay kutipi risqanmantataj niña Galileaman kuterqachu.

Jesusqa Galileaman rishaspa, ashkha ranchosninta pasarqa. Payqa ñanta rishaspa, lepra onqoyniyoj chunka runaswan tinkukorqa. Lepra onqoyqa may millay karqa, wakin kutisqa runaspa maki dedosninkuta, chaki dedosninkuta, ninrisninkuta ima qʼetayachej (Números 12:10-12). Diospa Leynin nisqanman jina, leprayoj runasqa qhaparinanku karqa: “Leprayoj kani, leprayoj kani”, nispa. Chantapis paykunaqa sapallanku tiyakunanku karqa (Levítico 13:45, 46).

Chayrayku chay lepra onqoyniyoj runas mana Jesusman chimparqankuchu. Astawanpis karullamanta qhaparerqanku: “¡Jesús, Yachachejníy! Khuyarikuwayku ari”, nispa. Jesustaj paykunata rikuspa nerqa: “Sacerdotesman rispa rikuchikamuychej”, nispa (Lucas 17:13, 14). Jesusqa paykunata sacerdotesman kachaspa, Diospa leynin nisqanman jina ruwasharqa. Imajtinchus Ley nisqanman jinaqa, sacerdoteslla niyta atej kanku pichus lepra onqoyninmanta sanoyapusqanta. Chantapis paykunalla niyta atej kanku, sanoña kaspa runaswan khuska tiyakuyta atisqankuta (Levítico 13:9-17).

Chay lepra onqoyniyoj 10 runasqa, Jesús paykunata sanoyachinanpi creerqanku. Chayrayku manaraj sanoyasqachu kashaspapis sacerdotesman rerqankupacha. Ñanta rishaspataj creesqankurayku sanoyaporqanku.

Chay chunka runasmanta ujnenqa, khuskan ñanmanta kutiriporqa. Chay runaqa samaritano kasqa. Payqa sanoyapusqanmanta may kusisqa kasharqa. Repararqataj Jehová Diosninchej payta sanoyachisqanta. Chayrayku “jatunmanta Diosta jatunchaspa” Jesusta maskʼaj rerqa (Lucas 17:15). Jesusta taripaytawantaj, pampakama kʼumuykukuspa mayta agradecekorqa.

Chantá Jesusqa muyuyninpi kaj runasman nerqa: “¿Manachu chunkantin sanoyaporqanku? ¿Maypitaj chay jisqʼon kashankuri? ¿Manachu Diosta jatunchanankupaj kutimunku? ¿Kay waj llajtayoj runallachu kutimun?”, nispa. Chantá Jesusqa samaritano runata nerqa: “Sayarispa ripuy, creesqaykirayku sanoyasqaña kanki”, nispa (Lucas 17:17-19).

Jesusqa chay chunka runasta lepra onqoyninkumanta sanoyachispa, Jehová Diosninchej payta yanapashasqanta rikucherqa. Chantapis chay 10 runasmanta ujninta yanaparqa kausayman pusaj ñanta tarinanpaj. Kay tiempopitajrí, Diosqa manaña Jesusnejta milagrosta ruwanchu. Jinapis Jesuspi creespaqa wiñay kausayman pusaj ñanpi kayta atisunchej. Chayrayku may allin kanman chay agradecekoj samaritano runa jina ruwananchej.