5 YACHAQANA
“Kausayniykichejpa michejninman, qhawajninmantaj” kutinpuychej
Ichá qanpis kay folletopi parlarqanchej chay jina llakiykunapi rikukushanki. Jina kajtenqa kayta yuyarikuy, unay tiempomantapacha Diospa kamachisnin ajina llakiykunapi rikukorqanku, Jehovataj paykunata yanaparqa, qantapis yanapallasonqataj.
“Reparakorqani Jehovaqa ni jaykʼaj saqerpariwasqanta, paymantaj imaynallamantapis kutinpunay kasqanta”
JEHOVAQA payman kutinpunaykipaj yanapasonqa. Pay yanapasonqa llakiykunasniykita atipanaykipaj, ama phiñasqallapuni kanaykipaj, nitaj sonqoyki juchachasunanpaj. Ajinamanta hermanoswan khuska watejmanta Jehovata yupaychayta munanki. Qanqa ñaupa tiempomanta wakin cristianos jina ruwanki. Paykunaman apóstol Pedro nerqa: “Chinkasqa ovejas jina karqankichej. Kunantajrí kausayniykichejpa michejninman, qhawajninmantaj kutirinpunkichej”, nispa (1 Pedro 2:25).
Jehovaman watejmanta qayllaykuyta atisqaykeqa ni imawan kikinchakunchu. Chayta ruwaspaqa Jehovata mayta kusichinki (Proverbios 27:11). Yachanki jinataj, ruwasqasninchejwan Diosta kusichisunman chayri llakichisunman. Jinapis Jehovaqa mana munanchu tanqasqa jinalla payta munakunanchejta, sirvinanchejta ima (Deuteronomio 30:19, 20). Bibliamanta yachaj runa nerqa: “Runaj sonqontaqa mana pipis kichayta atinmanchu, manaqa pay kikillan kichayta atin”, nispa. Jehovata munakusqanchejrayku sirvinchej chayqa, payman sonqonchejta kicharishanchej. Chaytaj payta maytapuni kusichin, imaraykuchus payta tukuy sonqo yupaychasqanchejqa paypaj may sumajpuni. Ni imapis kusichiwasunmanchu Diosta yupaychay jinaqa (Hechos 20:35; Apocalipsis 4:11).
Chantapis Diospa llajtanman kutinpuspaqa, Diosman watejmanta qayllaykunaykipaj yachachiykunata japʼinki (Mateo 5:3). Ashkha runasqa tapukunku imapajchus kausasqanchejta, waj tapuykunata ima, nitaj yachankuchu kutichiykunasninta. Runasqa Jehovamanta yachakuyta necesitanchej, ajinata pay ruwawarqanchej. Jehovaqa yachan payta sirvispalla may kusisqa kausakunanchejta. Chayrayku Jehovata munakusqaykirayku yupaychaspaqa may kusisqa kanki (Salmo 63:1-5).
Jehovaqa llajtanman kutinpunaykita munan. Chayrayku kay folletota ruwakorqa. Kay folletotaqa Diosmanta yanapata mañakuytawan tukuy sonqo wakicherqayku. Kay folletotaqa ichá congregacionniykimanta uj anciano chayri waj hermano jaywasorqa, qantaj kunan kay folletota leeshanki. Leesqaykitaj sonqoykimanchá chayashan. Tukuy chaytaj rikuchin Jehová qanmanta mana qonqakapusqanta, payman kutinpojtiykitaj munakuywan japʼikapusunanta (Juan 6:44).
Jehová chinkasqa ovejasninmanta mana qonqakapusqanqa, mayta sonqochawanchej. Donna sutiyoj hermana chayta yachakorqa, pay nin: “Pisimanta pisi Diosmanta karunchakorqani, jinapis imatachus Salmo 139:23, 24 nisqanpi tʼukurillajpuni kani, chaypi nin: ‘Diosníy, allinta qhawaykuriway, sonqoytapis allinta rejsiy. Allinta qhawaykuriway, sonqoypi phutiyniytapis allinta rejsiy. Allinta sonqoyta qhawaykuriy, ichus ima sajra yuyaypis llakiy ñanman apawanman, wiñay ñantataj pusaway’, nispa. Satanaspa mundonqa mana noqapajchu karqa, nitaj jaykʼajpis chaypi kusisqachu karqani. Noqaqa yacharqani Diospa llajtanmanta kasqayta. Reparakorqanitaj Jehovaqa ni jaykʼaj saqerpariwasqanta, paymantaj imaynallamantapis kutinpunay kasqanta. Maytapuni kusikuni Diospa llajtanman kutinpusqaymanta”, nispa.
Jehovaqa payman kutinpunaykipaj yanapasonqa
Jehovamanta mañakuyku paymanta ‘jamoj kusiyta’ watejmanta tarinaykipaj (Nehemías 8:10). Tatanchej Jehovaj llajtanman kutinpuspaqa, nipuni jaykʼajpis pesachikunkichu.